ДМИТРИЙ ЧАНКОВ - профессор, чаа араласчызы
03.06.2015
Хабарлар
Асхыс аймаандағы Кызластағы ортымах школада профессор Дмитрий Иванович Чанковтың тӧреен кӱніне чарыдылған конференция ирткен. Пӱӱл, кӧрік айының 10-ҷы кӱнінде, Дмитрий Ивановичке 90 час толарҷых.
Школаның хакас тілі кабинедінде ӱгренҷілер паза ӱгретчілер чыылысханнар. Конференцияны хакас тілі ӱгретчізі Фаина Фёдоровна Майнагашева асхан. Соонаң 8-ҷі класстың ӱгренҷізі Алина Капсаргина Дмитрий Ивановичтің олған тузынаңар чоохтаан. Профессорның чайаачы омазын 9-ҷы класстың ӱгренҷізі Евгения Чанкова чарытхан. Ідӧк 11-ҷі класстың ӱгренҷілері Диана Боргоякова, Владимир Колчинаев, Валентина Горчакова Илбек Ада чааға чарыдылған кибелістер паза чоохтар чоохтааннар.
Дмитрий Иванович ӱгреткен ӱгретчілер Маргарита Кирилловна Сандыкова, Мария Михайловна Кызласова, Галина Пахомовна Костякова, Фаина Фёдоровна Майнагашева аның кип-чоохтарын, полған нимелерін, тахпахтарын сағысха киргеннер. Кызластағы ортымах школаның ӱгретчізі Виктор Михайлович Чанков профессорның чаа тузынаңар чоохтап пирген.
Чаа чылларында педучилищені Таштыпсар кӧзіргеннер. Дмитрий Иванович 3-ҷі курста ӱгренчеткен, ӱр ниместе ағаа 18 час тол парған. Мартта, орыс тілі урогы парчатханда, кабинет ізиин тохладып, Ксения Михайловна Коробова кір килген, столзар ағаа паза аның арғыстарына повесткалар салча. Хорғыстығ ниме сағаан чіли, прайзы сым одырыбысхан. Тӱрче полбинаң, Дмитрий Иванович, хол кӧдіріп, ӱгретчізер айланған: «Сальма Густавовна, чарадыңар піске халғанҷы урокта досказар парарға». Ӱгретчі, сизік хаап, Дмитрий Чанковты, Николай Кидиековты, Всеволод Боргояковты соон сӱрістіре досказар хығырча. Олар, прай класс алнынзар сығып, доскада пасчалар, чоох тутчалар, ӱгреніснең анымҷохтасчалар.
Іди чиит оолның чаа чолы пасталыбысхан. Ӱр ниместең Дмитрий Иванович Чанков Асино городха читкен. Чааҷы училищезінде алты ай ӱгреніп, офицер званиезін аларға кирек полған. Че аны ағаа тоозарға киліспеен. Пис ай ирт парғанда, Дмитрий Чанковты чааға тастабысханнар. Анда 62-ҷі пехотнай гвардия дивизиязында станковай пулеметчик полча.
Чахығ пирілген - Днепрні кизерге. Ыырҷы хатығ айғағын кӧзітче, Днепр суғны кизерге пирбинче. Че чаада пір дее тӧдір пазынмасха, алнынзар ла парарға, ыырҷыны унада сабарға, Чиңісті хапчығай чағдадарға - полған на чааҷының сағызы. Днепрні кискен соонаң, Дмитрий Иванович Украинада nip аалны аларында араласхан. Пу чаалазығда пулеметчик Дмитрий Чанков аар палығлатча. Юрий Тихомиров арғызы аны санчастьсар апарыбысхан. Анаң - госпиталь, пасха часть.
Илбек Ада чаа тоозыл парғанда, чон ӧрінген. Чаа алнында хада ӱгренген арғыстарынаң Дмитрий Чанков ла айланған. Ол, сӧбіре тӧстеп, ӱгреніп алған. Аның амыр чуртастағы хониинаңар хызы Алевтина Дмитриевна Чугунекова искір пирген. Мыннаң Дмитрий Иванович Чанковтың 90 чазына чарыдылған конференция тоозылған.
Кызластағы ортымах школаның ӱгретчізі
Автор :
Виктор ЧАНКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде