НИКАС САФРОНОВТЫҢ ТАЛЛАМА ХООСТАРЫ
16.08.2016
Хабарлар
Ағбандағы «Чылтыс» кӧзідіг залында «Никас Сафронов. Таллама хоостар» чапсых кӧзідіг тоғынча.
Ағаа удур «Чылтыста» 10 августта пресс-конференция ирткен. Хабарӌыларнаң кӧзідігнің пиар-директоры Юлия Романова тоғасхан. Пастап ол хоосчыдаңар хысхаҷахти чоохтап пирген, анаң чайаачы тоғыстарынаң таныстырған. Юлияның таниинаң, кӧзідігнің ӧӧн пӧгіні - республиканың чуртағҷыларын хоосчының чайаачызынаң таныстырары. Пӱӱнгі кӱнде Никас Степанович Россияда ла нимес, тилекейде иң саблығ хоосчыларның санына кірче. Че Хакасиядағылар аның хоостарын кӧрбееннер.
Кӧзідіглерге хоостарын Н.С. Сафронов позы таллапча. Ағбанзар аймах жанрларда чайалған тоғыстар ағылғаннар. Иліг артиинаң хоос аразында чарымы портреттер полча.
Анзы тиктең нимес, Никас Сафронов кізілерні хоостап сабланған. Кӧзідімге, Софи Марсоның, Наталия Водянованың, Филипп Киркоровтың портреттерін кӧріп аларға чарир. Прайзының хайиин Джонни Деппке чарыдылған хоос тартхан. Анда Никас Степанович саблығ актёрны ла нимес, ідӧк Депп кинода толдырған матырларның омаларын кӧзіт салған. Андағох оңдайнаң Россияның саблығ хоосчызы артист Леонид Филатовтың омазын чайап салтыр.
Кӧзідіг тузында Никас Сафроновтың «Кізілер-аңнар» саблығ сериязына кірчеткен тоғыстарынаң танызып аларға чарир. Пу тоғыстарда ол кізілерге аңнарның сырайларын хоостап салча. Ю.Романованың чооғынаң, Никас Степанович санапча, пірееде хоосханың алай тӱлгӱнің омазы пастыра кізінің хылиин хай-хай чахсы кӧзіт пирерге чарир. Че олох туста пу серия полызиинаң чайаачы ус аң-хустарны, чир-чайаанны хайраллирға кирек тіп таныхтапча. Хабарҷыларның хайиин «Кізілер-аңнар» серияа кірчеткен «Чуртас - ол театр, хайда піс постарыбыстың рольларын толдырчабыс» хоос тартхан. Чиит ипчі ах хоосхаҷахтың масказын кис салтыр, че олох туста пір холында ол тигрнің масказын тутча. Ипчілернің оңдайы андағ, кирек полза, - олар постарын ачыныстығ хоосхалар чіли тудынчалар, че тарындырыбыссаң, ачын аңа айлан парчалар.
Никас Степанович искусствоның аймах кӧстеглерінңе тоғынча, ағаа реализм дее, символизм дее чағыннар. Олох туста хоосчы «Dream Vision» наа стильнің тӧстегӌізі полча, хакас тіліне аны «сағынған сағыстарны кӧргені» тіп тілбестирге чарир. Пу стильде чайалған хоостар тӱстерге тӧӧйлер. Анзын «Полдень. Венеция» паза «Летучий голландец» тоғыстарда сизінерге чарир. Таныхтирға кирек, пу хоостарны Никас Сафронов мының алнында кӧзідіглерге сығарбаҷаң, аннаңар Хакасияның чуртағӌылары оларның пастағы кӧрігҷілері поларлар.
Юлия Романованың чооғынаң, Никас Сафронов 2 муң артиинаң хоос пас салған. Пірее хоостарны ол ікі кӱн аразына чайап салча, пасхаларын чылларнаң пасча. Кӧзідімге, «Тайна ночи, окутанная...» хоосты Никас Степанович 1986 чылда пазарға пастаптыр, пӱӱл ле тоос салған. Кӧзідіг иртірерге Хакасияның правительствозы паза культура министерствозы хабастырлар, аның тоғынҷыларына кӧзідігнің пиар-директоры Юлия Романова алғызын читірген.
Ідӧк «Чылтыс» кӧзідіг залында Никас Сафроновтың альбомнарын, кинделерін паза аның хоостары пастыра иділген сувенирлер садызып аларға чарир полар. Кӧзідіг 11 сентябрьға теере тоғынар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде