ХАЗЫХ СӦБІРЕДЕ ПАЛА ЧАСКАЛЫҒ
19.07.2016
Хабарлар
Ӱр ниместе Ағбандағы Преображенскай паркта Хакасияның хазых хайраллаҷаң министерствозы, істеніс паза социальнай тиліс министерствозы «Хазых сӧбіре» акция иртіргеннер. Пу мероприятие Сӧбіре, кӧленіс паза киртініс кӱніне чарыдылған. Анда республиканың папа тапчаң туразының, имнег профилактиказы кінінің, СПИД-тең тоғыр кӱресчең кіннің паза Ағбандағы олғаннар имнег туразының специалисттері чыылған чонға хайди хазых чуртас апарардаңар чоохтааннар. Акцияда аралазарға іҷелер, чиит сӧбірелер иркеҷектерінең хада килгеннер.
Хакасияның істеніс паза социальнай тиліс министерствозының специалисттері палалығ сӧбірелерге хайдағ пособиелер пирілчеткеннеңер искіргеннер. 2016 чылда пала таап алған іҷее пір хати пирілчеткен пособие 20166,45 салковайға тиңнелче. Пастағы палаа пір час чарым толғанӌа іҷе-паба ай сай 3781,21 салковай алча, ікінҷі паза аннаң даа пасха палаларына - 7562,41 салковай.
Палаа 16 час толғанҷа сӧбіре ай сай 256,58 салковай олған пособиезін алча. Іҷе кізі паланы чалғысхан ӧскірчетсе, ағаа ай сай 513,16 салковай тӧлелче. Іӌезі алай пабазы алимент тӧлебинчетсе, палаа 384,87 салковай тӧлелче. Анӌох син пособие алча сӧбіре, хайзының пабазы хығыртығ хоостыра армияда служба апарча.
Акцияда имҷілер ипчілерге пала табарына хайди тимненерінеңер, час паланы орта азырирынаңар, олғаннарның чуғынӌах ағырығларынаңар чоохтааннар. Пала тапчаң тураның имҷілері тойлығ ипчілерге имнег туразында санға ирте турарға чӧп пиргеннер. Андада пала хазых тӧрирін анализтер паза УЗИ пастыра табырах пілібісчелер.
Имнег тоғынӌылары «Тойлығ ипчілерге гимнастика» паза «Олғаннарға имнег гимнастиказы» мастер-класстар иртіргеннер. Специалисттер ВИЧ паза чуғынҷах ағырығлардаңар чоохтааннар, посты хайралланарға хығырғаннар. Россияда кӱннің сай 200 чуртағҷы ВИЧ-наң ағырыбысча. 60 азыра % киректе, иреннең ипчі хайралланмазалар, хомай ағырығны чухтырынып алчалар. 35 % киректе кізі, наркотик амзап, ВИЧ-ха хаптырт салча.
Ідӧк пала таап полбинчатхан сӧбірелерге ЭКО хайди иртірілчеткенін чарытханнар паза паланы хазых ӧскірердеңер чӧптер пиргеннер.
Республиканың психоневрология диспансерінің специалисттері тузалығ брошюралар тимнеп салтырлар. Брошюраларында олар аймах чӧптер пирчелер. Кӧзідімге, пала компьютер ойыннарына сабыл парза, хайди поларға? Пала пірее ниме оғырлабысса, хайди аннаң чоохтазарға? Харысчатхан алай кізі чооғын испинчеткен паланы хайди «тӱзедерге»? Хада хонғанынаң чарылыс парза, посты хайди тудынарға?
Таныхтирға кирек, республика синінде иртірілчеткен «Хазых сӧбіре» акция «Мағаа чуртас сыйлап пир!» акцияа тӧстеніп иртірілче. «Мағаа чуртас сыйлап пир!» акция аборттардаң тоғыр кӱресче паза сӧбіредегі кибірлерні хайраллапча.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде