«ПАЙ СИБИРЬ» ААЛҶЫЛАРНЫ ЧАПСЫТХАН
05.07.2016
Хабарлар
Наталья БОРГОЯКОВА (сол саринда) паза Оксана БУРНАКОВА
Форумның ӧӧн чардығы 30 июньда «Гладенькая» спорт-отельде аалҷыларны «Пай Сибирь» бизнес-миссиянаң удурлаан. Пасха хан чирлерінең, Россияның аймах регионнарынаң килген улуғ аалҷылар орындағы ас-тамах аймаанаң танысханнар. Бизнес-миссияда аралазар ӱчӱн, ас-тамах сығарчатханнар аразында ӧнетін марығ ирткен. Чоннар аразындағы форумға иң артыхтары таллалған тізе, саба полбас сағынчам. Олох туста бизнес-миссияның ӧӧн пӧгіні толдырылған - аалҷыларға Сибирьнің пайы чахсы кӧзіділген.
Аалҷыларның иттең, сӱттең, палыхтаң тимнелген ас-тамахты амзап алар оңдай полған. Идінҷек Александр Зубарев колбасалар паза хурутхан ит сығарған, «Елисей» палых компаниязы - аймах оңдайнаң тимнеен палыхтарны, «Сыродел» ООО - сырларны паза сӱттең тимнеен пасха ас-тамахты.
Кӧзідіг парчатхан орынның пip столында аалҷылар илееде чыылыс партыр. Чағын пастырғанымда, талған сығарылған кӧзідіг позынзар улуғ хайығ тартыпчаттыр. Наталья Боргоякова талған тимнирінең илееде чыллар айғас парир. Хакас чонның кибірліг ас-тамаа орыстар аразында даа сабланыснаң тузаланча. Бизнес-миссияа, тізең, идінҷек талғаннаң тимнелген халас, печенье, торт паза тоортхан тоғылағастар ағылтыр. Нымырттығ, мӧӧттіг, аймах чистектіг талған шариктері аалҷыларның кӧңніне кіртір. Садығҷы Оксана Бурнакова талғанның тузазынаңар чоохтап турған.
Чоохтирға кирек, форумда пасха хазнадаң килгеннер илееде полған, ол санда Хыдаттаң паза Индиядаң. Олар хакас чонның ас-тамаанаң танызарға сағынчатпастар ба. Москвадаң, Санкт-Петербургтаң килгеннерні дее талған чапсытхан. Идінҷек Наталья Боргоякова талған улуғ сабланыснаң тузаланғанына ӧрінген.
Кӧзідігнің иң пазында «Таштыпское» потребительлер пірігізі аалҷыларны чейнең сыйлапчатхан. Аннаң пасха оларның тустаан палых оды, тартхан нымырт полған. Пірігіс кнезі Людмила Карелинаның чооғынаң, пірігіс 2015 чылның апрель айында Индіркі Ибігде тӧстелген. Пастағы чылда палых одынаң нымырт ла теергеннер, оларны республиканың аал хонии рыногында пӱӱл январь тоозылғанҷа сатханнар. Ідӧк пірігістің «Бодрость» чейі сабланча. Чейге он аймах от чыылған. Кізее хандыра кӱс пирчеткеннеңер, позының адына турысхан.
Ідӧк тайға ис-пайынаң ниме-нооларны сығарча «Абазинское промысловое хозяйство» ООО. Кӧзідіге хазың суу, аймах вареньелер сығарылған. Аалҷылар час торымнаң тимнелген вареньее хайығ айландырғаннар. Хоныхтың кізілері варенье чуртағҷыларның кӧңніне кірчеткенін таныхтааннар.
Идінҷек Светлана Лихоманенко, тізең, форумға наа ла чыылған мӧӧт ағылтыр. Алтай аалдағы чуртағҷы аарларны 1995 чылдаң сығара тутча. Мындох аның ирткен чылдағы гречка мӧӧді турча. Ол кӱрең ӧңніг. Пӱӱлгі мӧӧт састағы аймах оттардаң чыылтыр, аннаңар ол сарығ арах ӧңніг, аның тадии даа андағох татхыннығ.
«Пай Сибирь» бизнес-миссия «Гладенькая» спорт-отельде кӱн тооза полған. Аалҷылар кӧзідігде ӱзілбеен. Пірсі аны-мыны амзаан соонаң, ікінҷізі килче. Пір стол хыринда ӱсче кізі турыбыссох, пасхазына ол стол нименең пасалалчатханы хынығ. Іди полған на компания позының ас-тамаана хынған кізілерні тапхан. Ізіг кӱнде сусхум пазарға полысхан «Альпина» компанияның суғлары. Ол арада ӧӧн павильон алнында, От инені азырап, ирбен отнаң чонны аластап пастааннар.
Автор :
Альберт ТОЛМАШОВ, Наталья СУБРАКОВА Сомнар Максим АХПАШЕВТИ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде