«СИБЕР ИЛ» СИБЕР ХАЙЫҒ КИРЕКСІПЧЕ
06.07.2016
Хабарлар
Хакасияда ирткен «Сибер Ил» VI чоннар аразындағы форум 1 июльда салтарлар итчең тегілек столнаң тоозылған. Халғанҷы чыылығда музей, кинематография, книга-издательство, СМИ, чииттер паза IT-технологиялары секцияларны апарған модераторлар тоғыс салтарларынаңар резолюцияларын искіргеннер.
Салтарлар итчең чыылығны Хакасия пазының пастағы орынҷызы Олег Нам асхан.
- Алты чыл мының алнында пасталған чоннар аразындағы форум пӱӱнгі кӱнде ӱзӱріглер апарҷаң азых орынға айлан парған, - теен Олег Нам.
- Форумның кирексінізі чылдаң чылға ӧсче, ай-мах-пасха чирлердең килчеткен араласчылар саны даа алғыпча. Пӱӱл піссер Канададаң, Япониядаң, Хыдаттаң, Азербайджаннаң, Белоруссиядаң аалҷылар килгеннер. Піске форумны наа синге сығарарға кирек полған. Сағынчам, пістің анзы киліс парған. «Сибер Ил» форумға Россия президентінің советнигі Владимир Толстой паза Россияның культура министрі Владимир Мединский кил парғаннар.
Россия президентінің хайииндағы Россияның чон хонии паза хазна службазы академиязының профессоры Ольга Астафьева Хакасияның правительствозына регионнарның социокультурнай тилізінең палғалыстығ сурыға тӧреміл хайығ салчатханы ӱчӱн алғызын читірген, пӱӱнгі кӱнде культура политиканаң паза экономиканаң ӧткін палғалыс тут сыхханын таныхтаан. Форумдағылар ӱзӱріглерде ӧткін араласханнар, сидіксіністерҷе пос кӧрістерінең ӱлескеннер паза оларны пӧкчең сағыстарын искіргеннер тіп чоохтаан ол. Кӧзідімге, ШОС-тың регионнар аразындағы палғалыстарын тилідерінҷе чыылығда ШOC хазналары аразында садығ палғалыстарын тыыдары ӱзӱрілген. Ідӧк Орыс география пірігізінің кізілері ШОС-тың чазы хазналарының халых пірігізін тӧстирдеңер чӧпнең сыхханнар.
Хакасия искусствозының саблығ деятельі Татьяна Чаптыкова кино секциязы хайди тоғынғанынаңар чоохтап пирген. Андағы араласчылар чыылығда чиит кинорежиссерларның сценарийлерін ӱзӱргеннер, анаң марығ чиңісчілерін тапханнар. Аның соонаң режиссерларға мастер-класстар иртірілген - хайди хоос фильмнерні табыс-ӱннернең чазирдаңар. Кино павильонында Санкт-Петербургтағы вузтарның ӱгретчілері паза оларның студенттері тоғасханнар. Чапсых полған секцияның тоғызында саблығ актер Михаил Пореченков паза Россияның арачыланыс министерствозындағы культура управлениезінің пастығы Антон Губанков араласханнары.
Коми Республиканың «ИТАР» ІТ-ассоциациязының вице-президенті Александр Селютин Хакасияда таланттығ специалисттер парын таныхтаан. Секция тоғызында пістің республиканың ІТ-специалисттері Хакасиядағы пічіктіг хайаны 3D форматта уғаа чахсы тимнеп кӧзіт пиртірлер. Анзынаң пасха Хакасия правительствозының аппарады паза телекоммуникация компаниязы аразында ӱс чӧптезіг иділтір. Компания Хакасияда ІТ-технологияларны тилідерге пӧгінче. Инвестициялар паазы - 150 миллион салковай.
Н.Ф.Катановтың адынаң Хакас хазна университедінде мода индустриязы ӱзӱрілтір. Чиит улус Москвадаң килген мода аналитигі Александр Хилькевичтің чооғын хынып истір. Книга-издательство секциязында хазнаның аймах регионнарында сығарылчатхан этнос литературазынаң танызары чапсых полтыр. Культура ис-пайын хайраллирында журналисттер хайдағ тоғыс апарчатханы СМИ-лар секциязында ӱзӱрілген. Андох «Сибирь территория надежд» регионнар аразындағы журналисттер марииның чиңісчілерін сыйыхтарнаң таныхтааннар.
- Форум, алты частығ пала чіли, ам даа позына сибер хайығ кирексіпче, - теен дизайнер, архитектор паза телеведущай Алексей Бегак. - Культураны тилідері - уғаа улуғ тоғыс. Ағаа сибер хайарға кирек. «Сибер Ил» концерттерге пай паза кӧп артист араласчатхан олаңай ла сіліг мероприятие нимес, ол чуртағҷыларның сағыс-кӧрізін алыстырча паза Хакасияда культура москвадағызынинаң тӧбін нимес тиліпчеткенін кӧзітче.
Секциялар устағҷылары Хакасияның пазағы форумнарына пӧгіннер турғыс салғаннар. Кӧзідімге, республика культура ис-пайы объекттерінзер чидер чолларнаң палғалыстығ сурығны пӧк саларға кирек, Россияның пасха регионнарындағы паза хырығ озариндағы туристтернің хайиин тартар ӱчӱн.
Хакасия пазының пастағы орынҷызы Олег Нам, тегілек стол чыылиин тоозып, «Сибер Ил» форумда араласханнарға, Россия правительствозына паза хазнаның культура министрі Владимир Мединскийге алғызын читірген.
Автор :
Иван ТИННИКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде