ХАКАСИЯ -ТЫНАНАРҒА ИСТІГ ЧИР
26.07.2016
Хабарлар
Хакасияның туризмӌе хазна комитеді, республикада туристтер санын ӧскірерге пӧгініп, аймах регионнарның туроператорларын чыып, оларға республикаӌа улуғ нимес чорых иртірген. Хакасияның чапсых орыннарынаң танысхан соонда, туризм фирмаларының тоғынҷылары 22 июльда пресс-конференцияда постарының сағыстарынаң ӱлескеннер.
Пресс-конференцияны Хакасияның туризмҷе хазна комитедінің кнес орынңызының тоғызын толдырчатхан Роман Ковтун апарған. Чорыхта Новокузнецктең, Хызылчардаң, Новосибирсктең, Екатеринбургтаң, Германиядаң паза Хыдаттаң килген туроператорлар араласханнар. Пір неделя аразына аалҷылар Сойан-Сус ГЭС-та, Сос пилтіріндегі паза «Хуртуйах тас» музейлерде, «Оғлах тағ» паза Абазадағы аалӌы кіннерінде пол килгеннер. Ідӧк олар Минсуғзар паза Суссар чит пар килтірлер. Туроператорларға чорых тузында аймах гостиницаларда хонарға киліскен, оларның тоғызын аалҷылар паалааннарох.
Хакасияның чир-чайааны, чазыдағы обаалар, хайалардағы хоостар, республикада чуртапчатхан аймах чоннарның культуралары туризм фирмаларының тоғынӌыларының кӧңніне тың кіргеннер. Позының сағыстарынаң «Ах тас» ООО-ның специализі Екатерина Ревицкая ӱлескен: «Шира кӧллерін Кемеров облазының чуртағӌылары чахсы пілчелер. Республиканың ӱстӱнзархы чирлерінде мағаа пастағызын на поларға киліскен. Мині чазыларда олаңай ла турчатхан обаалар тың хайхатхан, андағ ниме паза пip дее чирде таппассың. Ідӧк чорых тузында пісті хакас чонның культуразынаң таныстырғаннар паза ас-тамаанаң азырааннар. Мин санапчам, Хакасияда тынанарға аалҷыларның кӧңніне кірер».
Екатеринбург городтағы «Чорыхтарның королевствозы» ООО-ның директоры Ольга Миронова чоохтаан: «Хакасияда килген кізілерні чахсы удурлапчалар, прай ла регионнарда андағ нимее тоғаспассың. Піс кізілерібісті Москвазар, Санкт-Петербургсар паза Хазанзар ысчаңмыс, амды наа орыннар тілепчебіс. Санапчам, Хакасияда чахсы тынанып аларға чарир».
Туризм фирмаларының тоғынҷылары республикада сервис саринаң читпестер парох тіп таныхтааннар. Иң пастағызы, Хакасияда чоллар тың чахсы ниместер. «Чоллар - ол улуғ ниме, - чоохтапча Новокузнецктегі «Злато-тур» 000-ның директоры Екатерина Ануфриева. - Кӧзідімге, сірернің Сос пилтіріндегі паза «Хуртуйах тас» музейлер пар. Пірсі чахсы чол хыринда орныхча, анда кӧрігӌілер саны кӧп, ікінӌізінзер хомай чолӌа парарға киліскен, аннаңар музейде пістең пасха кізі чох полған». Ідӧк специалисттер республикада хоза гостиницалар паза тынанӌаң базалар пӱдірерге кирек тіп чоохтааннар. Хакасиязар пір саңай кӧп кізі тынанарға килзе, оларға республикада хонҷаң орын читпес. Амғы туристтер гостиницаларның полған на номерінде кондиционер, душ паза туалет кирексіпчелер.
Позының сағыстарынаң Германияның чуртағӌызы Зинаида Галингер ӱлескен. Зинаида Лукьяновна позы Пии аймаандағы Улуғ Нонып аалдаң, кӧп чыллар Цвиккау городта чуртапча. Ол чоохтаан: «Мин Хакасиязар чыл сай тынанарға килчем, тӧреен чирімде прай ниме кӧңніме кірче. Немецтер пістің чоннаң пасхалалчалар. Олар тайғалап паза палыхтап хынып чӧрерлер, че гостиницада кофе-машина чох полза, немецтер чуртирға ынабастар. Сизінгенде, гостиницаларның кӧбізінде иртен чахсы кофе іс полбассың. Паалар саринаң немецтерге Хакасияда тынанарға аарлығ полбас».
Пресс-конференция тузында аалӌылар паза Хакасияның туризмӌе хазна комитеді, пик палғалыс тудып, хада-пірге тоғынарға чӧптес салғаннар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде