ААР ТОҒЫСТЫҢ КӰСТІГ ТОҒЫНҶЫЛАРЫ
05.08.2016
Хабарлар
ЧЫЛ САЙ АВГУСТТЫҢ ПАСТАҒЫ ПОЗЫРАҒЫНДА РОССИЯДА ТИМІРЧОЛӋЫЛАР КӰНІ ТАНЫХТАЛЧА. АНЫ 1896 ЧЫЛДАҢ СЫҒАРА ТАНЫХТАПЧАЛАР. ТИМІР ЧОЛЛАР ХАЗНАНЫҢ ТИЛІЗІНДЕ УЛУҒ ОРЫНДА ТУРЧАЛАР, ААЛ-ГОРОДТАРНЫ ПАЛҒАЛЫСТЫРЧАЛАР. АННАҢАР ТИМІРЧОЛӋЫЛАРНЫҢ ТОҒЫЗЫ УҒАА КИРЕК ПАЗА НАНДЫРЫҒЛЫҒ. МЫНДАҒ ООЙ НИМЕС ПРОФЕССИЯНЫ ТАЛЛАП АЛҒАН ПАВЕЛ МАКСИМОВИЧ КИРБИЖЕКОВ. ОЛ ХЫЗЫЛЧАР ТИМІР ЧОЛЛАРЫНЫҢ АҒБАНДАҒЫ ДИСТАНЦИЯЗЫНДА 21 ЧЫЛ ІСТЕН ПАРИР.
Пӱӱнгі сығарыста аннаң чоохтазып алғабыс.
- Павел Максимович, постарыңнаңар чоохтап пиріңер.
- Мин Ағбан пилтірі аймааның Пӱӱр пилтірі аалында тӧреем. Іҷе-пабам ам даа анда чуртапчалар. Сӧбіре пістің улуғ полған, пис пала ӧскебіс: ӱс харындас, ікі пиҷе. Ортымах школаны тӧреен аалымда тоосхам. Амды Уйбат станцияда тоғынчам, чол мастері полчам.
- Ноғадаңар чуртаста тимірчолҷы профессиязын таллап алғазар?
- Минің ағам Пётр Константинович Кирбижеков - Илбек Ада чаа ветераны. Ол чаа соонаң Ужурдағы палғалыс паза сигнализация дистанциязында тоғынған. Анда ол 1946 чылдаң 1980 чылға теере, тынаға парғанӌа, электромонтер полып істенген. Пабам Максим Петрович ідӧк тимірчолҷы полған. 10-ҷа чыл тимір чолда тоғын салған, анаң Уйбаттағы леспромхозсар парыбысхан. Улуғ харындазым Виталий Максимович армия соонаң ідӧк тимір чолда 9 чыл істенген, соонаң, пабамох чіли, леспромхозсар тоғынарға парыбысхан. Тайым Сергей Петрович Кирбижеков тимір чолда 1990 чылдаң амғы тусха теере тоғынча. Ол оңдайнаң, пістің сӧбіребіс тимірчолҷылар династиязы полча тиирге чарир. Школа тоосхан соонаң мағаа военкоматта, машиналығ чӧрерге ӱгреніп ал тіп, чӧп пиргеннер. Права алып алза, армияда водительӧк поларзың тееннер. 1993 - 1995 чылларда мин Россияның тирігліг кӱстерінде РВСН-да службаны ирткем. Хайди мағаа чоохтааннар, ідӧк киліскен - водитель полғам. Армия соонаң водитель поларға сағынғам, че тайым мині тимір чолзар тоғысха кірерге чӧптеен. Аның сӧзін истіп, Ағбанзар парғам, мында тоғысха алып алғаннар. Іди мин 1995 чылдаң сығара тимір чолда істенчем. Пастап дефектоскопия цеғында он чыл дефектоскопнай тележканың операторы полып тоғынғам, анаң 2 чыл чол монтеры полғам. Соонаң чол бригадиріне турғыс салғаннар. Анда ӱс чыл тоғын салғанымда, пастых миннең чол мастеріне парарзың ма тіп сурған. Мин ынабысхам. Мастер полып 6 чыл істен парим. 1999 чылда Иркутсктағы палғалыс чолларының хазна университедінзер заочно ӱгренерге кіріп алғам. 2005 чылда аны тоос салғам, пӧзік ӱгредігдеңер диплом алып алғам.
- Чол мастері нименең айғасча? Тоғыстарыңда ӧӧні ниме полча тіп сағынчазар? Хайдағ чидіглер пар?
- Минің тоғызымның ӧӧні - тимір чолӌа чӧрісті хорғыс чох идері. Тоғызыбыс пістің сидік, нандырығлығ. Тасхар хайдағ даа соох алай ізіг кӱн турчатса, тоғынчабыс. Аннаңар сизіктіг поларға, тоғасхан сидіксіністерні табырах пӧгерге кирек. Амғы туста тимір чолҷа кӧп ниме тарт чӧрчелер, ол санда кізілерні паза хорғыс ағылчатхан таарлағларны. Ідӧк кізілернің тоғызын, ол тӱзімніг парзын тіп, орта турғызарға кирек. Устағӌы позының тоғынӌыларын чахсы пілерге кирек. Хайдағ чидіглер пар ба? Тоғыс тӱзімніг парчатханы - минің ӧӧн чидиим. Итсе, тоғызымны пастыхтар таныхтааннар: Хызылчар тимір чолларының пастығы Владимир Рейнгардт Аарластығ пічік паза сыйых читірген, ідӧк Хакасия пазы Виктор Зимин Алғыстастығ пічік пирген.
- Тимірчолҷы полбаан ползаңар, кем полып тоғын поларчыхсар?
- Тимірчолӌы полбаан ползам, водитель поларӌыхпын. Олғаннарнаң даа айғазарҷыхпын, кізілернең тоғын полчам тіп санапчам.
- Пос туста нименең айғасчазар?
- Пос туста спортнаң айғасчам: бокснаң, кикбоксингнең, ниик атлетиканаң. Аңнирға чӧрчем, ол минің хынчатхан нимем. Тайғазар парза, чалғызан, постың сағыстарынаң пірдең пірге полып алҷаң оңдай пар. Пірдеезі паза пip дее ниме харығ полбинча, кізі сығдыратпинча. Арығ киинең тынып алчазың. Книгалар, ӧӧнінде детективтер хығырарға хынчам, сын полған нимелердеңер суурылған документальнай фильмнер кӧрчем.
- Чуртазыңарда нимее поғдархапчазар?
- Минің палаларым поғдархазым, ӧрінізім полчалар. Олар ӱзӧлеңнер: пір хыс, ікі оол. Улуғ оолғым - 17 частығ, политехникумда юриспруденция специальностьха ӱгренче. Хызым - алты частығ. Кічіг оолаам - ӱс частығ, ол поездтер кӧрерге уғаа хынча, арса, минің чолым пазар.
- Тимірчолҷы профессиязын таллирға сағынчатхан чииттерге хайдағ чӧп пирерҷіксер?
- Хайди мин чоохтаам, пістің тоғызыбыс нандырығлығ, че хынығ. Сағынған сағыстарын толдырзыннар, пір дее нимедең туртухпазыннар, чахсы ӱгренерге сірензіннер.
Автор :
Чоохтасхан Татьяна КЫШТЫМОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде