ЧООХТАР ПАЗЫҢАР
08.07.2016
Хабарлар
Чоннар аразындағы Махмуд Кашгаринің адынаң IV чоохтар марии 2016 чылда пасталчатханы чарлалча. Аны Евразияның Писательлер пірігізі иртірче. Аның Хакасиядағы чардығын - орындағы писательлер пірігізі. Марығда хакас тілінең пазылған чоохтар араласчалар. Оларны Хакасиядағы писательлер пірігізінзер ағыларға кирек.
Хакас тілінең пазылған чоохтар 2016 чылның 15 авгузына теере алылчалар. Хакас тілінең пазылған чоохтарның хайдағ авторлары чиңіс тутханнаңар 2016 чылның 30 сентябрьында искірілер. Хакас тілінең пазылған чоохтарның чиңіс тутхан авторларына 2016 чылның октябрь-ноябрьында сыйыхтар пиріл парарға кирек.
Чоннар аразындағы марығда чиңіс тутханнар 2016 чылның ноябрьында искірілер. Чоннар аразындағы марығда чиңіс тутхан авторларға сыйыхтар 2016 чылның декабрьында пирілер.
Жюри
Чоннар аразындағы марығның Хакасиядағы пӧлиинзер пирілген чоохтарны паалирлар:
1. Геннадий Тюньдешев, юридическай наукаларның кандидады, ХГУ-ның хазна правозы кафедразының доценті, хакас тілінің паза литературазының тархын істезігҷізі - кнес.
2. Илья Иванов, Евразияның Писательлер пірігізінің кізізі, писательлернің пос ассоциациязының члені (Чувашия).
3. Виктория Карамашева, филология наукаларының докторы, ХГУ-ның профессоры, Россияның Писательлер пірігізінің кізізі.
4. Нина Майнагашева, филология наукаларының кандидады, Хак-НИИЯЛИ-ның ӧӧн наука тоғынҷызы, Россияның Писательлер пірігізінің кізізі.
5. Лариса Челтыгмашева, филология наукаларының кандидады, ХакНИИЯЛИ-ның ӧӧн наука тоғынҷызы.
Хакас тілінең пазылған чоохтарның чиңісчілеріне
1 орын ӱчӱн 60000 салковай пирілер;
2 орын ӱчӱн - 30000 салковай;
3 орын ӱчӱн -19000 салковай.
Марығның оңдайлары:
1. Пос тема.
2. Марығ араласчылары чоохтарын почтаҷа ызарға киректер.
3. Марыға ызылған чоохтар, пасха марығларда аралазып, сыйых албаан поларға паза чарыхха сығарылғалах поларға киректер. Жюри кізілері, оларның чағын туғаннары марығда араласпинчалар.
4. Марыға аймах темаа пазылған ікі чоохтаң артых алылбинча. Пір чоохта 1000 сӧстең асхынах полбасха, 10000 сӧстең артых полбасха кирек.
5. Марыға ызылған чоохта автордаңар искірчеткен хайдағ-да буква алай сан поларға кирек. Автордаңар искірчеткен пірее хоза танығлар табылза, чоох марығдаң суурылча.
6. Марығда араласчатхан кізі, пу пічіктерні тимнеп (паспорттың хобырғанын, почта адрезін, биографиязын, пір сомны), кічіг конвертке суғып, анда шифр пас саларға, анаң кічіг конвертті марыға ысчатхан чоохнаң хада улуғ конвертке суғыбызарға кирек.
7. Чоохты, компьютерде 12 шрифтнең пазып, 6 экземпляр тимнирге киректелче. Сынап ол чоох сыйыхха турысса, аны алынҷа чыындаа кирерлер.
8. Марығда араласхан чоохтар авторға айландырылбастар паза автор ол чоохтарға правозын чідірер.
9. Сыйыхха турысхан чоохтар Евразияның Писательлер пірігізіни тіп саналарлар.
Чоннар аразындағы чоохтар марииның жюризі:
1. Азербайджан - Анар
2. Балкан - Танер Гюджлютюрк
3. Ирак - М.Омер Казанжы
4. Казахстан - Дандай Искак
5. Кыргызстан - Кыдырали Конкобаев
6. Узбекистан - Тахир Каххар
7. Турция - Осман Чевиксой
8. Турцияның Кипр Республиказы - Исмаил Бозкурт.
Чоннар аразындағы марығның чиңісчілеріне сыйыхтар:
1 орын -5000 доллар;
2 орын - 3000 доллар;
3 орын - 2500 доллар.
Махтағлығ сыйых - 830 доллар.
Чиңісчілерге сыйыхтарны Алматыда читірерлер.
Автор :
Геннадий ТЮНЬДЕШЕВ, жюри кнезі
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде