ТИЛЕКЕЙДЕГІ МУЗЕЙ ТОҒЫНҶЫЛАРЫ ХАКАСИЯДА ЧЫЫЛЫСТЫЛАР
01.07.2016
Хабарлар
Хакасияда иртчеткен «Сибер Ил» чоннар аразындағы культура-турист форумында музей тоғынҷылары чыл сай ӧткін араласчалар. Пӱӱл олар «Музейлер паза культура индустриялары - алнындағыларның стратегиязы» секция тимнееннер, хайзы 29 июньда республиканың музей-культура кінінде ирткен. Анда Россияның, Канаданың паза Германияның специалисттері араласханнар.
Пленарнай чыылығны Хакасияның пазы Виктор Михайлович Зимин паза Россия президентінің советник Владимир Ильич Толстой асханнар. Пастап чоох В.М.Зимин тутхан: «Мин пілчем, Москвадаң нинҷе-де кӱнге сығып аларға сидік, іди дее полза, сірер піс иртірчеткен форумның тоғызында араласчазар. Ол пӱӱл алтынҷы хати иртер, пістің ӧӧн поғдархазыбыс республиканың музей-культура кіні полча. Алты чыл мының алнында саблығ опера ырҷызы Хосе Каррераснаң хада піс пӱдіріг полар орында тас салғабыс, амды мында наа тура турча. Улуғ кінде кӧзідіглер, аймах мероприятиелер иртірерге орын чидер».
Виктор Зимин полызығ ӱчӱн Россияның ӱлгӱлеріне, алынҷа президент Владимир Путинге алғызын читірген. Ол санапча, Хакасияда культура тиліпчетсе, инвесторлар паза меценаттар республиканың экономиказына ахчанаң хабазарға кӱстенерлер.
Ол сағыснаң Владимир Толстой чарасхан. «Мин санапчам, культура полза, экономика полар. Форумнаңар мин пастап Москвада искем. Хакасиядағы форум ырах сабланча, музейлер тоғызын чахсы пілчеткен специалисттер аны пӧзік паалапчалар. Республиканың музей-культура кіні прайзын хайхатча. Ізенчем, аны кӧрерге кізілер Хакасиядаң паза хонҷых регионнардаң на нимес, Москвадаң паза Санкт-Петербургтаң даа килерлер», - таныхтаан чооғында ол.
Чоох тутхан соонда, Хакасияның пазы Виктор Зимин Владимир Толстойны музей-культура кінінең таныстырған. Улуғ турада ідӧк концерт залы, олған кіні, ресторан тоғынарлар. Амды анда ікі кӧзідіг тоғынча. Республиканың визитнай карточказы - обаалар - Владимир Ильичтің кӧңніне тың кірче. Олардаңар президенттің советнигіне Л.Р.Кызласовтың адынаң чир-суғ ӱгренҷең музейнің директоры Андрей Иосифович Готлиб чоохтап пирген. Обааларның хыринда музей тоғынҷылары «Хакасия Россия хоосчылары хараанаң» кӧзідіг тимнеп салтырлар. Хоосчылар Виталий Кызласовтың, Сергей Бондиннің паза Сергей Карловтың чайаачы тоғыстары прайзының хайиин тартхан.
Республиканың музей-культура кіні парда, Хакасияның устағ-пастаа Санкт-Петербургтағы музейлерде хайраллалчатхан пістің экспонаттарны нандыра айландырарға сағыс тутча. Оларның пӧгіннері чуртасха кирілзе, пістің мындағы музей тың пайып парарына ікінҷілес чоғыл.
«Музейлер паза культура индустриялары - алнындағыларның стратегиязы» секцияның тоғызы ікі пӧліктең пӱткен. Пастап музей тоғынҷылары докладтар истіп алғаннар. Искіріглер тимнеен специалисттер музейлерге ахчаны хайдағ оңдайнаң тоғынып алардаңар чыылған чонға чоохтааннар. Ростовтағылар чапсых сувенирлер паза пряниктер тимнеҷең ӧнетін керамика чардыҷахтарын сатчаттырлар. Хайди таныхтаан «Ростовский Кремль» музейнің устағҷызы Наталья Каровская, андағ оңдайнаң олар парыс итчелер, устарға хоза тоғыс таапчалар. Татарстандағы «Остров-град Свияжск» музей чыл сай театр лабораторияларын иртірче. Директор Артем Силкиннің чооғынаң, мындағ чӧрім сылтаанда, музейде кӧрігҷілернің саны ӧсче. Бахрушинскай музей Москва облазындағы Зарайск городта фестиваль иртірче, хайзын-да саблығ артисттер хынып араласчалар. Хырығ озаринаң килген специалисттернің докладтары ідӧк тузалығ полғаннар. Канададаң килген профессор Лидия Варбанова музейдегі менеджменттеңер чоохтап пирген. Маттиас Хенкель, ол Берлинде чуртапча, полған на музейнің позының «сырайы» поларға кирек тіп таныхтаан. Анаң специалист хайди брендті тӧстирге кирек тіп чоохтап пирген.
Секцияның ікінҷі чардығында Хакасияның музей тоғынҷылары, нинҷе-де ӧмее чарылып, Россияның хоос академиязының теория паза изобразительнай искусство НИИ-зының директоры Наталья Толстая тимнеен чахығларны толдырғаннар.
«Музейлер паза культура индустриялары - алнындағыларның стратегиязы» секцияның тоғызы пӧзік синде ирткен, араласчылар постарына кӧп тузалығ ниме алып алғаннар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде