КУЛЬТУРА ЭКОНОМИКАДАҢ ТӦБӀН ТУРБАСХА КИРЕК
05.07.2016
Хабарлар
Форумның пленарнай чыылии «Культура сферазындағы индустриялар» сурыға чарыдылған. Чыылығны хоосчы. дизайнер, архитектор, «Россия-Культура» телеканалның ведущайы Алексей Бегак апарған.
Азых чоохтазығда форум араласчылары амғы туста культура коммерциянаң пик палғалыс париғанын ӱзӱргеннер. Пілдістіг, искусство инвестициялар чох чуртап полбас. Ағаа хоза, тархын-культура ис-пайының объекттері хайдағ-да парыс ағыларға кирек, чуртап парыбызар ӱчӱн. Че олох туста музейлер менеджментінің паза садығның аразында хайдағ-да хырығ поларға кирек тіп сағысха килгеннер эксперттер.
Россия президентінің хайииндағы Россияның чон хонии паза хазна службазы академиязының профессоры Ольга Астафьева піс кӱннің сай аймах-пасха культураа тоғасчатханыбыстаңар чоохтаан. Кӧзідімге, «Сибер Ил» форумда прай даа ниме хакас национальнай культураны кӧзітчеткенін таныхтаан.
Форумның ӧнетін аалҷызы, киноактёр, кинорежиссер Михаил Пореченков Россияның артисттері апарчатхан полызығлығ тоғыстаңар чоохтаан. Олар регионнардағы театрларға хабазарға, таланттығ олғаннарны таап аларға, актер оңдайларын тилідерге кӱстенчелер.
Россияның арачыланыс министерствозындағы культура управлениезінің пастығы Антон Губанков армия культуразын тарадарынҷа паза чииттерні патриотизмге ӱгредерінҷе апарылчатхан тоғыстың опыдынаң ӱлескен. Арачыланыс министерствозы ол пӧгіннең, регионнарда чааҷы музейлерін тӧстирінең пасха, аймах фестивальлар иртірчеттір. Мода аналитигі Александр Хилькевич мода индустриязынаңар чоох апарған. Амғы кип-азахтарда аймах чоннарның кибірліг хоостары тузаланылчатханынаңар чоохтаан. Кӧзідімге, пӱӱн ипчілер аразында модаа Египет кірчеттір, кип-азах ӧңінең дее, сырланар оңдайнаң даа.
Пӱӱлгі «Сибер Ил» форумда чоннар аразындағы туризмні тилідеріне хайығ салылған. Форум араласчыларының пірсі Хыдаттың туризмні тилітчең департаментінің директоры Ши Лэй полған. Пленарнай чыылығда ол «Туризм сферазындағы индустриялар: Хыдат Чон Республиказының опыды» сурығнаң чоох тутхан. Хайди ол таныхтаан, Хыдат туристтері хаҷанох Россиязар кил парчалар. Ӧӧн турлар Москва паза Санкт-Петербург городтарҷа иртчеттір. Че амды Хыдатта Россияның пасха чирлерінең танызарына кирексініс пар осхас. Аннаңар Хыдат тур операторлары наа чоллар паза наа тынанҷаң орыннар тілирінең айғасчаттырлар. Ши Лэй Хакасия Хыдат туристтеріне иң пурун пурунғы хумартхы тастарынаң паза сіліг чир-чай-аанынаң хынығ поларынаңар чоохтаан. Форум соонаң ол Хыдаттың туроператорларының хайиин Хакасияа тартарынҷа тоғынарбын тіп молҷаан.
Москвадағы музейлерні тилітчең кіннің аналитигі Михаил Гнедовский чооғында, музейлердеңер паза культура индустрияларынаңар чоохтап, культураа асхынах хайығ полғанын таныхтаан. Че халғанҷы туста ӱлгӱлер, кӧрістерін алыстырып, культураа хайығ сал сыхтылар тіп чоохтанған ол. Гнедовский мында Хакасияның пазы Виктор Зиминнің чооғын кӧзідімге ағылған: «Культура чох экономика чох поларын мин оңарчам». Хакасияның устағҷызын махтап, ол культура хаҷан даа экономикадаң тӧбін турбасха кирек тіп таныхтаан.
Автор :
Наталья СУБРАКОВА, Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде