ТАЛАЗЫҒЛАР СООНДАҒЫ ЧАРАДЫҒ
19.07.2016
Хабарлар
Июньның халғанӌы кӱннерінде Хакасияның ӱгредіг паза наука министерствозына кірчеткен терминологическай комиссияның теестегі чыылии ирткен. Анда ХакИРОиПРО-ның поликультурнай ӱгредіг кафедразының улуғ наука тоғынҷызы, педагогика наукаларының кандидады Алефтина Николаевна Балгазина тимнеен ӱгредіг-методика орыс-хакас сӧстігі ӱзӱрілген.
Комиссияда пу сӧстікке кірчеткен 58 сӧс ӱзӱрілген. Оларның санында мындағ сӧстер: парный согласный - хос согласнай; передача основных мыслей текста - тексттің ӧӧн сағызын читіргені; повествование (создание текста по аналогии) - искірігліг чоох; познавательные универсальные учебные действия - піліс алӌаң тиксі ӱгреніс идіглері; познание - піліс алғаны; понятие - оңнағ; портрет героя - матырның кӧрімі; послесловие - хоза танығ; поступок героя - матырның хылынызы; поучительная беседа - ӱгредігліг чоохтазығ; пояснение - чарыдығ; пояснительная записка - чарыдығлығ пічік; предисловие - сӧс алны; предметный результат - предмет салтары; преобразование - алыстырығ; приглашение -хығыртығ; принцип - принцип; программа формирования универсальных учебных действий - тиксі ӱгреніс идіглерін пӱдірӌең программа; развивающее обучение - тилістіг ӱгредіг; развитие - ӧзіс, тиліс; раздел - пӧлік, чардых; рассуждение - изептес; расширять кругозор - сағыс-кӧгіс алғыдарға; редактировать - тӱзедерге; результат - салтар; речевой этикет - чоох этикеді; самообразование - пос алынӌа ӱгреніс; самооценка - пос паалас; саморазвитие - пос ӧзіс; самосознание - пос пілініс.
А.Н.Балгазинаа сӧстіктің пӱдізіне теелчеткен чӧптер пирілген. Ол санда, сӧстің тузаланчатханын чарыда кӧзідер иде килістіре кӧзідімнер пирерге паза чоннар аразында тарап парған грек-латин сӧстерні тілбестебин артызарға (парадигма, педагогика, рефлексия, этикет паза даа пасхазы). Че хакас тілінде чарыдылчатхан оңнаға килістіре сӧс пар полза, хакас сӧзін кирерге чарадылған: педагогическая деятельность - ӱгретчі тоғызы, пауза - тохтағ, кругозор - сағыс-кӧгіс, регулятивный - кӧстегліг паза даа пасхазы.
Хай пірее сӧстернең тузаланарына килістіре тілбестег табылбаан, аннаңар оларны пазағы чыылығда ӱзӱрерге артыс салғабыс. Оларның піреезі: полемика, практический опыт, противоречие, регулятивные умения, самостоятельность, словарный запас, чувство языка.
Чарат салған сӧстер, соонаң ӱгредігде тиксі тузаланысха кір парзалар, тілібістің сӧс пайына хозыларлар. Іди тілібіс кӧместең пайыпча паза тузаланызы алғыпча. Арса, хығырығӌылар килістіре тілбестирҷіктер? Газета пастыра ӱндезерге чарир. Прай чӧптерні алай сурығларны терминологическай комиссия санға алар, ӱзӱрер.
Автор :
Ирина ЧЕБОЧАКОВА, филология наукаларының кандидады, ХакНИИЯЛИ-ның ӧӧн наука тоғынӌызы, терминологическай комиссияның кнезі
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Россияда
Тилекейде