КӰСТІГЛЕР, ХЫЙҒАЛАР, ЧАПЧАҢНАР
08.07.2016
Хабарлар
Талазығ чоғыл, кӱрес паза ат чарызы - чоныбыс хынчатхан марығлар. Олох арада ӧбекелерібіс артысхан пасха даа марығлар пар. Піреелері ундудып таа парғаннар, пасхаларынҷа арға-мӧрійлер иртірібӧкчелер. Хайзының даа позының пӧгіні пар. Кӧзідімге алза, хапчаң тасты иңні азыра тастиры - олаңай ла марығ нимес. Мының алнында чииттернің не кӱстерін сыныхтабаҷаңнар андағ оңдайнаң. Хапчаң тасха сыданчатса, хоных хонарға чит парғанын сизінҷеңнер, тойға тимненҷеңнер.
Амды кӧр кӧрербістер, пастағы айран ӱлӱкӱні тузында аймах марығлар хайди ирткеннер, анда кемнер чиңіс тутханнар.
ХАПЧАҢ ТАС
Постарының кӱстерін сынирға, хайдағ айдас алып полчатханнарын кӧзідерге 16 кізі чарадыбысхан. Хапчаң тастың аары - 46 килограмм. Ол топ-тоғылах таа нимес, устығ пулуңнары даа чоғыл. Марығ чарғыҷызы, аар атлетикаҷа Хакасияның піріктірілген командазының улуғ тренері Геннадий Грачев пазын на чайхапча. Мында кирек кӧп кізі пазын салғанында нимес.
- Хызылчардаң, Тувадаң, Кемеровтаң, Сустаң, Минсуғдаң килген алыптар марығда араласханнар. Анзы чапсытча. Че хапчаң тасты, кӧдіріп, иңні азыра тастирға пілерге кирек, - чоохтапча арға-мӧрій соонда марығ чарғыҷызы.
Артых кӱстеріне ізенген алыптар соонаң пастарын на чайхапчатханнар. Марығ оңдайы хоостыра полған на кізее ікі минута пирілче. Ол тустың аразына хапчаң тасты нинҷе хати, хол узына кӧдіріп, иңнің азыра тастирзың, аннаң сылтағлығ полар хайдағ орын алары. Сынап таа мында кӧйтіктеністең, кӱсті піліп тузаланғанынаң кӧп ниме сылтағлығ.
Хапчаң тасты 27 хати, кӧдіріп, иңні азыра тастирға сыданған Алексей Грудинин чиңісчі полыбысхан. Ол Харатастаң. Асхыс аймаа ӱчӱн турысхан Евгений Доможаков ікінҷі орын алған. Хапчаң тасты ол 25 хати иңні азыра тастаан.
Хакас оолдаң ікі санға соона халып, Харатастаң килген Данил Коршунов ӱзінҷі орында пол парған. Аалҷыларға пу марығда оң полбин парған. Пастағызын на араласчалар нооза.
ТОБИТ
Пурунғы кип-чоохтарның пірсінде мындағ танығ пар осхас: тобит ойынны хойлар хадарчатхан кізілер сағын таап алғаннар. Ізіг кӱнде хойлар тынанарға чатхлабыссалар, кізілер, чирде улуғ тӧрт пулуңнығ орын сиип, азахтарын палғап салған симіс хучаларны андар салғлабызып, утысха ойнаҷаң осхастар. Мында ирік чохта матап сағынарға килісчең - чалҷы кізі, кӧп хой утыр салза, хайди тӧленіп алар.
- Тобит ойнирға пӱӱл кізі най кӧп чыылысты, - чоохтапча пу марығда сыбыра араласчатхан Виктор Тодинов,
Ол Чоғархы Асхыс аалда ӱгретчі полча. Сыйыхтығ орынға сығып аларға матап кӱстенген, че ағаа оң полбин парған. Сынап таа, 37 кізінің аразында сыйыхтығ орынға сығып аларға оой нимес.
Уғаа маңат ойнапчатханнар чыылыс партырлар. Пірдең, пӱӱл сыйыхтар маңат полғаннар. Хайдағ даа полза, Хакас Республика тӧстелгеннең пеер 25 чыл толчатханына, чоннар аразындағы «Сибер Ил» форум пістің чирде иртірілчеткеніне чарыдылған Тун пайрам.
Иреннер аразында, тобит ойнап, Асхыс чирінің оолғы Денис Кучугешев чиңіс тутхан. Таштып аймаанаң килген Виктор Бутанаев - ікінҷі орында. Ағбанда чуртапчатхан Василий Сагалаков ӱзінҷі орынны холға киргеніне тың ӧрінчеткен.
Ипчілер аразында Ис аалдаң килген Виктория Сагалакованаң тиңни ойнаҷаң кізі табылбаан. Таштып чирінең килген Айана Бутанаева - ікінҷі орында. Сорығ городтың чуртағҷызы Валентина Епишина ӱзінҷі орын алғанына позы даа киртінминдір.
АҒАСНАҢ ТАРТЫСХАНЫ
Пу даа марығ уғаа хазыр оңдайда ирткен. Мында ідӧк алыптың артығы чыылыстыр. Сынап хапчаң тас мариинда ӧӧнінде кӱс киректелчетсе, мында чапчаң паза сизіктіг тудынчатханнар. Иң ӧӧні - кӧйтік микее кір парбасха, табырах хайыныбызарға.
Таныхтирға кирек, марығ араласчылары кӧдірімнері хоостыра ікі пӧлілгеннер: 70 килограммға читіре паза 70 килограммнаң аар пасчатханнар. Че хайзында даа чиңіс ӱчӱн тартызығ-марығ уғаа хатығ парған тиирге чарир,
70 кг кӧдірімде Ис аалдағы Александр Сагалаков утхан. Сус поселоктаң килген Евгений Чепчигашев - ікінҷі орында, Ағбанның чуртағҷызы Вадим Сагалаков ӱзінҷі орында пол парған.
Аар кӧдірімніглер аразында марығ хай-ди хайхастығ парды. Мында ідӧк аймах орыннардаң чыылысхан алыптар полған. 124 килограмм пасчатхан Хызылчарның чуртағҷызы Артём Корзун прайзын утарбын тіп сағынған полар. 100 кг кӧдірімніг Константин Абатулин, ол Харатастаң, аны чиңен, пастағы орын алған. А.Корзун - ікінҷі орында. Мының алнында пу марығда чиңіс тутчаң Николай Лисовец амды ӱзінҷі орында пол парған, Ол Таштыптаң.
Улуғ хомзынысха, Тун пайрам тузында ідӧк охчаадаң таңма атар паза хол пазызар марығлар иртірілбин парғаннар. Оларны даа кӧрерге, таныстарын чиңіске кӧӧктірерге чон хынадыр.
Автор :
Анатолий ЕГОРОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде