ААЛЛАРДА СТАРОСТАЛАР ТАБЫЛАР
01.07.2016
Хабарлар
Хакасия парламентi президиумының чыылии ирткен. Президиум чыылииның ӱзӱриине читі сурығ сығарылған, ол санда закон сығарҷаң ӱлгӱ органнарының ӱс закон проектіне ӱндезері. Чыылығны апарған республиканың Ӧӧркі Чӧп кнезі Владимир Штыгашев.
Ӱзӱріге сығарылған сурығлар аразында таныхтирға чарир "Хакас Республикада аалдағы старосталардаңар" наа закон проектін. Аны тимнеен республиканың национальнай паза территориальнай политика министерствозы. Чоохтирға кирек, пӱӱнгі кӱнде аалларның кӧбізінде староста пар. Олар аал чӧбі пазына аалдағы сурығларны пӧгерге полысчалар, че староста тоғызы тӧлелбинче. Закон хоостыра старосталар аал чуртағҷыларының чыылиинда табыл турар. Аның хайдағ оңдайларда тоғынарын, хайдағ тоғыс толдырарын муниципальнай пірігіс ӧнетін чарадығда кӧрер.
Национальнай паза территориальнай политика министрі Дмитрий Тодышевтің искіриинең, пӱӱнгі кӱнде Сибирьдегі федеральнай округта ӱс субъектте старосталардаңар закон тоғынча: Забайкальскай, Алтай крайларында паза Кемеров облазында. Муниципальнай пӱдістер старосталардаңар закон алыларына чӧпсінчеттірлер.
Олох туста Хакасия парламентінің кнес орынҷызы Сергей Комаровтың сурығ турыбысхан: закон проекті хоостыра староста тоғызын тӧлирге ахча муниципальнай пӱдістің бюджедінең пирілер, ахчазы чидіспинчетсе, республика хайди ағаа полызар? Аннаңар хайдағ даа наа закон проектін ӱзӱреріне депутаттарға тус пирілче, аны тимнееннер ідӧк сурығларны істесчелер. Наа законны сентябрьдағы сессияның ӱзӱриине тимнирге чарадылған.
Ідӧк президиум Хакасия пазының чӧбін депутаттар ӱзӱриине сығарарға чаратхан. Ол промышленнай палых тударын паза аквакультураны сыныхтағда тутчатхан Россия акттарына алынҷа алызығлар кирердеңер закон проектінең Хазна Думазынзар сығарға чӧптепче. Сурығ, тізең, суғ-кӧллерде палыхтирға паза палых ӧскірерге чаратпинчатхан кирексіністерні хызырарынаң палғалыстығ. Республика пазы чӧбінең депутаттар чарассалар, Ӧӧркі Чӧп Хазна Думазынзар закон проектінең сығар.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде