ЧИИТ СПЕЦИАЛИСТТЕРНІ САҒЫПЧАБЫС
12.07.2016
Хабарлар
Амғы туста, Хакасияның имнег тураларынзар специалисттерні тоғынарға хығырар ӱчӱн, пістің республикада аймах программалар чуртасха кирілче. Хайди олар тоғынчалар? Амғы туста имҷілер чидісчелер бе? Пу сурығларға нандырған Хакасияның хазых хайраллаҷаң министрінің полысчызы Михаил Мальгин.
Пӱӱнгі кӱнде Хакасияның имнег учреждениелерінде имҷілер киректелчеткенінің саны ортымахти 40 %-ке тиңнелчеттір. Аны чахсыландырар пӧгіннең республиканың имнег киреенде кӧп ниме иділче. Кӧзідімге, Хакасияның хазых хайраллаҷаң министерствозы школа тоосханнарға Сибирьдегі федеральнай округтың имнег ВУЗ-тарынзар кӧстегліг ӱгредіге кіріп алар оңдай пирче. Чыл сай мындағ оңдайнаң ӱгренерге сағынчатханнарға 65 - 85 орын кӧріл парча. Н.Ф.Катановтың адынаң хазна университеді ідӧк имҷілерні тимнепче. Полған на чыл мында кӧстегліг ӱгредіге 20 - 25 орын пирілче.
Пӱӱл Томск, Хызылчар, Новосибирск, Омск, Кемеров городтардтағы имнег университеттерінде кӧстегліг оңдайнаң ӱгренген 60 специалист Хакасиязар тоғынарға килер тіп кӧрілче. Оларның аразында 23 терапевт, 7 анестезиолог-реаниматолог, 6 невролог, 6 неонатолог, 6 педиатр паза даа пасха имҷілер. Специалисттернің кӧбізі Ағбан, Саяногорск, Харатас городтарзар тоғынарға парар. 20-ҷе кізі республиканың аалларында істенер.
Хакасиязар тоғынарға килген имҷілерге хазна полызии паза аймах компенсациялар пирері кӧріл парған. Іди прайзына пір хати полызыға 150 муң салковай пирілче, "Земский доктор" программада араласчатханнарға 1 млн. салковай тӧлелче. Чуртты арендаа алып чуртапчатханнарға компенсация пирілче. Ағбанда аның иң улуғ сині 10 муң салковайға читче, Харатаста, Саяногорскта - 6 муң, аймахтар кіннерінде - 4 муң, пасха аалларда - 2 муң. Паза коммунальнай полызығлар ӱчӱн тӧлеен ахча айландырылча. Ол-пу хазна хабазығларынаңар хоза піліп аларға чарир Хакасияның хазых хайраллаҷаң министерствозының сайтында: www.mz.19.ru.
Имнег ВУЗ-тарында кӧстегліг оңдайҷа ӱгренчеткен студенттерге, интерннерге, ординаторларға полызығ пирілібӧкче, оларның стипендияларына хоза 2-3 муң салковай тӧлелче.
"Земский доктор" федеральнай программа 2012 чылдаң сығара тоғынча. Россияның хазых хайраллаҷаң министерствозы искіриинең, ол чуртасха кирілгеннең, аалларзар тоғынарға парчатхан специалисттернің саны ӧс парған. Имҷілер чидіспинчеткен сурығ пӧгілзе, республика чуртағҷыларына пирілчеткен имнег полызииның сині ӧзер. Анзы, тізең, чонның хазии кӧзідіглерін чахсыландырарға полызар.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде