СУҒЛАРДА ОЛҒАННАР СААЙЛАНМАЗЫН
15.07.2016
Хабарлар
Хакасияның правительство туразында республиканың сағыбаан саайларның салтарларын чох идерінҷе комиссияның чыылии ирткен. Аның тоғызын Хакасия пазының орынҷызы, комиссияның кнезі Владимир Крафт апарған.
Пу олаңай нимес чыылығ полған. Пӱӱл чайғызын хазнада олғаннар суғларда саайланчатханда, Россиянин президенті Владимир Путин прай регионнар устағҷыларына, олғаннарның чуртазын, хазиин хайраллир пӧгіннең, пу сурыға хайығ айландырып, аны ӱзӱріп, кирек чарадығлар аларға чахығ пирген. Аннаңар пу улуғ чыылығда Хакасия пазының орынҷылары Николай Попов, Ирина Смолина, ідӧк олғаннарны тынандырарынаң, хазыхтандырарынаң палғалыстығ министерство-ведомстволарның устағҷылары араласханнар.
Владимир Крафттың чооғынаң, азынада тимнелген пляжтарда, арачылағҷылар посттары турғызылған орыннарда саайлар полбинча. Че ӱр ниместе Чоғархы Киндірліг аалда ікі частығ пала суға пурлух парған. Ағбанда 11 частығ хызыҷах, суға сомып, ідӧк саайланған. Мындағ киректер прайзын чобалдырча. Саайлар полдыртпас тоғыс апарчабыс, че ниме-де читіре иділбеен полар. Пастағы теесте палаларның паба-іҷелерінең тоғыс апарарға кирек, олар паланы, кӧрбин, артыспазыннар.
Ирина Смолина, муниципальнай аймахтар пастарының орынҷыларын чыып, олғаннарның тынағ тузын хорғыс чох иртірер сурығны ӱзӱрерге пӧгінче. Хайди ол таныхтаан, палаларға суғдаң пасха даа сфераларда хорғыс чох оңдайлар пирерге кирек. Прай ол тоғыстарны ӱлгӱ ле толдыр полбас. Палаларны чалғызан артызарға чарабас. Улуғлар нандырығлығ ползыннар, пу сурығдаң хыйа турбазыннар. Кӧп палалығ сӧбірелерде улуғлары кічіглерін кӧрчелер. Іди поларға кирек. Палалар саайланмас ӱчӱн, ниме идерге кирек? Пу тоғысха халых пірігістерін, ипчілер чӧптерін, ветераннарны, ӱгретчілерні, имҷілерні тартарға. Хайди даа паба-іҷелернең тоғынарға, профилактика тоғызын апаралар.
Николай Поповтың чооғынаң, мындағ тоғысты апарарға Хакасияның пазы паза Россияның президенті чахығ пиргеннер. Олғаннарға хорғыс чох оңдайлар пирҷең комиссия тӧстирге дее килізер. Телевидение передачаларын тохтадып, олғаннарға хорғыс чох оңдайлар пирерінеңер чоохтирға. Мында прайзы нандырығлығ ползын. Чоғархы Киндірлігде пала тулғорда саайланған. Ол тулғорның ээзі чоғыл. Ноға? Муниципалитеттерге сурығ. Хорғыс чох оңдайлардаңар реклама пирерге, баннерлер турғызарға. Пастағы теесте паба-іҷелер нандырығлығ ползыннар. Лагерьлерде олғаннарнаң сыбыра хорғыс чох тудынардаңар чоохтазығлар апарарға.
Роспотребнадзорның Хакасияҷа управлениезінің пастығы Татьяна Потапова Пуланнығ кӧлдегі спорт лагерьінде палалар оохханнаңар искірген. Анда чарытхы ӱскен полтыр, аннаңар ізігде ас-тамах ардаан полар. Экспертизаның кӧзідіглері ам даа тимде нимес. Чыылығның салтарларынҷа чарадығ алылған.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде