ЧАСКА ПИК СӦБІРЕДЕ ПОЛАДЫР
12.07.2016
Хабарлар
Россия чуртағҷылары 8 июльда Сӧбіре, хыныс паза киртініс кӱнін таныхтааннар. Пу кӱнде Ағбан городтың пазы Николай Булакиннең Ағбандағы паза Хакасиядағы архиепископ Ионафан илееде чыллар хада чуртап салған сӧбірелерге «Хыныс паза киртініс ӱчӱн» медаль читіредірлер. Пӱӱл пӧзік халых сыйиин сигіс сӧбіре алған: Кызласовтар, Волобуевтер, Банщиковтар, Бодягиннер, Чехлатовтар, Никифоровтар, Арутюновтар паза Бондаренколар.
- Аарлығ арғыстар, піс сірерні ӧріністіг ӱлӱкӱнге хығырып алдыбыс, - айланған город пазы Ағбан администрациязының улуғ залында чыылысхан чонзар. - Пӱӱн Сӧбіре паза киртініс кӱні таныхталча. Ідӧк ле ынағ чуртаңар, хазых полыңар!
Ідӧк администрацияның улуғ залында, «Сӧбіредегі ӱгредіг ӱчӱн» марығда аралазып, Ағбан город пазының Аарластығ пічиине турысхан сӧбірелер чыылысханнар. «Кӧп палалығ сӧбіре» номинацияда Аарластығ пічікті Бабайцевтер сӧбірезі алған. Сергей Васильевич паза Оксана Геннадьевна пис пала ӧскірчелер. Иң кічіг палазы Георгийге ікі ай.
«Пала алып ӧскірчеткен сӧбіре» номинацияда Владимир Александрович паза Екатерина Ивановна Лабиковтар Аарластығ пічікнең таныхтатханнар. Олар, сӧбірезер алып, Даниил (14 частығ) паза Эльвира (9 частығ) Французовтарны ӧскірчелер. «Ӏстеніс династиязы» номинацияда Гаськовтар сӧбірезі - чиңісчілер. Олар, имҷілер полып, ӱс тӧлге читкеннер. Династияның тиксі істеніс стажы - 120 чыл.
«Чиит сӧбіре» номинацияда Сергей Яковлевич паза Екатерина Анатольевна Гайерлер Аарластығ пічік алғаннар. Пу номинацияда 35 час толдырғалах ирепчілер араласханнар, хайзылары, хада пис чыл азыра чуртап, пір алай аннаң даа кӧп пала ӧскірчелер. Гайерлер ӱс пала ӧскір парчалар, тун оолахтары Дениске -13 час, очызы Эллина - 1 частығ.
Ӱлӱкӱн тоозылчатханда, мин «Хыныс паза киртініс ӱчӱн» медальны алған Кызласовтар сӧбірезінең чоохтазып алғам.
- Мин Таштып аймаандағы Пиҷе хол аалда тӧреем, - чооғын пастаан сӧбіре пазы Игорь Елизарович. - Анаң паба-іҷем Таштыпсар кӧскен. Анда чуртаабыс. 6 классха мині Ағбандағы национальнай школазар ӱгренерге пирібіскеннер. Аны тоосхан соонаң, Фрунзе городсар ӱгренерге парыбысхам, ам ол Бишкек адалча. Андағы училищені хызыл дипломға тоосхам. Аннаң киліп, Ағбандағы предприятиеде тоғынғам. 1988 чылда Киевтегі гражданскай авиация инженерлерінің институдын заочно тоосхам. Ипчім Валентина Михайловна Аев аалдаң. Ол Ағбандағы ӱгретчілер училищезінде ӱгренген. Анаң аны Таштыпсар тоғынарға ысханнар. Анда мағаа тоғас парған. Хон салғабыс. Мин Ағбанда тоғынчатхам, аннаңар ол городсар кӧскен. Заочно ХГУ-ны тоосхан. Валентина Михайловна Ағбандағы 25 № школада директор орынҷызы полча. Ол - Хакас Республиканың саблығ ӱгретчізі. Мин позым Хызылчарда лётчик полып тоғынчам, гражданскай авиацияда 37 чыл істен парирбын. Валентина Михайловнанаң 30 азыра чыл чуртапчабыс, ікі хызыбыс пар. Улии Татьяна, Томскта юристке ӱгреніп алып, банкта істенче. Кічии Мария 11 класста ӱгренер. Маринаҷах пархаҷаабыс пар. Чон пістің кӱзібісті чахсы паалаан ӱчӱн, ӧрінчем, поғдархапчам.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде