МАРҒЫЗАҢ, КЕМ АЗАР!..
29.07.2016
Хабарлар
- И-ика! Хайдағ хандырадыр! Пу сомзар кӧре, кемнің не суға сомары килбинче ни! Абахай іӌенең хызыҷаа, суғда чӱс чӧріп, ибіркіні састарынаң суғнаң чай парчалар. Алай ба, ам даа суға кірбин, сас полызиинаң ӧллен парчатхан даа поларлар.
Мының алнында холнаң чайысчатханнарын на кӧрерге килісчеткен. Пулар, тізең, ағын суғның чарларын узун хара састарынаң ӧллеп турлар. Кӱн сустары киидегі суғда тигір хурынаң ойнапчалар.
Тиктең нимес ипчі кізіні узун сазынаң кӱстіг тіпчелер нооза. Пу ікӧлеңе суғ ниме полӌаң за. Пас азыра nip кӧнек синінҷе суғ тастабысчалар, неке. Аннаңар, ир кізінің холы кӱстіг полза, ипчілернің кӱзі - сазында.
Суғ алтынзар патыбызып, сығара атыххан хыстар оларны кӧрчеткен чар хазындағы кізіні чочыт саларға айабастар. Суғ ээлері бе таң тіп, піреезі хорых парар даа. Хызыҷахтар, тізең, ойда парғанӌа хатхырызып ала, састарынаң амыр суғны чайчадарлар.
Суға сомар тус иртібӧгізер. Аннаңар улуғлар паза кічіглер, тосханӌа сомып, суғда ойнап, тынанып аларға маңзырапчалар. Суғ хазында ізігде дее сӧрӧн пілдірче нооза. Уламох городтаң аалзар тынанып аларға килзе, суғ хазында тус иртірбин пол полбассың. Чайғы тус, тізең, табырах ирт парча. Олған-узахха паза улуғларға тынанар чалахай тус ол полча.
Автор :
Елена ТАГИРА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде