НАА ТИМІР ЧОЛ ПРАЙ САРИНАҢ ТУЗАЛЫҒ
12.08.2016
Хабарлар
Хакасияның пазы Виктор Зимин 10 августта республика правительствозының чыылиин иртірген. Теестегі чыылығда регион устағҷызы Пии аймаанда наа тимір чол паза Хара тас чығҷаң станция азыл парғанынаң, «Синостил инжиниринг и технологии» компаниянаң пірге тоғынардаңар чӧптезіг иділгенінең палғалыстығ сурығларға теелген. Ідӧк пу чыылығда олғаннарны чайғыда тынандырардаңар, мал азиин читкіҷе пилетирдеңер чоох парған.
Правительство чыылиин Виктор Зимин наа устағӌынаң таныстырып пастаан. Хакасияның аң-хустарны паза ибіркі чир-чайаанны хайраллирынҷа хазна комитеді кнезінің тоғызын толдырарға Владимир Лебедев турғызылған.
- Алғыстапчам Сірерні пу нандырығлығ тоғысха турғызылғаныңарнаң паза Хакасияа туза ағылып тоғынарға алғапчам, - теен Хакасияның пазы.
Владимир Лебедев алында пуох ведомствода пӧлік пастығы, чир-чайаанны хайраллирынҷа хазна инспекторы полып тоғынған.
Чыылығның пастағы сурии Пии аймаанда наа тимір чол паза Хара тас чығҷаң тимір чол станциязы азылғанынаң палғалыстығ полған. Хакасияның пазы, ноябрьда федеральнай ӱлгӱ кізілерін паза республиканың партнерларын хығырып, ол проекттің презентациязын иртірерге чахығ пирген.
- Ол уғаа танығлығ кирек. Республикаа ол аймах саринаң тузалығ. Пір саринаң, ол Хакасияның экономиказын, хара тас промышленнозын паза Пиидегі хара тастығ орынны тилідерінде улуғ пӧгінні толдырча, - таныхтаан Виктор Зимин. - Республикаа, тізең, ол - наа тоғыс орыннары, бюджетсер хоза парыстар. Ол ахча пiске уғаа кирек, наа школалар, олғaн садтары, имнег туралары, культура паза спорт объекттері пӱдіриин узарадарына. Че улам чахсы, тимір чол азылғанынаң піс хара тас анирында экологияны хайраллап сыхханыбыс. Пістің ӧӧн пӧгінібіс - промышленностьты тилідерінде республика чуртағҷыларының истіг чуртас оңдайларын хайраллап халары. Пазох таныхтапчам, піс хаҷан даа кӱстенгебіс паза ам даа кӱстенербіс, Хакасияда кізі хазиина паза ибіркі чир-чайаанға ӱрег итпинчеткен предприятиелер полар ӱчӱн.
Хакасияның пазы проектті чуртасха киреріне нандырығлығ хайғаннары паза республика экономиказынзар пілдipте инвестиция киргеннері ӱчӱн, «Еn+» компанияның устағӌызы Максим Соковха, компанияның ээзі Олег Дерипаскаа паза Хызылчар тимір чолының пастығы Владимир Рейнгардтха алғыс сӧстерін читірген.
- Піс пу проектнең февраль айда Хызылчардағы экономика форумына сыххабыс. Мына нинҷе-де ле ай пазынаң аның салтарлары пар, - теен регион устағӌызы.
Хакасияның паза пip тиліпчеткен чолы - таарлағлар тартары. Виктор Зиминнің искіриинең, Сибирь регионнары аразында пу кӧстегӌе пӱӱл Хакасия ла чахсы ӧзіс кӧзіттір. Ідӧк Хакасияның пазы «Ағбан-вагонмаштың» чидіглерін таныхтаан. Республика правительствозы полызиинаң предприятие Россияның арачыланыс министерствозынаң контракт идіп алтыр.
Абазаны паза Тӧӧ пазын азахха турғызардаңар чоох парғанох. Хайди искірген Хакасияның пазы, пу сурығнаң палғалыстығ проект компания кізілерінің хайиин тартхан. Ӱр ниместе Хакасия правительствозы паза пу компания пірге тоғынардаңар чӧптезіг идібіскеннер нооза. Пу компания Тойымдағы заводты пӱдірерінде ӧӧн подрядчик полча. Республика устағҷызы орынҷыларына ол компаниянаң тоғынарын айныдыбызарға чахығ пир салған.
Ідӧк Виктор Зимин наа пӱдірілген музей-культура кіні позына ахча тоғынарға кирек полчатханын таныхтаан. Аны тударына республика бюджедінең ахча хорадылбас ӱчӱн. Наа хоных тӧстепчеткеннерге ЗАГС залын андар кӧзірерге чӧп пирілген. Кӧзідімге республика пазы Шираны алған, анда библиотека паза ЗАГС пip турада орныхчалар.
Олғаннарның чайғы тынаанаңар пастап Хакасияның спорт министрі Валерий Денщиков чоох тутхан. Ол «Пуланнығ кӧл» лагерьдеңер искір пирген. Ирткен айда анда нинӌе-де пала, чииске ооғып, ағырыбысхан полған. Министр ол кирек соонаң лагерьде дезинфекция иртірілген, резервтіг чарытхы генераторы турғызылған, прай тоғынҷыларнаң инструктажтар апарылған тіп искірген. Пӱӱнгі кӱнде лагерь тоғынча, анда 342 олған тынанчаттыр. Хакасияның пазы спорт министріне иділген тоғыс ӱчӱн алғызын читірген.
Хакасия пазының орынңызы Ирина Смолина олғаннарны чайғыда хазыхтандырардаңар искірігні узарадып, пӱӱнгі кӱн-ге прай лагерьлер ситкіп сы-ныхталғанынаңар, прай чит-пестер тӱзеділгенінеңер чоох-тап пирген. Палаларны хазых-тандырч,аң кампания тоозылза, город тастындағы лагерьлер-де тыхтағ тоғыстарын апарар-ынӌа программа тимнирге кирек тіп хосхан ол. Виктор Зимин ол чӧпнең чарасхан паза «Единая Россия» партияны андағ сағыснаң Хакасияның Ӧӧркі Чӧбі пастыра федеральнай ӱлгӱлерзер сығарға сурынған.
Чыылығның халғанӌы сурии аал хонии тоғыстарынаң палғалыстығ полған. Хакасияның аал хонии паза ас-тамах министрi Игорь Гердт республикада мал азиин пилетирінӌе тоғыстар хайди парчатханынаңар искір пирген. Министрнің чооғынаң, пӱӱл мал азии ирткен чылдағызынинаң ікі хати кӧп пилетел парар. Виктор Зимин аал хонии ярмаркаларын тӧреміл иртір турарын ундутпасха паза Ағбан пилтірі аймахтағы Тазоба аалның ӱреге кірген ікі фермеріне хабас пирерге чахығ пирген. Ирткен позырахта чаған улуғ мӱндӱр фермерлер ӧскірчеткен чир тамаан (яблахты, капустаны паза помидорны) прай хырыбыстыр. Амғы туста анда комиссия тоғынча, ӱрег сині саналча паза хабасчаң оңдайлар кӧрілче тіп искірілген Хакасияның пазына.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде