КІЗІЛЕРНІ ЧОЛДА ХАЙРАЛЛАПЧАЛАР
12.07.2016
Хабарлар
В.Н.ШТЫГАШЕВ А.А.МЕДВЕДЕВКЕ алғыстас пічиин читірче
Ағбанда С.П.Кадышевтің адынаң культура кінінде Россия ГИБДД-зының 80 чылы пайрамни таныхталды. Ӱлӱкӱнге ГИБДД тоғынҷылары прай Хакасиядаң килгеннер. Прайзы парадха чӧрҷең кип-азахтығ полған.
Танығлығ кӱннер полған на кізінің, сӧбіренің, аймах-пасха организацияларның полча. 80 чыл аразына ГИБДД-ның позының тархыны тӧстелген. Пастап пір ле инспектор полған. Аның тоғынҷаң кабинеді олаңай турада орныхчаң. Ол тустаң сығара 80 чыл ирт парды. Пу тусха ГИБДД тоғызы илееде алыс парған. Амғы туста оларның аймах-пасха оборудование пар, ГИБДД тоғынҷыларының саны илееде ӧс парған.
Алғыстас сӧстерін читірерге сценаа Хакасия пазының орынҷызы Николай Попов сыххан. Ол Хакасия пазы Виктор Зиминнің адынаң ГИБДД тоғынҷыларын алғыстаан.
- Аарлығ Илья Иванович, Игорь Александрович, алғыстапчам сірерні, ГИБДД тоғынҷыларын паза ветераннарын пу танығлығ кӱннең. Турыстығ тоғызыңар ӱчӱн алғызым читірчем. Сірер чол чӧрізін иптіг итчезер, кізілернің чуртастарын хайраллапчазар. Улуғ алғызым ГИБДД ветераннарына читірчем, сірер амғы тоғынҷыларға кӧзідім полчазар, - читірген Хакасия пазының сӧстерін Николай Иванович.
Хайди таныхтаан Николай Иванович, амғы туста ГИБДД тоғынҷылары аймах-пасха мероприятиелерде араласчалар. Оларның полызиинаң мероприятиелер амыр иртчелер. Чооғын тоозып, Николай Попов тоғынҷыларға правительство адынаң алғыстас пічіктерін читірген.
Анаң чоох тутхан Хакасияның Ӧӧркі Чӧп кнезі Владимир Штыгашев. Чооғында Владимир Николаевич, ол МВД ветераны, кӱс структураларында тоғынғанда, хада служба ирткен ГАИ тоғынҷыларынаңар чоохтаан:
- Чарадыңар мағаа Ӧӧркі Чӧптің адынаң алғыстабызарға ГИБДД тоғынҷыларын. Улуғ алғызым сірерге читірчем. Хазых полыңар, кӱстерің тоозылбазын. Сӧбіреңерге ідӧк улуғ алғызым читірчем. Олар сірерні службадаң кӱннің сай сахтапчалар, - таныхтаан чооғында Владимир Николаевич.
Чооғын тоозып, Владимир Штыгашев Ӧӧркі Чӧптің адынаң ГИБДД тоғынҷыларына Аарластығ паза алғыстас пічіктерін читірген. Пічіктер алғаннарның санында Андрей Медведев полған. Ол Таштып аймаанҷа ГИБДД-ның ДПС тоғынҷызы полча.
Ідӧк ӱлӱкӱнде чоох тутханнар Хакасияҷа МВД министрі Илья Ольховский, кӱс структураларының устағҷылары паза Ағбандағы
епархияның хачызы протоиерей Сергий Тиманов. Ол Ағбандағы епархияның адынаң Хакасияның ГИБДД устағҷызына ах-арығ Николайның обыразын читірген.
Халғанҷызын чоох тутхан УГИБДД устағҷызы Игорь Юртаев. Ол чооғында таныхтаан, полған на кізі, ибдең сығыбысса, чол чӧрізінің араласчызы полыбысча. Пу сурығ полған на кізее теелче.
- Пістің республиканың полған на чуртағҷызы пу кирексер ГИБДД тоғынҷыларының на нимес, ідӧк позының сурии чіли кӧрерге кирек, - таныхтаан Игорь Александрович. Іди руль кистіне одырған кізі, ГАИ тоғынҷыларынаң хорыхпин, туған-чағыннарынаңар сағыссырапчатса, піс тоғызыбысты толдырыбысхан поларҷыхпыс. Улуғ алғызым читірчем Хакасия Правительствозына, Ӧӧркі Чӧбіне, МВД устағҷыларына, Олар пістің аар тоғызыбысты оңарчалар, піске хаҷан даа хабасчалар. Ідӧк ветераннарға алғызым читірчем.
Алғыстастар тоозыл парғанда, ГИБДД тоғынҷылары улуғ нимес концерт кӧріп алғаннар. Анаң Игорь Юртаев журналисттернең чоохтасхан. Ол ГИБДД тоғызынаңар чоохтап пирген.
- Минің кӧрізімнең, полған на службада тоғынарға оой нимес. Тоғысха прай пирін саларға кирексің. Іди полбаза, ол тоғыснаң айғазарға чарабас, уламох ГИБДД-да. Синің хайииңда кӧп кізінің чуртазы. Че, ачырғасха, амғы туста кізілер пістің службазар хатығлапчатхан орган чіли кӧрчелер. Ӧӧнінде ГИБДД тоғынҷылары, аймах сайбағлар ӱчӱн, кізілерні административнай нандырыға тартчалар. Тоғыста піс кізі чуртазын хайраллапчабыс.
Минің кӧрізімнең, пу орта сӧстер. Водительлернің кӧбізі ГИБДД тоғынҷыларына хынминча. Че, мин сағынчам, чол чӧрізі правилоларын сайбабинчатханнарға ГИБДД тоғынҷыларынаң хорығарға кирек чоғыл.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде