МАРИИНСКАЙ ТЕАТРНЫҢ «ЧЫЛТЫСТАРЫ» - АҒБАНДА
06.07.2016
Хабарлар
Ағбанда 3 июльда городтың ӧӧн ачығында Хакас Республиканың 25 чылына чарыдылған хайхастығ концерт ирткен. Постарының чайаачызынаң Мариинскай театрның опера ырҷылары ӧріндіргеннер.
Хакасияда мындағ концерттер республика ӱлгӱлерінің кӱстенізінең иртірілчелер. Пастағы май площадьында опера ырҷыларының концертi пастағызын на 2011 чылда ирткен. Андада чон алнынзар саблығ Хосе Каррерас паза Татьяна Павловская сыхханнар. 2012 чылда чуртағҷыларны чайаачыларынаң Дмитрий Хворостовскийнең Паата Бурчуладзе ӧріндіргеннер, 2013 чылда кӧрігҷілер Ванесса Мэйнің скрипканаң ойнаанын истіп алғаннар. Пӱӱл, тізең, Ағбанның ӧӧн ачығында саблығ Мариинскай театрның ырҷылары Василий Герелло, Татьяна Павловская, Аскар Абдразаков паза Мария Баянкина сарнааннар, Хакасияның симфоническай оркестрінең Италияның саблығ дирижеры Олег Каэтани устаан.
Концерт пасталар алнында, Хакасия культуразының саблығ тоғынҷызы Галина Фертих республика пазы Виктор Зиминнің айланызын хығыр пирген: «Аарлығ арғыстар, 3 июльда 1991 чылда Хакасиянын, тархынында наа страница азылған, Россияның субъекті полып, республика 25 чыл позы экономика, социальнай паза политика сурығларын пӧгіп, тиліпче. 25 чыл аразына піс кӧп чидіглерге читкебіс. Амды Хакасия - хайда кӧп нациялығ чон ынағ чуртапчатхан чир. Санапчам, пістің ӧӧн чидіглерібіс ам даа алнында. Аарлығ арғыстар, алғыстапчам сірерні Республика кӱнінең!»
Алғыстас сӧстері соонаң, Пастағы май площадьына толдыра ыр-сарыннар чайылғаннар. Мариинскай театрның артисттері «Богема» «Дон Жуан», «Фауст», «Адриана Лекуврер», «Джудитта» операларның ӱзіктерін толдырғаннар. Ідӧк программада орыс паза пасха хан чирлерінің саблығ композиторларының сарыннары полғаннар.
Полған на ырҷыны кӧрігҷілер чылығ удурлааннар. Россияның чон артизі Василий Герелло прайзының кӧңніне кірген. Саблығ баритон чуртағҷыларны Республика кӱнінең алғыстаан, Санкт-Петербург городтаң чолабит читірген. Россияның саблығ артизі Татьяна Павловская пістің кізілерге чахсы таныс, Хакасиязар чайаачы ипчі тӧртінҷі хати килді, аның сопранозы чыылған чонны аптаан. Башкортостанның чон артизін Аскар Абдразаков тилекейдегі иң артых опера театрларында сарнапча. Концерттің араласчыларының аразында иң чиит Мария Баянкина полған. Ол 2010 чылдаң сығара Мариинскай театрда істенче. Мариинскай театрның артисттері алынҷа сарнааннар паза дуэттернең сыхханнар.
Пістің симфоническай оркестрнің музыканттары, дирижер Олег Каэтанинең хада-пірге тоғынып, прай кӧглерні пӧзік синде толдырыбысханнар. Концерт тоозылғанда, тигірзер хайхастығ фейерверк позыдылған. Республика пазы В.М.Зиминнің сыйии чонның кӧңніне кірген, концерт РУСАЛ, СУЭК, «Русский уголь» паза «Монолитстрой» компаниялар полызиинаң ирткен.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде