ВИКТОР ЗИМИН САЯНОГОРСКТАҒЫ МЕТАЛЛУРГТАРНЫ АЛҒЫСТААН
19.07.2016
Хабарлар
Хакасияның пазы Виктор Зимин Металлург кӱні апнында Саяногорскта пол килген. Анда ол металлургия предприятиелері тоғынҷыларын профессиональнай ӱлӱкӱннең алғыстаан. Пайрамнығ мероприятие «Визит» культура туразында ирткен.
- Металлургия отрасльының предприятиелері кӧп чыллар изере республика экономиказын тилідеріне улуғ хозым итчелер. Сидік туста, алай республикаа паза аның чуртағӌыларына туза ағылар олаңай пӧгіннең, регион ӱлгӱзі паза бизнес пірге тоғынғаны аарлығ, - теен Виктор Зимин.
Хакасияның пазы республикаа аар полған туста андағ пірге иділген тоғыстарны сағысха кирген: Сойан-Сус ГЭС-тағы саайның салтарларын чох идерінде, Ағбан суғ кизіре иңзерілген тимір чол тахтазын хатап пӱдірерінде. Ирткен чылда апрельдегі ӧрттерде республика чуртағӌылары хыйалға кіргенде, РУСАЛ компания ідӧк пастағылар санында полызыға килген. Олар 20 миллион артиинаң салковай паза онарлап машина гуманитарнай полызығ чыып пиргеннер.
- Улуғ алғыс аның ӱчӱн сірерге прайзына, компанияның тоғынӌыларына, устағ-пастаана паза Олег Владимирович Дерипаскаа, Кӱстеністерні піріктіріп, піс пу чыллар аразына кӧп тузалығ проекттерні чуртасха киргебіс. Олар амды республиканың паза Саяногорск городтың чуртағӌыларына ӧрініс ағылчалар, - таныхтаан Хакасияның пазы Виктор Зимин.
Кӧзідімнернің пірсі - металлургтар городында ветераннарға пансионат пӱдіріліп азылғаны. Республикаа уғаа кирек объект, ол пӱӱнгі кӱнде кӧп ветеранға ибі пол парған, ідӧк анда улуғ частығлар хазыхтарын тыыдып алчалар.
Виктор Зимин пасха даа пірге тоғыстарның кӧстеглерін адаан. Кӧзідімге, РУСАЛ компания Саяногорсктағы имнег туразын, Преображенскай тигірибні пӱдіреріне, «Сибер Ил» чоннар аразындағы форумны иртіреріне чахсы хабас пирген.
Регион устағҷызы, металлургтарның тіспен істенізі сылтаанда, Саяногорсктағы алюминий заводы САЯНАЛ-наң паза Хакас алюминий заводынаң хада пӱӱн хазнаның иң чахсы металлургия предприятиелері полчатханын таныхтаан. Заводтар сығарчатхан ниме-ноолар прай тилекейҷе тарапча, ол - командадағы тоғыстың пірге салтары.
Алынӌа алғыс сӧстерін Виктор Зимин алюминий отрасльының ветераннарына читірген. Производствоның тӧстеенде турғаннар амды чиит улусха опыттарын паза пілістерін пиріп полысчалар.
- Аарлығ арғыстар, сірерге наа профессиональнай чидіглер алғапчам. Сірернің предприятиеңер тиліп ле турзын, сӧбіреңер чахсы ла чуртазын, - алғыстаан металлургтарны Хакасияның пазы, чооғын тоозып. Алғыстастар соонаң Виктор Зимин металлургия отрасльының иң чахсы тоғынӌыларына сыйыхтар читірген.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде