РОССИЯНЫҢ КУЛЬТУРА МИНИСТРІ НАА МУЗЕЙДЕ ПОЛ ПАРДЫ
05.07.2016
Хабарлар
ХАКАСИЯДА ИРТЧЕТКЕН «СИБЕР ИЛ» ЧОННАР АРАЗЫНДАҒЫ КУЛЬТУРА-ТУРИСТ ФОРУМЫ ЧЫЛ САЙ КӦП ААЛҶЫ ЧЫЫПЧА. ПӰӰЛ ФОРУМНЫҢ ТОҒЫЗЫНДА ПАСТАҒЫЗЫН НА РОССИЯНЫҢ КУЛЬТУРА МИНИСТРІ ВЛАДИМИР МЕДИНСКИЙ АРАЛАСХАН. ВЛАДИМИР МЕДИНСКИЙ ХАКАСИЯ ПАЗЫ ВИКТОР ЗИМИННЕҢ ХАДА РЕСПУБЛИКАНЫҢ МУЗЕЙ-КУЛЬТУРА КІНІНДЕ 1 ИЮЛЬДА «КУЛЬТУРА РЫНОКТАРЫ. САҒЫСТАР ЭКОНОМИКАЗЫ. БАЛТИКАДАҢ АМЫР ТИҢІСКЕ ЧИТІРЕ» СУВЕНИРЛЕР КӦЗІДИИН АСХАН.
Пастап Виктор Зимин чоох тутхан, ол Россияның культура министріне республиканың наа музей-культура кінін пӱдірерге полысхан ӱчӱн улуғ алғызын читірген. Хакасияның пазы теен: «Россияның археологиязы пістің республикадаң пасталған, пістің культурабыс паза тархыныбыс пай, аннаңар наа музей піске хайди даа кирек. Алғыс Сірерге удур парған ӱчӱн».
Анаң сӧс культура министрiне Владимир Мединскийге пирілген. Владимир Ростиславович таныхтаан: «Санапчам, улуғ музей-культура кіні Хакасияның культуразының тилізіне улуғ хозым идер. Виктор Михайловичей музейні паза культура кінін пірге идібізер сағызы пістің кӧңнібіске кірген, аннаң Россия президенті Владимир Путин чарасхан. Сағам пістің алныбыста ӱс хадыллығ сіліг тура турча. Ізенчем, музей-культура кіні турыстыра тоғынар, кізілер палаларынаң хада пеер хынып кил турарлар».
Сувенирлер кӧзідиин азарында араласханнар: Хакасияның Оӧркі Чӧп кнезі В.Н. Штыгашев, Россияның Хазна Думазының депутады Н.С, Максимова, Хакасияның Федерация Чӧбіндегі кізізі В.А. Петренко, Хакасиянын, Ӧӧркі Чӧптің Федерация Чӧбіндегі кізізі Е.А.Серебренников, республиканың культура министрi С.А.Окольникова,
Таныхтирға кирек, сувенирлер фестивальы пайрамни азылған. Хакас филармониязы паза республиканың театрлары улуғ нимес ойын тимнеп салғаннар. Че прайзын «Час ханат» олғаннар студиязының паза «Хулунах» театр школазының кічіг артисттері аптааннар. Оолағастар паза хызыҷахтар музей-культура кінінің алнындағы ачыхта хакас чонның кибірли тігілген кип-азаан кӧзіткеннер.
Виктор Зимин Владимир Мединскийні республиканың музей-культура кінінең таныстырған. Федеральнай ах-чаа пӱдірілген тура Россияның культура министрінің кӧңніне кірген. Ідӧк Владимир Ростиславович анда тоғынчатхан прай кӧзідіглерні кӧріп алған.
Сувенирлер фестивальы форум тузында пастағызын на ирткен, аның тоғызында Россияның 19 музейі араласхан. Иң пурун кӧрігҷілерні Санкт-Петербургтаң килген музей тоғынҷылары удурлааннар. Олар Эрмитажтың, Петергофтың, Царское Село паза Орыс музейлернің магниттерін, блокноттарын, чазанҷыхтарын сатханнар. Москвадаң фестивальда Россиядағы декоративно-прикладной паза чон искусствозының музейі паза Дарвиннің музейі араласханнар. Оларның чапсых сувенирлерін кізілер хынып алғаннар. Находка городтаң килген аалҷыларның тюлень формалығ иділген сығыртостары прайзының хайиин тартхан. Сустағылар, тізең, фестивальға орыс чонның кибірли тіккен кип-азаан ағылтырлар.
Хакасияның устары алынҷа одырғаннар. Оларның поғоларын, кӧклӧҷектерін, сӧӧктең иткен панноларын, аймах-пасха тудынҷахтарын, хузух ағазынаң кирткен типселерін паза чірчелерін кӧрігҷілер ідӧк матап садысханнар. Кӧзідіг тузында пістің чайаачыларыбыс кізілерге мастер-класстар иртіргеннер, анда улуғлар даа, кічіглер дее хынып араласханнар. Кӧзідімге, Зульфия Топоева нинҷідең поғолар идерге ӱгреткен, Людмила Чаптыкова - теердең чазанҷыхтар, Екатерина Фирсова - кӧклӧҷектерні хоостирға.
Олох кӱн республиканың музей-культура кінінде «Хакасия Россия хоосчыларының кӧрізінең» хоостар кӧзідии азылған. Пӱкӱлее алза, хоостар ӱс темаа чарыдылғаннар: Хакасияның хайхастығ чир-чайааны, пай тархыны паза чайаачы кӧңніліг кізілері. Кӧрігҷілернің хайиин иң пурнада саблығ Дмитрий Каратановтың хоостары тартханнар, олар Л.Р. Кызласовтың адынаң чир-суғ ӱгренҷең музейнің чыындызынаң алылтырлар. «Аңҷылар» хоосты Дмитрий Иннокентьевич карандашнаң 1926 чылда чайаптыр. Матырларның кӧңнілерін паза Хакас чирінің сілиин хоосчы уғаа чахсы кӧзіт пирген.
Андрей Топоевтің, Михаил Бурнаковтың, Георгий Сагалаковтың, Владимир Новоселовтың, Александр Доможаковтың, Сергей Карловтың, Виталий Кызласовтың, Сергей Бондиннің тоғыстарын кізілер ідӧк матап кӧрглеп парчатханнар. Кӧзідіге музей тоғынҷылары В. Кызласовтың паза А.Доможаковтың «сибирскай неоархаика» стильде чайаан хоостарын таллап алтырлар. Сергей Бондин олох стильде тоғынча, че ол, хоостапчатса, сырлар орнына чирнең тузаланчаттыр. Саяногорскта чуртапчатхан Сергей Карлов мозаиканаң айғасча. Пастап ол «флорентийскай мозаика» техникаҷа тоғынған, че сағам позы сағын таап алған «рельефнай мозаиканаң» чайапча. Аның тастаң иділген хоостары прайзының кӧңніне кіргеннер.
Ідӧк килген чон музей-культура кінінде сыбыра тоғынчатхан обаалар кӧзідиин кӧріп алған. Прай кӧзідіглер 1 июльдаң сығара 3 июльға теере тоғынғаннар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде