МАРЫҒ ЧИҢІСЧІЛЕРІ ХАКАСИЯДАҢАР ФИЛЬМНЕР СУУРАРЛАР
06.07.2016
Хабарлар
Кино секциязының тоғызы уғаа чапсых пасталған - теелбектердең паза сарыннардаң. Хакасия театрларының артисттері іди «Кино в аспекте национальных и культурных особенностей регионов» секцияның араласчыларын удурлааннар. Совет фильмнеріндегі кӧглерге килістіре теелбектеніп, олар ретрошоу кӧзіт пиргеннер. Анаң улуғ торт сығарылған. Тортты кизер ӱлӱс форумның ӧнетін аалҷызы, театр паза кино актеры, кинорежиссер Михаил Пореченковха тӱскен.
- Кино - ол чуртас кизегі нимес, ол - пирог кизегі. Ол пісті тосхырча, - Альфред Хичкоктың сӧстерінең пастаан чооғын Хакасия искусствозының саблығ деятельі Татьяна Чаптыкова, кино секциязының тоғызын азып.
Россия кинематографиязының тархынын, киноларда суурынған хакас актерларны паза «Угрюм-река», «Печки-лавочки» осхас саблығ
фильмнерні суурған хакас сценаристтерні, кинооператорларны (Анатолий Заболоцкийні, Василий Кирбижековты) сағысха кирген соонаң, чоох Россияның саблығ артизі Михаил Пореченковха пирілген.
- Кинематография - ол саң осхас, хайзының полызиинаң тилекейге искірерге чарир: піс парбыс, піс улуғ хазнабыс паза пip чонмыс, - таныхтаан Михаил Пореченков. - Ол саңны саап, піс тилекейдегі искусство чазыларында постаңар искір полар оңдайлығбыс. Ол санда Хакасиядаңар, аның пос оңдайлығ культуразынаңар.
Пореченковтың чооғынаң, кино пастыра піс хазнабыснаң танызарға кирекпіс. Че анзына фильмнің худы пар поларға кирек.
- Піс совет тузын нинҷе дее хырыссабыс, че ол тустағы фильмнер иң чахсылар, - теен саблығ актер. - Оларның худы пар... Кино секциязы тоғызының ӧӧн чардығы пастағызын на иртчеткен «Место действия - Хакасия» фильмнер суурарына республика мэрии полған. Марығның араласчылары Хакасиядаңар документальнай паза ойыннығ кино тӧстирінҷе постың проекттерін арачылааннар. Республика марии тӧрт номинацияҷа чарлалған полған: «Иң чахсы документальнай кино», «Иң чахсы ойыннығ кино», «Иң чахсы хысха метражтығ кино», «Олғаннарға паза чиит улусха иң чахсы фильм». Утып алғаннарға фильм суурарына 150 муң салковай грант пирілер.
Авторларның проекттерін паалаҷаң жюриде Россияның саблығ артизі Михаил Пореченков, Россияның арачыланыс министерствозындағы культура управлениезінің пастығы Антон Губанков, «Нева-фильм» компанияның звукорежиссеры, Санкт-Петербургтағы кино паза телевидение университедінің доценті Марина Шейнман, «Невафильм» компанияның режиссеры, сценаризі Гелена Пирогова, Хакасия искусствозының саблығ деятельi Татьяна Чаптыкова паза пасхазы полғаннар. Республика марииның финалына 8 араласчы сыххан. Полған на авторға пизер минута ла пирілген. Пу тус аразына оларға, проекттерінең таныстырып, жюринің хайиин тартып аларға киректелген. Авторлар хайдағ фильм суурарға сағынчатханынаңар аймах оңдайларнаң таныстырғаннар. Кем-де, олаңай чоох тудып, фильмнің полтазын чарытхан, кем-де суурыл парған тимде кизектерні кӧзіткен.
Артас КАНЗЫЧАКОВ:
- Мин «Читіген» театрда видеорежиссер полчам. Ӱгренгем Санкт-Петербургтағы кино паза телевидение университедінде. «Тайғалығ саарсых чолда» фильмні суурар сағыс, Алексей Сагатаевтің чооғын хығырып алғанда, тӧреен. Ол аны пабазынаң истір. Ол чоох хоостыра сценарий пазыбысхабыс. Анда ахтар хызыллар аразында чаа соонаң ибзер айланчатхан ікі иреннеңер чоохталча. Олар, тайға арали парып, тӧреен Хакасиязар айланчалар. Марығда утып алғаныма ӧрінчем, сағынчам, чахсы кино суурыбызарбын.
Жюри, чӧптескен соонаң, марығның тӧрт чиңісчізін тапхан. Іди «Иң чахсы документальнай фильм» номинацияда ікі проект чиңісчі полыбысхан: «Хакасфильм» кинокомпанияның «Хакасияның чир-чайааны» (авторлар - Юрий Курочка паза Марина Канадакова)
паза РТС телекомпанияның «Хакасия - худайлар чирі» (авторлар - Михаил Мерзликин паза Дмитрий Паршин).
«Олғаннарға паза чиит улусха иң чахсы фильм» номинацияда «Ой хулунах» («Буланный жеребенок») фильмнің сценарийi утып алған (авторлар - Карим Тугужеков паза Алексей Бойченко).
«Иң чахсы ойыннығ кино» номинацияда «Читіген» театрның видеорежиссеры Артас Канзычаковтың «Тайғалығ саарсых чолда» проекті чиңісчі полыбысхан.
Авторларға 150 муң салковайға сертификаттарны актёр Михаил Пореченков паза Россияның арачыланыс министерствозындағы культура управлениезінің пастығы Антон Губанков читіргеннер. Таныхтирға кирек, марығ оңдайларынҷа авторларға фильмнерін пӱӱл ноябрьға теере суурыбызарға кирек.
Кино секциязының тоғызы «Невафильм» компанияның специалисттері Марина Шейнман паза Гелена Пирогова мастер-класстар иртіргенінең тоозылған. Олар Хакасиядағы режиссерларға фильмнерні хайди табыс-ӱннернең чазирдаңар чоохтап пиргеннер.
Карим ТУГУЖЕКОВ:
- Мин Томсктағы хазна университедінің студенті полчам. Алтынҷы курстабын, диплом тоғызын тимнепчем. «Ой хулунах» фильмні суурар сағыс хаҷанох тӧреен, ибінзер айланчатхан ой хулунахтаңар хакас чонның нымаан хығырып алғанда. Мин позым пасха чирде ӱгренчеткенімде, ибзер айланары тема мағаа чағын. Тӧреен чирімзер айпан килзем, чӱрекке истіг пол парча. Марығдаңар социальнай сетьтердең піліп алғам. Сах андох Ағбанзар Алексей нанҷыма искірібіскем.
Алексей БОЙЧЕНКО:
- Піс Каримнең хада, чӧптезіп, марығда аралазарға чаратхабыс. Минің суурар опыдым пар, алында «Юг Сибири» медиагруппада тоғынғам. Амды позым алынҷа тоғынчам. Сағынчам, Каримнең хада «Ой хулунах» фильмні чапчаң суурыбызарбыс, тузына тимде полар.
Автор :
Альберт ТОЛМАШОВ Сомнар Наталья СУБРАКОВАНИ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде