ХАКАСИЯ ХАБАРҶЫЛАРНЫҢ САҒЫЗЫНДА ХАҶАНFA ДАА ХАЛАР
12.07.2016
Хабарлар
Ю.Ю.АБУМОВ (ортызында) сыйых алчатхан туста
Пу наада "Хабар"республиканың газетазы "Сибирь - ізеніс чирі" регионнар аразындағы хабарҷылар узының марығ жюризінің ӧнетін сыйиина турысхан. Марығ тӧсгегӌізі, Россияның журналисттер пірігізі кнезінің советнигі Раиса Жмодиктің чооғынаң, хакас тілінең сыхчатхан газетаны жюри чон кибірлерін, культуразын, тілні хайраллапчатханӱчӱн таныхтаан. Пӱӱнгі кӱнде орындағы чон тілінең сыхчатхан газеталар паза телепередачалар асхынах сыхча, аннаңар пос чонының тілінең тоғынчатхан хабарҷыларны аарлирға кирек тіпче Раиса Алексеевна.
Чоохтирға кирек, пӱӱл регионнар аразындағы марығ чиңісчілері, ол, тізең, 90-ӌа журналист, Хакасияда чыылысханнар. Оларны "Гладенькая"спорт-отельде сыйыхтааннар. "Сибирь - ізеніс чирі" регионнар аразындағы хабарҷылар узының марығ салтарлары Хакасияда "Сибер Ил" чоннар аразындағы культура-турист форумы тузында иділген. Сибирьдегі регионнардаң, хазнабыстың пасха даа пулуңнарынаң чыылысхан хабарҷылар культура ис-пайын хайраллир паза тилідер сурығларны постарының тоғыстарында хайди чарыдарға киректелчеткенін, ідӧк марыға сығарған тоғыстарындағы алҷаастарны паза читпестерні ӱзӱргеннер. Марығның улуғ аалҷызы полған Россияның журналисттер пірігізінің хачызы Павел Гутионтов паза "Золотое достояние Сибири" танығның кавалері Роза Литвиненко.
Марығ араласчыларына 2 июль иң ӧріністіг кӱн полған. Иирде "Гладенькая" спорт-отельдегі ӧӧн павильонда хабарҷыларны чеестеп пастааннар. Сценазар ӧӧн сыйыхтарны холға киргеннерні сығарғаннар. Иң артых журналист Забайкальскай крайдағы пос алынҷа тоғынчатхан Нина Беломестнова "Сибирь журнализі" атха турысхан.
Нина Васильевна пу марығда чыл сай араласча паза чиңісчілер санында полча. Аны Россияның журналисттер пірігізінің "Россияның алтын перозы" иң пӧзік сыйиина сығарарлар. Чоохтирға кирек, "Сибирьнің журнализі" атха турысхан хабарҷыларның прайзына даа пу танығ пирілген. Ідӧк марығда "Сибирь ізенізі" номинация пар. Анда 30 часха читкелек хабарҷылар араласчалар. Пӱӱл Сибирь ізенізі Ярослав Махначев полыбысхан. Ол Алтай крайындағы "Вечерний Барнаул" газетаның I категория редакторы полча. Хакасия пазының ахчалығ сыйии "Сибирь: сон бога" фильмнер циклі ӱчӱн "Регион-Тюмень" ГТРК-ға (автор Анатолий Омельчук, режиссер Эдуард Улыбин, телеоператор Максим Марченко) пирілген. Россияның журналисттер пірігізінің ахчалығ сыйии "79-я гвардейская, геройская" документальнай фильм ӱчӱн "Томское время" ТРК-ның ӧӧн редакторы Марк Мининге читірілген.
"Хакасия" республика газетазы "Печатные СМИ" номинацияда ікінҷі орынға турысхан. Газетаның ӧӧн редакторы Юрий Абумов диплом алған соонаң таныхтаан:
- Пу чидіг толдыразынаң газетабыстың ӧӧн редакторы полған Сергей Александрович Сипкиннің тоғызы, - теен Юрий Юрьевич. -Чарир ба аны сценаа хығырарға? (Сергей Александрович сценаа сығарға маңзыраан - авт.) Мин газетанаң пу наада ла устап пастаам, аннаңар минің газетам ам даа тӧреелек. Сағынчам, ол мыннаң мындар тӧрир. Сыйых ӱчӱн алғыс сӧстерін читірчем марығ тӧстегҷілеріне, Сергей Александровичке паза хада тоғынчатхан арғыстарға!
Сергей Александрович Сипкин "Хакасияның" наа ӧӧн редакторына, газетаның чидиинде позының хозымын таныхтаан ӱчӱн, андағох чылығ сӧстернең нандырған. Сынап таа, хайдағ даа хабарҷының тоғызы - ол ӧме тоғызы. Газетада, радиода паза телевидениеде - позының чайаачы ӧмелері, полған на тоғыс хада-пірге толдырылча, ӧӧн редакторлар, тізең, кӧстеглерні, пӧгіннерні турғызып одырчалар.
Хакасияның телевидение хабарҷылары даа чайаачы устарынаң пасхазынаң халбааннар. "Автор передачазы" номинацияда автор паза ведущай Михаил Мерзликин, режиссер паза оператор Дмитрий Паршин "Загадочная Хакасия" передачаларынаң пастағы орынға сыхханнар, "Искірігліг сюжет" номинацияда ӱзінҷі орынға сыххан Ольга Камзалакова. Олар прайзы "Хакасия" ТВ кінде (РТС телеканал - авт.) тоғынчалар.
Ол син хабарҷы Хакасияда пірее хаҷан полған ни?! Сибирь регионнарынаң на 90 азыра хабарҷы килген, оларға республикадағы газета-телевидение хабарҷылары хозылғаннар. Республика ӱлгӱлері паза "Хакасия" республика газетазының, РТС телеканалның устағ-пастаа аалҷыларны чылығ паза пӧзік синде удурлирына кӧп ниме иткеннер. Оларның кӱстеністері тикке парбаан. Пістің республика ааллаан хабарҷыларның сағыстарында пай чир-чайаанынаң, сіліг кӧрімнерінең паза пурунғыдағы тархын памятниктерінең хаҷан-ға даа халар. Хабарҷыларның полғаны ла, сценаа сығып, Хакасия ӱлгӱлеріне, журналисттер пірігізінің Хакасиядағы пӧлиине хайхастығ пис кӱн ӱчӱн алғыстарын читірчеткеннер. Чоохтирға кирек, марығ чылдаң чылға иртіріліп, чиңісчілерні чеестирге пасха-пасха регионнарда хабарҷыларны чыыпчалар. Пӱӱл "Сибирь - ізеніс чирі" марығ араласчыларын Хакасия удурлаан полза, пазағы чыл чиңісчілерні Томск облазы позының чирінде сағыпча.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде