СОРЫҒ ЧУРТАҒҶЫЛАРЫНЫҢ - ІКІ ӰЛӰКӰН
20.07.2016
Хабарлар
«Металлург» культура туразының олғаннар секторының устағӌызы Кристина ТАЩУК Хакасия пазының алғыстазын алча
Ирткен субботада Хакасия пазы Виктор Зимин Сорығ чуртағӌыларын городтың 50 чылынаң паза металлург кӱнінең алғыстаан. Пайрамнығ мероприятиелерде аралазып, республика пазы металлург кӱні город чуртағҷыларына иң чағын ӱлӱкӱн полчатханын, город паза промышленность предприятиелері пip тархыннығ полчатханнарын таныхтаан.
- Хакасия Правительствозы паза позымның адынаң Сорығның прай чуртағҷыларын паза аалҷыларын городтың 50 чылынаң паза металлург кӱнінең алғыстапчам. Пу профессия - тоғыстарына хынчатхан, кӱстіг хылыхтығ кізілернің профессиязы. Уламох ӧріністіг пістің ветераннарны кӧрерге, хайзылары руданы анып пастааннар паза сығарысты тӧстееннер. Улуғ тоғыстарың ӱчӱн алғыс сірерге. Пӱӱн тоғынчатханнарға, Илбек Россияа паза тӧреен Хакасияа туза ағылып, маңнаныстығ тоғынарға алғапчабыс. Сірернің ниме-нооларың оборона промышленнозына, ідӧк олаңай ниме-ноо сығарызына уғаа кирек. Аннаңар городтың, ӧӧн предприятиезін тилідерінңе паза аны хайраллирынңа пӧгінні - хайзын пу сидік туста хада-пірге пӧкчелер предприятиелер ээлері паза республика правительствозы - пістің пірге пӧгінібіске санапчам. Хада піс пӱӱнгі сидіксіністерні тобырарбыс! - теен республика пазы.
Кӧбізінің сағызында Сорығның уйан кӧрімі ам даа халған, че нинӌе-де чыл аразына город чахсы саринзар алыс парған. Чуртағӌылар тӧреен городтарын иптирге, ӧңнендірерге кӱстенчелер. Хакасия пазының чарадиинаң городтың Культура туразына музыка аппаратуразын аларына чарым миллион салковай паза тоғынминчатхан фонтанны тыхтирына сыйыхха ахчалығ хабазығ пирілген. Виктор Зимин республиканың паза городтың социальнай паза экономика чуртазына улуғ хозым иткен. Сорығ чуртағҷыларына федеральнай, республиканың аарластығ сыйыхтарын читірген.
Ідӧк пайрамнығ мероприятиелерде Хакасияның Ӧӧркі Чӧбінің кнезі Владимир Штыгашев паза Хазна Думазынзар Хакасиядаң табылған депутат Надежда Максимова араласханнар паза чуртағӌыларны ікі ӱлӱкӱннең алғыстааннар.
- Орта чоохтадылар, Сорығ город чох чон хонииның кӧп отрасльы тиліп полбасчых. Аннаңар металлургтарыбыстың тоғызынаң пістің тиксі хазнаның кӱзі паза экономиказы тыыпча. Улуғ алғыс пу отрасльның прай тоғынҷыларына, чуртастарының кӧп чылларын хазнабыстың чахсы чуртазына пир салған істеніс ветераннарына. Городтарыбыс, сӧбірелерібіс ӧңнензіннер. Прайзына хазых, ырыс паза чахсы чуртас алғапчам, - таныхтаан Надежда Максимова.
Экономикаа сидік тее туста Сорығның ӧӧн предприятиелерi тиліске кӧстег тутчалар. Оларға тузалығ пол парған Хакасияның паза Беларусьтың аразындағы хада-пірге тоғынардаңар чӧптезіг. "Союзметалло-ресурс" компанияның устағҷызы Святослав Лебедевтің таниинаң, ол чӧптезіг полызиинаң компания БелАЗ концерннең 130 тоннаа сыданчатхан пис БелАЗ автосамосвалны аларынаңар чӧптес салған. Устағӌы, хабазығ ӱчӱн, республика ӱлгӱлерін, Правительствоны, Ӧӧркі Чӧпті паза алынӌа Виктор Зиминні алғыстаан.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде