ЧЫЫЛЫСХАН ЧОН КӦӦЛЕДЕ САРНАСХАН
17.08.2016
Хабарлар
Иреннердең Михаил Петрович Ачитаевті хығырған. Олар кибірли От инезін азырааннар. Аннаң андар ӱлӱкӱн сценада ирткен. Чон алнына Улуғ Нонып аалның пазы Андрей Петрович Челтыгмашев сығып, килген чонны, алғыстап, алғаан. Аның соонаң Пии аймаа пазы Юрий Николаевич Курлаев чоох тутхан. «Мындағ кічіг аалларға кӱс хозылча, -теен ол, - ӱлгӱ полысча. Сос пилтірі олаңай аал нимес, мында кӧрчезер, хайдағ чахсы музей пар». Анаң ол чыылысхан чонны алғыстаан.
Таныхтирға кирек, Сос пилтірі аал Хакасия пазы Виктор Зимин чуртасха кирген «Хакасияның кічіг паза ыраххы аалларын хайраллиры паза тилідері» республиканың программазына киріл парған.
Ідӧк чоох тутханнар аймах чӧбінің кнезі Галина Михайловна Котельникова, аймах депутады Анатолий Афанасьевич Кайлачаков паза даа пасхалары. Істеніс ветераннарына сыйыхтар читіргеннер. Олаңай кӱресче Россияның саблығ тренері Андрей Алексеевич Карамчаков позының аалына футбол паза волейбол меспектерін сыйлаан.
Чон алнына чарғы приставтары сыхханнар, олар аалға сыйых иткеннер, анаң сайбағҷыларны хайди тудып алчатханнарын кӧзіткеннер. Оларның аразында пір хыс полған, хаҷан ол, сімерке идіп, поғда оолларны тастапчатханда, чон ӧрчіліг хысхырысхан, ӧӧнінде хыстар чізе. Сценаа сарын устары сыхханнар. Оларның аразында Вячеслав Яковлевичнең Евдокия Егоровна Топоевтер морсымнығ сарнабысханнар. Кічіг Ноныптаң килген Федя паза Карина Тюкпеевтер (хада тӧреен харындастар нимес) уғаа махалығ тахпахтасханнар.
Пір ибде ус холлығларның кӧзідіге турғызылған нимелері полған, поғолар паза даа пасха идінҷектер. Че минің кӧңніме Клара Архиповна Колчинаева иткен тоғыстар кірген. Ол чібектернең «Дева Марияның» обрастарын хоостаптыр. Кӧрерге чапсых. Аның хызы Наталья аймах-пасха поғолар, идіп, ағылтыр, Тадина, тізең, хакас кип-азаан кизібістір. Кӱн ортызына чонны иттіг чарба ӱгренең паза иттіг мӱннең, кем ноо чииске хынча, азырааннар. Азыранып, тынанып алған соонда, аймах ойыннар, марығлар ирткеннер.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде