ТИГІРГЕ ХЫНЫС УСПИНЧА
03.08.2016
Хабарлар
Киҷее Ағбанның Чиңіс паркында кии-десант войсколары (ВДВ) кӱніне чарыдылған митинг ирткен. Успас от алнында чон илееде чыылыс парған.
ВДВ Россия армиязының элитазы полча, пу войсколарзар иң чахсыларын на алчалар. Армия службазы чуртаста хайдағ туза ағылғаннаңар ӱлесче десантник Сергей Галицкий.
- Мин службаны 2009-2010 чылларда Тулада ирткем, - чоохтапча Сергей. - Армия кӧп нимее ӱгрет салған. Кӧбізі армиядаң хорыхча. Че полған на оол служба иртерге кирек. 1,5 чыл служба ирткеніме пір дее хомзынминчам. Армия махачы поларға ӱгрет салған. Десант войсколарында служба ирткен кізі прай чуртазына пик хылых алып алча.
Митинг пасталыбысты. Десантниктер Успас от алнында стройға турыбыстылар. Россия гимні ойналған. Алғыстас сӧстерінең чон алнынзар ВДВ ветераннарының республикадағы халых пірігізінің кнезі Владимир Недвецкий сыххан.
- Аарлығ арғыстар, - чооғын пастаан Владимир Иванович, - пӱӱн піс ВДВ тӧстелгеннең 86-ҷы чылын таныхтапчабыс. Ол тус аразына кӧп кирек пол парған: чаалар, чаалазығлар. Хаҷан даа ол чаалазығларда кии-десант войсколары сабланчалар. Пӱӱн піс Чир-суубыс ӱчӱн чуртастарын пир салған арғыстарыбысты сағысха кирчебіс. Оларны хумартхылап, пip минута сым турып алалар. Прайзыңарны ӱлӱкӱннең алғыстапчам. Часкалығ полыңар!
Чооғын тоозып, Владимир Недвецкий прайзына ВДВ кибірлерін ӧсчеткен тӧлге читірерге алғаан. Митингте ідӧк чоох тутханнар Хакас Республиканың ветераннар чӧбінің кнес орынӌызы Юрий Седых паза республиканың чааҷылар комиссарының тоғызын толдырчатхан Сергей Алексашин. Алғыстастар тоозылғанда, пірее десантниктерге медальлар, алғыстас пічіктері паза сыйыхтар читірілген. ВДВ ветераны Владимир Недвецкий «За верность Отечеству» орден таниинаң сыйыхтатхан.
Илбек Ада чаада паза кизек чаалазығларда чат халған десантниктерні хумартхылап, чыылысхан чон Успас от алнынзар чахайахтар салған.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде