ШОС: КУЛЬТУРАДАҢ ЭКОНОМИКАА ТЕЕРЕ
06.07.2016
Хабарлар
Сол саринаң: Владимир ЛЕПЕХИН, Ольга АСТАФЬЕВА паза Андрей МАРГОЛИН
Сағынчазар, хайдағ оңдайнаң Хакасия паза пасха регионнар Шанхайдағы палғалыстар организациязының (ШОС - авт.) тоғызына теелче? Пу сурыға нандырығны "Сибер Ил" форумдағы ШОС-тың регионнар аразындағы палғалыстарны тилідерінҷе сессия тоғызында таап аларға чарир полған. Сессия тоғызында учёнайлар, устағҷылар араласханнар. Аның тоғызынаң устаан Ольга Астафьева. Философия наукаларының докторы Россия президентінің хайииндағы чон хонии паза хазна службазы академиязының профессоры полча. Пу академияның проректоры, экономика наукаларының докторы, Россияның саблығ экономизі Андрей Марголин сессияны апарған.
Ольга Николаевна Россияның пасха хан чирі киректерінҷе министерство кізізі Дмитрий Лукьянцевке пастағы сӧс пирген. Дмитрий Евгеньевич ШОС-тағы хазналар аразындағы чӧптезігде-хартияда палғалыстар кӧстеглерінің пірсі культура полчатханын таныхтаан. Прай хазналар палғалыстарда культураның тузазын пӧзік паалапчалар. Аннаң пасха Россия регионнар аразында туризмні тилідеріне улуғ хайығ айландырча. Ол кӧстегҷе тоғынары ШОС-тың 2025 чылға теере тиліс стратегиязында кӧріл парған, хайзы пу наада Ташкенттегі саммитте алылған.
- Улуғ алғыс Хакасия правительствозына, культура министерствозына, "Сибер Ил"" форумны иптіг иртірчеткеннері ӱчӱн, аалҷыларны чылығ удурлапчатханнары ӱчӱн! - алғыс сӧстерін читірген Дмитрий Лукьянцев.
Пастағы искірігнең сессия араласчыларынзар Ольга Астафьева сыххан. Ол Хыдат Чон Республиказының туристтеріне Ульяновск облазы нименең хынығ поларынаңар искірген. Олох туста пу опытта кластерлерге чарылған туризмнеңер чоохталған. Ноға Ульяновск хыдаттарға хынығ поларға кирек? Иң пастағызын, мында Владимир Лениннің тӧреен чирі, аннаңар кӧп танығлығ орыннар аның адынаң палғалыстығ (Хыдатта, тізең, социализм - авт.).
Ікінҷізін, кластер оңдайынаң танығлығ орыннарға тиң хайығ салылча, туристтерге хынығ чорыхтар тӧстелче паза тынанарға сағынчатханнарға искіріг пір орында пирілче. Ольга Николаевнаның таниинаң, пӱӱнгі кӱнде пасха хан чирлерінің паза Россияның чуртағҷылары пасха чирлерзер ниме-ноо алар алай бизнесті тилідер пӧгіннең не чӧрбинчелер, олар кемнең, хайдағ культуралығ кізінең тоғынчатханнарын пілерге сағынчалар.
Хынығ танығлар иткен позының искіриинде Андрей Марголин. Аның искірии ШОС-ха кадрлар тимниріне теелген, че искіриин пасха сурығлардаң пастаан. Полған на тании Лао Цзының хыйға чоохтарынаң палғалыстығ полған. Оларның пірсі таңдағызына, мыннаң мындархы чуртасха теелген. Лао Цзының чооғынаң, прай нимені азынада ухаанҷылап аларға чарир, че мыннаң мындархы чуртасты чарабас. Андрей Маркович мыннаң мындархы чуртасты пос хынғанни тӧстирге чарир тіп санапча. Аннаңар ШОС-тың мыннаң мындархы тилізінең чахсы тоғынарға кирек тіпче. Ол, ідӧк эксперттернің чӧптері пічікте ле халбас ӱчӱн, кізілернің сағызын алыстырарға киректелчеткеннеңер чоохтаан. Кізі иң кирек нимелернең чуртапча: уйғунаң паза азыранғанынаң. Че аның чуртасха хайии алызар ӱчӱн, ағаа культураны пастағы орынға турғызарға кирек. Пу паза пасха сағыстарға тӧстеніп, ШОС-ха наа кадрлар тимнелерге кирек.
Минің кӧңніме кірген Владимир Лепехиннің искірии. Ол Евразиядағы экономика пірігізінің ӧӧн директоры, Россияның наукалар академиязының Евразиядағы интеграция сурығларынҷа наука чӧбінің бюро кізізі, философия наукаларының кандидады полча. Ол интеграцияны пиктирінде чоннарның тузазын таныхтаан. Интеграция - ол чоннар аразындағы хайызығлар, хайзында культуралар аймаспинчалар. Анда полған на чон позының культуразынаң чуртапча. Ac саннығ чоннар улуғ чонға пастырбинча.
Владимир Анатольевич ШОС-ха Евразиядағы ӧӧн сағыстарны тарадарға чӧптепче: тилекей аймах кӱстіг поларын, чоннарның кибірліг культуразын хайраллирын, пазығны, ол санда фашизмні, чаратпазын, кибірліг сӧбірее тудынарын паза цивилизациялар аразында проекттерні чуртасха кирерін. Проекттерні алза, мындағ кӧзідімнер пирілген: Олимп ойыннары осхас Евразия ойыннарын иртірерге, хайдар ат чарызы, кӱрес паза пасха кибірліг спорт кӧрімнері кирілер, Евровидение орнына - Евразвидение.
Владимир Лепехин ідӧк позының искіриинде тілге теелген. Пӱӱнгі кӱнде ШOC-тың ікі официальнай тіл - орыс паза хыдат. Пу тіллернең чоннар аразында тузаланғаны оларны хайраллирға полысча. Искірігҷінің кӧрізінең, киректелзе, оларға хоза пасха даа тілні аларға чарир.
Сессияда ідӧк Хыдаттың туризмні тилітчең департаментінің директоры Ши Лэй чоох тутхан. Аның чооғы Хыдатта паза хонҷых хазналарда туризм тиліпчеткеніне чарыдылған, ӧӧнінде Илбек торғы чолынаң паза Илбек чей чолынаң палғалыстығ чорыхтардаңар, хайзылары ідӧк Сибирь регионнарынҷа иртчелер.
Тиксі алза, сессия уғаа тузалығ ирт парған. ШОС - ол алты хазна аразындағы пірге тоғыс ла нимес, ол ідӧк хазна істіндегі регионнарны пасха хан чирлерінең піріктірче, сидік сурығларны пӧгерге хоза кӱс пирче, ол санда культурадағы паза туризмдегі, экономикадағы паза политикадағы. Сессияда, тізең, уғаа тузалығ сурығлар кӧдірілгеннер, хайзылары пічікте ле халбас сағынчам.
Республикадағы ученайлар пасха регионнардаң килген хыйғаларнаң сағыстарынаң ӱлескеннер. Олох туста "Сибер Ил" форумның улуғ аалҷылары республиканың ӱлгӱлерін, чуртағҷыларын чылығ удурлаан ӱчӱн алғыстааннар. Форумға килген чонға Хакасиянаң, аның саблығ культура паза тархын орыннарынаң танысчаң чахсы оңдай пирілген. Прайзы пістің республика хайхастығ орын полчатханын таныхтаан. Тиктең нимес хай пірее спикерлер "Сибер Ил" форумға чылдаң чылға кил парчалар.
Автор :
Наталья Субракова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде