КӦП ООЛ-ХЫСХА ЧОЛ АСХАН
22.07.2016
Хабарлар
Пӱӱл Хакасияның национальнай олған искусство школазының таңнастығ чыл. 24 июльда ол тӧстелгеннең 30 чылын таныхтапча. Ол син чыл аразына искусство школазы кӧп оол-хысха, тирең пілістер пиріп, чуртаста чол таап аларға полыс пирген. Школаның тархынынаңар, амғы чуртазынаңар паза халғанҷы чиңістерінеңер директорның орынӌызы Ирина Алексеевна Тугужекова чоохтапча.
- Пістің школа Н.Ф.Катановтың адынаң хакас гимназияның ікінӌі корпузында орныхча. Анзы тиктең нимес, пістің олғаннарыбыстың ӧӧні - гимназияның ӱгренҷілері. Пастап национальнай школада 10 чыл артиинаң Ағбандағы 1 № музыка паза хоос школаларның филиаллары тоғынғаннар. Оӧн пӧгін аалдаң килген палаларны искусстваа тартары полған. 1986 чылда ӱлгӱлер чарадии хоостыра мында музыка школазын тӧстееннер. 1988 чылда хоос пӧлиин асханнар, андада піске искусство школазы тіп ат пирілген. Пір чыл пазынаң ӱгредіг заведениезінде хоза теелбек пӧлии тоғын сыххан. Школаның пастағы директоры Россия культуразының саблығ тоғынҷызы Л.И.Аёшина полған.
Пастағы ӱгретчілер аразында Ю.А.Патачакованы, Н.В.Боргоякованы, Т.И.Чеменеваны, А.В.Доможаковты таныхтирға кирек. Мин позым школада 1987 чылдаң істенчем, тоғыс хоостыра директор Л.И.Аёшина даа, Т.И.Чеменева даа мағаа кӧп кирек чӧптер пиргеннер. Амды ӧменің ӧзені М.А. Бодункова, Ж.В. Житник, Ш.Г.Костякова, Л.В. Розова, А.В.Старухин, С.П.Чепашева, Л.М.Шалгинова, А.Н. Султрекова полчалар.
Олғаннарға чахсы пілістер пирерге пӧгініп, піс Ағбандағы музыка училищезінің, Хакас филармониязының паза даа пасха школалар тоғынҷыларынаң пик палғалыс тутчабыс. Республиканың олған искусство школазында профессор, Россия искусствозының саблығ деятельі П.М.Ким, Россия культуразының саблығ тоғынҷызы А.Г.Штарк істенгеннер. Кӧп чыллар пістің ӱгренӌілерібіснең Хакасия культуразының саблығ тоғынӌызы М.С. Сартыкова айғасча. Аның холында ӱгренчеткен Юрий Шалгынов пӱӱл Дельфийскай ойыннарда «Чон инструменттері» номинацияда алтын медаль утып алған.
Таныхтирға кирек, пістің школада хакас чонның кибірліг культуразына хаҷан даа улуғ хайығ салҷаңнар. Пістің олғаннар хакас кӧглерін, теелбектерін тӧреміл толдырӌаңнар. 1990 чыллар тоозылчатханда, піс ӱгредіг программазына хакас кӧг тиріглерін киргебіс. Пу кӧстегні тилідіп, 2010 чылда школада фольклор пӧлии азылған. Палаларны хайлирға, тахпахтирға паза чатханнаң ойнирға Россияның паза Хакасияның саблығ артизі Е.А.Улугбашевнең Хакасияның саблығ артизі М.В. Янгулова ӱгретчелер. Оларның чайаачы ӧмезі «Айдас» адалча. Ідӧк школада «Тигір хуры» фольклор ӧмезі пар, аннаң А.Б.Туденева устапча.
Искусство школазында ідӧк театр студиязы тоғынча. Аны 2002 чылда Хакасияның чон артизі, режиссер Ю.М.Майнагашев асхан. Амды студиянаң Хакас драма театрының режиссеры С.С. Ултургашева устапча. Саяна Сапиновнаның ӱгренҷілері Алина Гетманова паза Андрей Сагалаков пӱӱл, «Сибирь чылтыстар чарытча» фестиваль-марығда аралазып, «Хоос сӧс» номинацияда I степеньніг лауреат атха турысханнар.
Таныхтирға кирек, искусство школазының олғаннары аймах фестиваль-марығларда ӧткін араласчалар. «Тигір хуры» ӧме 2015 чылда Новосибирскте ирткен чоннар аразындағы фестивальда I степеньніг лауреат ат алған. Пӱӱл Россия синоде иртчеткен А.А.Кенельнің адынаң марығда I степеньніг лауреат атха Юрий Шалгыновнаң Александр Трояков турысханнар.
30 чыл аразына искусство школазы кӧп оол-хысха чуртаста чол таап аларға полыс пирген. Пістің ӱгренӌілерібіс, Алматыдағы паза Новосибирсктегі консерваторияларны, Хызылчардағы паза Кемеровтағы культура институттарын, Санкт-Петербургтағы хоос академиязын тоозып, амды маңнаныстығ істен парчалар. Кӧзідімге, Е.Шулбаева Таштыпта олған музыка школазынан, устапча, Л.Кирбижекованаң Л.Конышева Ағбандағы музыка колледжінде тоғынчалар, С.Патачакова С.П.Кадышевтің адынаң культура кінінде ДПИ паза ИЗО пӧлиинең устапча, П.Субраковнаң А.Иптышев архитектор полчалар, Р.Чебодаев ювелир чолын таллап алған. Алынҷа Хакасияның чон артизі, «Ӱлгер» ӧменің устағӌызы В.Кученовты таныхтирға кирек. Чайаачы кізі искусство школазында саблығ хоосчы А.В.Доможаковтың холында ӱгренген, амды скульптор даа, хайӌы даа полып сабланча. Прай ӱгренӌілерібіске піс поғдархапчабыс, оларның ӱчӱн ӧрінчебіс.
Пӱӱл пістің школаны тоосханнарның аразында ідӧк теелбек паза артист чолын таллап алған оол-хыстар пар. Ізенчебіс, оларның сағынған сағыстары толар. Республиканың национальнай олған искусство школазының 30 чылын піс кӱскӱзін алғым таныхтирбыс, школаны тоосхан ӱгренӌілерібісті пайрамға хығырчабыс.
Автор :
Пазып алған Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Россияда
Тилекейде