ТАРХЫН ПАЗА КУЛЬТУРА - ПІСТІҢ ӦӦН ИС-ПАЙЫБЫС
05.07.2016
Хабарлар
Хакасияда 30 июньда «Сибер Ил» VI чоннар аразындағы культура-туризм форумы пайрамнығ азылған. Кибірли Бабик суғ хыриндағы ачых чирде иртчеткен официапьнай чардыхха улуғ аалҷылар кипгеннер.
Форумны азарында аарластығ аалҷылар араласханнар. Оларның аразында Россия президентінің культураҷа паза искусствоҷа советнигі Владимир Толстой, Федерация Чӧбінің наукаҷа, ӱгредігҷе паза культураҷа комитедінің кнес орынҷызы Сергей Рыбаков, Татарстан Республиканың президенті Рустам Минниханов, Хакасияның Ӧӧркі Чӧбінің кнезі Владимир Штыгашев, Хазна Думазының депутады Надежда Максимова, Ӧӧркі Чӧптің Россия Федерация Чӧбіндегі кізізі Евгений Серебренников, Россияның пасха хан чирі киректерінҷе паза арачыланыс министерстволарының, Хыдаттаң, Германиядаң, Канададаң килген делегацияларның кізілері полғаннар.
«Сибер Ил» форумны азып паза аның тоғызын алғап, Хакасияның пазы Виктор Зимин чоох тутхан.
- Пӱӱлгі форумда араласчыларның саны паза географиязы пілдірте алғыдыл парған, - таныхтаан ол. - Анзы «Сибер Ил» форум кӧдірчеткен сурыға, тархын паза культура ис-пайын хайраллирына кӧптең кӧп хайығ тартыл сыхханын киречілепче. Олох туста пістің аалҷыларның хайиин тархын паза культура ис-пайынаң позы Хакасия тартыпча. Республиканың археология, чир-чайаан паза культура ис-пайы уғаа чапсых. Анзын ученайлар, практиктер паза хоосчылар киречілепчелер. Россия археологиязының прай даа тархыны Хакасия чирінең пасталған. Культура - ол экономиканы, политиканы паза социальнай сфераны піріктірчеткен кӱстіг ис-пай.
Виктор Зиминнің чооғынаң, форум кӧп саннығ проекттерге чуртас пирген. Оларның санында тархын памятниктерін хайраллиры, республиканың Россиядағы улуғ музейлернең пірге тоғызы, культура ис-пайы объекттерін сабландырары, музей-культура кіннің пӱдірии паза регионның туризм паза транспорт инфраструктуразының тилізі.
Россия президентінің советнигі Владимир Толстой «Сибер Ил» форумның тузалығ тоғызын таныхтаан.
- Хакасиядағы форум чылдаң чылға піске наа сағыстар пирче, - теен Владимир Толстой. - Ӧӧні - мында алылчатхан чарадығлар чуртасха кирілчеткені. Хакасия пip ле хати нимес таныхталған, Россия археологиязының тӧреен чиріне саналча. Аннаңар мында тархын ис-пайын хайраллирына улуғ хайығ салылчатханы ӧріндірче. Хазнаның устағ-пастаа культура политиказына улуғ хайығ салча. Минің кӧрізімнең, ол - орта чол паза геополитика чидіглерінің тӧстее.
Татарстанның президенті Рустам Минниханов позының чооғында піс арғыстар ла нимеспіс, піс харындастарбыс тіп таныхтаан.
- Татарлар паза хакастар - туған чоннар, - теен Минниханов. - Пістің республикада сірернің чир-суғҷыңар, тӱрк тіллерінің саблығ істезігҷізі Николай Фёдорович Катановтың сӧӧгі чатча. Татар паза хакас тіллері уғаа тӧӧйлер. Сағынчам, мин ӱс айға ла сірернің тілні ӱгреніп аларҷыхпын. Тиктең нимес сірерні хаҷан-да «Минсуғдағы татарлар» тіп адааннар. «Сибер Ил» форумда Татарстан паза Хакасия пірге тоғынардаңар чӧптезіг идерлер. Мыннаң мындархы форумнарда Татарстан делегациязы хайди даа аралас турар, анзына мин сӧс пирчем. Татарстанның президенту прайзын Республика кӱнінең паза Тун пайрамнаң алғыстап, чооғын тоосхан.
Федерация Чӧбінің наукаҷа, ӱгредігҷе паза культураҷа комитедінің кнес орынҷызы Сергей Рыбаков позының чооғында Хакасияда хаҷан даа полбаанын таныхтаан. Пастағы чорых аның кӧңнін кӧдіртір, чапсыттыр.
- Піске тархын-культура ис-пайы чидіспинче, -таныхтаан ол. - Тархын паза культура пістің ӧӧн ис-пайыбыс полчатханын піс кӧместең ундут сыххабыс.
Аннаңар Рыбаков, республиканың устағ-пастаа пу сурыға хайығ айландырчатханын махтап, форумның улуғ тузазын таныхтаан.
Автор :
Наталья СУБРАКОВА, Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде