СЫЛТАҒНЫ СЫНЫХТАҒЛАР САЛТАРЛАРЫ КӦЗІДЕР
15.07.2016
Хабарлар
Киҷее Хакасияның пазы Виктор Зимин правительство чыылиин иртірген. Регион устағҷызы чыылығда аймах сурығларға теелген, «Сибер Ил» форум хайди ирткенінҷе салтарлар идерінең пасти, ноға «Пуланнығ кӧл» олған лагерьінде папаларның істі ағырыбысханына теере.
Виктор Зимин чыылығны республикада ирткен «Сибер Ил» форумның салтарларын идіп пастаан. Хайди ол таныхтаан, пӱӱлгі форум пӧзік синде ирткен. Пу чылда форумда аймах регионнардаң, пасха хазналардаң килген араласчылар паза аалҷылар полғаннар. Прайзы форумның тузазын паза ол чахсы ирткенін таныхтаптыр.
- Культураа ӧӧн хайығ идіп, піс алҷаастабадыбыс. Форумға хайығ салыл сыххан, салтарында республикаа хайығ тартылча. Прайзына улуғ алғыс, иткен тоғыс ӱчӱн,- теен Виктор Зимин.
Хакасияның пазы Россияның культура министрі Владимир Мединскийге алғызын читірген, республиказар киліп, наа культура-музей кінінде сувенирлер кӧзідиин азарында араласхан ӱчӱн. «Сибер Ил» форумның паза пip тузалығ сари - пірге тоғынардаңар чӧптезіглер иділгені. Іди форум тузында республика Татарстаннаң, РУСАЛ-наң, Дерипасканың «Вольное дело» фондынаң паза Хазна Эрмитажынаң чӧптезіглер иткен.
Виктор Зимин чыылығда ідӧк пос чуртағҷыларын ундирға чарабас тіп таныхтаан. Хакасияның культура министрі Светлана Окольниковаа орындағы артисттер чайғызын аал-городтарҷа гастрольға чӧрзіннер тіп чахығ пирген.
Мының соонаң регион устағҷызы «Пуланнығ кӧл» олған лагерьінде пол парған кирекке теелген. Хакасия пазының орынҷызы Валерий Марков лагерьде ол кӱн кӱгӱрт сылтаанда чарытхы ӱс парған тіп искірген. РЭС ырахтаңар (лагерьдең 70 км), чарытхы 6 час пазынаң на пирілтір. Виктор Зимин прай социальнай объекттерде резервтіг чарытхы генераторы пар поларға кирек тіп таныхтаан паза Валерий Марковха ол сурығны пӧгібізерге чахығ пирген.
Республика пазының орынҷызы Ирина Смолина, пуох сурығҷа чоох тудып, палаларның хазиина хорғыс чоғыл тіп таныхтаан. Аның искіриинең, лагерьнің тоғызы саңайға тохтадылбаан, сыныхтағлар ирткен соонаң, прай палалар лагерьзер тынанарға айланарлар. Ирина Смолина ідӧк Хакасиязар пір дее чӧптезіг чох Хызылчар крайынаң палалар тынанарға килгеніне хайығ айландырған. Олар, Шира аймаанзар килin, анда чарадығ чох тынанчаттырлар. Амғы туста оларны нандыра Хызылчар крайынзар ызыбыстырлар. Виктор Зимин орта иткеннерін таныхтаан: «Піс туристтерні удурлирға тимдебіс, че прай ниме правилолар хоостыра поларға кирек. Уламох кирек палаларға теелчетсе».
Хакасияның спорт министрі Валерий Денщиковха чоох тударға киліскенӧк. «Пуланнығ кӧл» лагерь оларның холында нооза. Хайди ол искірген, лагерь чайғы тынаға толдыразынаң тимде полған. Лагерь істі паза аның ибіркізі прай арығлалған. Имнег персоналы паза столовай тоғынҷылары - чахсы специалисттер. Ас-тамах ағылчатханнар - ідӧк ізестіг тоғынчатхан компаниялар. Ол кӱн палаларны меню хоостыра азыраптырлар. Че ікі час хараазын 15 паланың істі ағырыбыстыр. Иртен лагерь директоры Роспотребнадзорзар искіртір.
- Чарир полған ағырыбысхан 15 паланы ла лагерьдең апарыбызарға, - таныхтаан министр. - Че піс прай палаларны сығарарға чарадығ алғабыс.
Хакасияның пазы иртчеткен сыныхтағларның салтарларын сағып алалар, анаң кем пыролығ полғанын кӧрербістер тіп чоохтанған.
Чыылығның пазағы сурии Хакасия школаларында ЕГЭ паза ГИА хайди ирткеніне чарыдылған. Ӱгредіг министрінің орынҷызы Анатолий Бутенконың искіриинең, ЕГЭ салтарларынҷа Хакасия Россияның иң чахсы 20 регионы санына кір парарға айабас. Пӱӱл республикада ЕГЭ-ны 100 баллға 9 ӱгренҷі тудыбыстыр, 2015 чылда 7 ӱгренҷі полған.
Хакасияның финанстар министерствозы, отпуск паза чал ахчазы хайди тӧлелчеткенінеңер сан пиріс идіп, прай ниме планҷа парча тіп искірген.
Пӱдіріг паза ЖКХ министрі Сергей Можаров перинатальнай кіннің пӱдірии хоостыра чоох тутхан. Хайди ол таныхтаан, амғы туста прай тоғыстар график хоостыра апарылча, тохтағлар чоғыл. Хазых хайраллаҷаң министр Наталья Коган перинатальнай кінге оборудование аларынҷа хайдағ тоғыс апарылчатханынаңар искірген. Ол пӧгінге федеральнай бюджеттең 400 миллион салковай позыдылтыр.
Чыылығның халғанҷы сурығларының санында Тимірчолҷылар кӱнін таныхтирына тимненіс полған. Пӱӱл ол ӱлӱкӱнні Асхыс станциязында иртірерге чарадығ алылтыр. Аннаңар ӱлӱкӱнге Асхыс станциязының кӧрімін оңдайлабызарға пӧгін турғызылған. Пу тоғыс 20 июльға теере толдырыл парар тіп ізендіргеннер Хакасия пазын.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде