АМЫР ЧУРТИРҒА САҒЫНЗАҢ, ЧААҒА ТИМНЕН
05.07.2016
Хабарлар
Хакасияда 1 июльдаң 170-ҷы зенитнай ракеталығ полк чаа дежурствозына турыбысхан. Ол полк ам Ағбандағы гарнизонда полар. Чааҷыларның пу частьы Россияның арачыланыс министрі Сергей Шойгуның алынҷа приказынаң пылтыр 1 декабрьда тӧстелген. Хакасия пазы Виктор Зиминнің сурынызы хоостыра полк республикада тӧреміл турар.
Полкты дежурстваа турғызар кӱнде Ағбан - Ах тобырах чолның 20-ҷі километріндегі чазыда устағҷы чон толдыра чыылыс парған. Пу мероприятиеде Хакасияның Ӧӧркі Чӧп кнезі Владимир Штыгашев, Хакасия пазының орынҷызы Владимир Крафт, Хакасияҷа ӧӧн федеральнай инспектор Виктор Чернышев, Россияның Федерация Чӧбінің арачыланысча паза безопасностьча комитет кнезінің пастағы орынҷызы Евгений Серебренников, Саяногорсктың пазы Леонид Быков паза чааҷыларның улуғ пастыхтары араласханнар.
Наа тӧстелген 170-ҷы зенитнай ракеталығ полк Центральнай чаа округының Чаа-кии кӱстерінің (ВВС) паза кииде арачылаҷаң (ПВО) 14-ҷі армиязының ПВО-ның 41-ҷі дивизиязына кірче, аның командирі - полковник Иван Сибиряков. Полк Хакасияның, Туваның, Хызылчар крайының ӱстӱнзархы чардығының киизін ыырҷыдаң хадарар. Полкка С-300 ПС ракеталығ ікі дивизион кірче. Чазыда амды локаторлар турчалар, чааҷылар чазыдох палаткаларда чуртапчалар. Анда имнег пункты, столовай пар. Мыннаң мындар Хакасия правительствозының полызиинаң анда амғы тусха килістіре чааҷыларға чуртаҷаң, служба апарҷаң городок пӱдіріл парар.
Тӧстелген полктың чааҷыларын чаа дежурствозын апарарға позыдар пӧгіннең, пӱӱл 30 мартта Астрахань облазындағы Ашулук полигонда ракеталарнаң атыстар ирткен. Чааҷылар расчеттары «ыырҷының» учухчатхан аймах объекттері полчатхан прай таңмаларны орта атханнар.
Советтер тузында пістің чирібісті кииде арачылаҷаң мындағ полк Саяногорскта турған. Аның чааҷылары, офицерлері, запаста полып, ам даа анда чуртапчалар. 1992 чылда, пістің хазнада экономика саринаң киректер уйан пар сыхханда, ол полкты дежурстводаң суурыбысханнар. Амға теере хазнаның Хакасиядағы улуғ объекттері арачыланыс чох халған полтырлар. Хайди чоохтаан ВВС паза ПВО-ның 14-ҷі армия командующайының орынҷызы генерал-майор Андрей Шемелев, амды Хакасияның, Туваның, Хызылчар крайының ӱстӱнзархы чардығының киизі ізестіг хадарылар. Мында чааҷыларға служба апарарға прай кирек техника, оборудование пар, тиріглер нааҷылал турарлар. Чааҷыларға служба апарарға истіг оңдайлар пирілер.
Полкты чаа дежурствозына турғызар мероприятие пайрамни ирткен. Килген прай устағҷылар, чоох тудып, чааҷыларға службаны мыннаң мындар турыстыра апарарға алғааннар. Владимир Штыгашевтің чооғынаң, Ӧӧркі Чӧп прай кӱзінең чааҷыларға служба апарарға чахсы оңдайлар пирерге кӱстенер. Россияның арачыланыс министрі Сергей Шойгу, кӧп чыллар Хакасияда тоғынып, республикаа улуғ хозым иткен. Аннаң піс поғдархапчабыс.
Евгений Серебренников чооғында таныхтаан: «Амыр чуртирға сағынзаң, чааға тимнен». Аннаң прайзы даа чарасхан полар. Пістің хазнабыс, тирігліг кӱстерібіс, армиябыс кӱстіг ле полза, піс алынҷа пос хазна полып чуртирбыс.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде