ОЛИМП ОЙЫННАРЫ ПАСТАЛЧА
05.08.2016
Хабарлар
Пӱӱн Бразилия кіні Рио-де-Жанейрода чайғыдағы XXXI Олимп ойыннары пайрам кибірли азылча. Аны тилекейдегі иң килкім спорт мариина санапчалар. Пурунғыдаң хайраллал халған Олимп ойыннары тузында хазналар аразындағы даа чаалазығлар ӱр нимеске тохтадылҷаңнар - андағ улуғласха турысчаң чир ӱстӱндегі иң чарых кӧңніліг спорт ӱлӱкӱні.
Тиктең нимес, Олимп ойыннарының ӧӧн хыйғызы - чиңіс тутханы нимес, анда араласханы. Аннаңар даа Олимп ойыннарында араласхан чир-суғӌыларыбыс андағ хайхастығ спорт ӱлӱкӱнінің киречізі полғаннарын хаҷан даа ундутпинчалар. Улуғ хомзынысха, ыраххы Бразилиязар пасхаларынаң тиңни марығлазарға Хакасиядаң пірдеезі парбады. Итсе, Россияның піріктірілген командазына кіріп, Олимп ойыннарында аралазар кандидаттар санында тӧрт тее чир-суғҷыбыс полған.
Пӱӱлгі Олимп ойыннарында, ирткен чыллардағызынаң тиңнезе, прайзының кӧп команда араласчатханы таныхталча. Олимп ойыннарында марығлазарға 206 хазна сурыныс пічиин пиртір. Оларның санында ікі хазна, Косово паза Ӱстӱнзархы Судан, мындағ улуғ спорт мариинда пастағызын на араласча.
Ағаа хоза, 207-ӌі команда санға алылтыр - чаалазығлар алай пірее пасха даа сылтағлар хоостыра постарының хазналарынаң тискен спортсменнер ідӧк Олимп ойыннарында аралазарға пӧгін тутчалар. Олар, алынҷа команда тӧстеп, Олимп флагынаң тузаланарлар.
Санапчам, чапсых полар піліп аларға, хайдағ хазналар чайғыдағы XXXI Олимп ойыннарын постарының городтарында иртірерге пӧгін тутханнар. Андағ сурыныс пічіктері 2007 чылдох кіріп пастаптыр. Олимпиаданың чоннар аразындағы комитеді сыныхтаан соонда, ол-пу хазналар хыйа чат халтырлар. Азах меетке 4 хазна сых килтір: Бразилия, Испания, Япония паза США. Пазох ла сыныхтағлар, талазығлар, чӧптезіглер.
Халғанҷы ӱзӱрігде Олимпиаданың чоннар аразындағы комитедінің членнері піди ӱннерін пирібіскеннер: Бразилия - 66 кізі; Испания - 32 кізі; Япония паза США ӱчӱн пip кізі дее ӱн пирбиндір.
Олимпиаданың чарых оды Бразилиязар пӱӱл 3 майда читкен. Анаң хазнаӌа чорых пастаан. Пӱӱнгі кӱнге читіре ол 300 артиинаң улуғ-кічіг городтарда поларға маңнанған. Іди ол, прай штаттарның ӧӧн городтарын иртіп, Рио-де-Жанейроның ӧӧн стадионы полчатхан «Мараканада» чарых отнаң кӧйібізер, спорт марығларына чол азар.
Пӱӱлгі Олимп ойыннарында пастағызын на гольфча паза регбиҷе марығлар иртерлер. Спорттың пу кӧрімнері хаҷан-да Олимп ойыннарына кірңең полтырлар, анаң хыйа тасталтырлар. Кӧзідімге алза, гольфча 112 чыл мының алнында, регбиӌе 92 чыл мының алнында ирткен Олимп ойыннарында марығ полғаны таныхталча.
Амды пір-ікі сӧс допингнең тузаланған сылтаанда Олимп ойыннарында араласпинчатхан спортсменнердеңер. Мында иң пастап прайзының хайиинда пістің хазнабыс - ниик атлетиканаң айғасчатхан спортсменнер Олимп ойыннарында араласпинчалар. Ідӧк Казахстанның аар атлетиканаң айғасчатхан спортсменнерін марығда араластырбинчалар ідӧк допингнең тузаланған ӱчӱн. Ағаа хоза, Казахстанның штангисттерінің мының алнындағы Олимп ойыннарында утхан медальларын нандыра алып алғаннар. Белоруссияның байдаркалығ паза каноэліг суғҷа чӱсчеткен спортсменнер ідӧк Олимп ойыннарында араласпинчалар.
Хайдағ даа полза, тилекейдегі спорт пайрамы пасталча. Пістің хазнабыстың спортсменнері ӱчӱн «ағырар» тус чит килді.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде