УЛУҒ ЧЫЫЛЫҒ ТУЗАЛЫҒ ПОЛЗЫН
08.07.2016
Хабарлар
Хакасияда "Сибер Ил" чоннар аразындағы культура-УК турист форумы тоғынчатхан туста аның хай пірее араласчылары Нымырттығда "Борус" гостиницада чыылысханнар. "Практика и методика издательской подготовки, литературного перевода учебников и учебных пособий на языках народов Российской Федерации" секция хазнада книга сығарарына паза учебниктерні тілбестиріне чарыдылған. Мероприятиеде книга сығарчатхан учреждениелерге паза оларнаң устапчатханнарға, чоох алызып, тоғыста сығысчатхан сурығларға нандырығлар таап алар оңдай полған.
"Сибер Ил" форум Хакасияда алтынҷы чылы ирткен полза, книга сығарызына чарыдылған секция пизінҷі хати тоғынды. Пӱӱл чыылығда араласханнар Россияның книгалар сығарарынҷа ассоциацияның вице-президенті Олег Васильевич Филимонов, печатьча паза массовай коммуникацияларҷа федеральнай агентствоның издательстволарға хабазарынҷа пӧлік пастығы Людмила Владимировна Кузнец, Россияның книга палатазының пӧлік пастығы Галина Петровна Калинина, Хакасияның ӱгредіг паза наука министерствозының паза Хакас книга издательствозының специалисттері. Секцияда улуғ аалҷы полған Россияның ӱгредіг паза наука министерствозының тиксі ӱгредігҷе хазна политика департаментінің пӧлік пастығы Ирина Васильевна Ланкина. Чыылығны иртірген паза модератор полған Россияның пасха хан киректерінің искірігҷе паза печатьча департаментінің директор орынҷызы, экономика наукаларының кандидады Евгений Александрович Пантелеев. Чыылығда ідӧк Россияның книга сығарчатхан издательстволарының устағҷылары паза специалисттері араласханнар.
Национальнай издательстволарның тоғынҷылары докладтарны хынып искеннер. Таныхтирға кирек, чоох тутчатханнарның полғаны ла чооғын алғыстас сӧстерінең пастаан.
- Піс «Сибер Ил» форум пайрамни азылғанында араласхабыс. Хакасия аалҷыларны пӧзік синде удурлаанына чӧпсіндібіс паза Хакас чирінің сілиине, пайына хайхаабыс, - чооғында таныхтаан Якутияның С.А. Новгородовтың адынаң «Бичик» национальнай книга издательствозының директоры Август Васильевич Егоров.
Амды тиксі чыылығдаңар. Сизінгенде, секцияда кӧдірілгеннер ол темалар, хайзылары книга сығарчатханнарға даа, оларны сыныхтағда тутчатханнарға даа тузалығ полғаннар. Іди печатьча паза массовай коммуникацияларҷа федеральнай агентствоның издательстволарға хабазарынҷа пӧлік пастығы Людмила Кузнецтің искіриинең, "Россия культуразы (2012 - 2018 чыллар)" кӧстегліг хазна программазы хоостыра Россияның регионнарындағы книга сығарчатхан издательстволарға субсидиялар тӧреміл позыдылча. Программаның ӧӧн пӧгіні - издательстволарға полызып, книгалар санын паза хығырчатхан кізілернің санын хозары.
- 2012 - 2014 чылларға хазна полызиинаң Россияда 2 муң азыра книга сығарылған. Ағаа федеральнай бюджеттең 400 азыра млн. салковай позыдылған. Ол пу издательстволарға уғаа чахсы хабазығ. Республикадағы издательстволарға уламох улуғ хайығ. Пӱӱл оларға 100 азыра книга сығарарына 18 миллион салковай пирілген, - теен ол.
Секцияда кӧп сурығлар полған Иван Фёдоровтың адынаң Москвадағы печатьча хазна университедінің книга сығарар киректерҷе паза журналистикаҷа институдының директоры Алексей Столяровха. Ол книга сығарчатхан издательство тоғынҷыларына хайди квалификацияларын кӧдіріп паза хоза ӱгредіг аларынаңар чарытхан. Пу тема, кӧзідімге алза, Хакасияа уғаа тузалығ. Хайди таныхтаан Хакасияның ӱгредіг паза наука министрi Галина Александровна Салата, амды аймах чӧптезіглер иділерлер, хайзылары Хакасияның книга издательствозы специалисттеріне квалификацияларын кӧдірерге оңдай пирерлер.
Секцияның араласчылары прайзы даа Россияның ӱгредіг паза наука министерствозының тиксі ӱгредігҷе хазна политика департаментінің пӧлік пастығы Ирина Ланкинаның чооғын сахтаан полар. Ол учебниктерні паза ӱгредіг пособиелерін хайди сығарардаңар чарытхан. Аның искіриинең, ӱгредіг организациялары ФГОС-ха кірген учебниктернең паза ӱгредіг пособиелерінең тузаланарға киректер. Учебниктернің электроннай пособиелері парох ползын. Ідӧк учебниктер школаларзар ызылар алнында нинҷе-нинҷе экспертиза иртібізерге киректер.
- Учебниктерде паза ӱгредіг пособиелерінде алҷаастар сых парбас ӱчӱн, эксперттер оларны ситкіп сыныхтапчалар. Андағ ниме сығыс парза, учебник тӱзедіге айландырылча, - таныхтаан Ирина Васильевна.
Тӧстегҷілер секцияа книгаларны сыныхтағда тутчатхан паза оларны сығарчатхан организацияларны чыып алғаны чахсы тіп сағынчам. Издательлернің хаҷан даа тоғыс хоостыра сурығлар алай ба сидіксіністер сығыс парча. Мында, тізең, оларға сурығларына нандырығлар таап алар чахсы оңдай полған. Анзы секцияның тузазы полар.
Хайди таныхтаан секцияның модераторы Евгений Пантелеев, чыылығ книгаларны пӧзік синде паза закон хоостыра сидіксіністер чох сығарардаңар иртірілче.
- Книга сығарар тоғыс сидіксіністер чох парарға кирек. Ол андағ полар ӱчӱн, секцияның тӧстегҷілері Россия синіндегі специалисттерні чыып алғаннар. Аның салтары поларға кирек. Іди чахсы книгалар саны паза оларны хығырчатхан кізілернің саны хозыларға кирек, - чооғында таныхтаан Евгений Александрович.
Секцияның ікінҷі чардығында Якутиядаң, Башкортостаннаң, Чувашиядаң, Татарстаннаң, Тағлығ Алтайдаң, Екатеринбургтаң килген книга издательстволарының устағҷылары паза специалисттері хайди тоғынчатханнарынаңар, хайдағ чидіглерге читчеткеннерінеңер алай ба хайдағ сидіксіністерге урунчатханнарынаңар сағыстарынаң ӱлескеннер.
Хайди чоохтапча Хакас книга издательствозы директорының тоғызын толдырчатхан Зоя Султрекова, пу чыылығ издательство тоғынҷыларына уғаа тузалығ полған.
- Піс учебниктерні паза ӱгредіг пособиелерін экспертизаа тимнепчебіс, аннаңар піске Россияның ӱгредіг паза наука министерствозының, хазнаның книга палатазының паза даа пасха специалисттерні истіп аларға тузалығ полған. Пісті сағыссыратчатхан сурығларға нандырығлар таап алғабыс, чоох алысхабыс паза аннаң андар чӧптезіп істенерге чарадыға килгебіс, -чоохтапча Зоя Ивановна.
"Сибер Ил" форум иртчеткен туста книга сығарарынҷа секцияның араласчылары Хакасияның книга издательствозында пол килгеннер. Пӱӱл книга издательствозына 85 чыл толча. Аннаңар секцияда Хакас книга издательствозының тоғынҷылары тоғынардаң пасха, ідӧк алғыстастар паза сыйыхтар алғаннар.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде