ИМҶӀЛЕРДЕҢ СПРАВКА КИРЕК ПЕ?
23.08.2016
Хабарлар
Школаа пастағы классха парчатханнарға хайдағ пічіктер тимнирге кирек? Имнег туразынаң справка кирек пе ? Имнег учреждениелерінзер теесті хызырарынҷа хайдағ тоғыс апарылча? Пу сурығларға ирткен неделя да Хакасияның хазых хайраллаҷаң министрінің полысчызы Михаил Мальгин, республиканың ӱгредіг паза наука министерствозының ӱгредіг сферазын сыныхтағда тудар пӧлиинің пастығы Лариса Гимазутина паза Ағбандағы олған имнег туразының ӧӧн имҷі орынҷызының тоғызын толдырчатхан Антонина Чебодаева, СМИ тоғынҷыларынаң брифингте тоғазып, нандырғаннар.
Хайди таныхтаан Лариса Гимазутина, школаа ӱгренерге парчатханнардаң алылчатхан пічіктернің списогы Россияның ӱгредіг паза наука министерствозының федеральнай приказында толдыразынаң пиріл парған. Ол списокка хоза пасха пічік сурирға пірдеезіне чарадылбинча.
Ол оңдайнаң, пала пастағы классха парчатса, іҷе-пабазының піреезінің алай ба закон хоостыра аны кӧрчеткен кізінің паспорты, сурыныс пічии, паланың тӧреенін паза регистрациязын киречілепчеткен пічіктер кирек. Олған он классха кірчетсе, тоғыс класс тоос салғаннаңар аттестат киректелче. Пасха класстарға парчатханнарға іҷе-пабазының паспорты паза сурыныс пічии ле кирек. Имҷілердең справка кирек чоғыл.
Че олох туста, имнег тураларында палаларынаң ӱгредіг чылы алнында имҷілерзер кіріп аларға сағынчатханнарның саны илееде. Уламох кізілер Ағбандағы олған поликлиниказында теес улуғ полчатханына хоптанчалар, ӧӧнінде харах имҷізінзер. Ноғадаңар андағ? Пу сурыға Хакасияның хазых хайраллаҷаң министрінің полысчызы Михаил Мальгин нандырған. Хайди ол таныхтаан, олғаннар школа алнында имнег комиссиязын иртерге киректер. Че мында школазар справка аларынаңар чоох парбинча. Имҷілернің ӧӧн пӧгіні - школаа парар олғаннарның хазиин сыныхтиры. Аны хоостыра ӱгредіг учреждениезінде палаа килістіре ӱгренер оңдайлар кӧрілчелер.
Кӧзідімге, харахтары чітіг полбаза, олғанға алнындағы парта кистінде одырарға чӧп пирілче. Аның пірее нимее аллергия полза, анзын ідӧк санға алчалар. Мындағ имнег комиссиязын часхызын, чайғы пасталчатса, алай кӱскӱзін дее иртерге чарир.
Имҷілерзер теестерні хызырарынҷа кӧп тоғыс апарылча, теен Михаил Григорьевич. Хакасияның хазых хайраллаҷаң министерствозының порталында электроннай регистратура пар. Анда хайдағ даа имҷізер азынада пазын саларға чарир. Интернетнең тузаланминчатхан кізілернің 8(3902) 305-553 телефонҷа республиканың имнег учреждениелерінің специалисттерінзер пазынҷаң оңдай пар.
Алынҷа Ағбандағы олған имнег туразынаңар чоох парған. Мында имҷілер чидіспинчеткенінеңер сурығ ағырсымнығ полча. Пӱӱнгі кӱнде пір ле харах имҷізі тоғынча, пірсі сағам тынағда, че сентябрьдаң ол тоғысха сығар. Аннаңар теес хызырыларға кирек. Пӱӱл ідӧк имнег туразынзар чиит специалисттер тоғынарға килтірлер. Ол санда ікі невролог, участковай педиатр, отоларинголог паза имҷі-лаборант. Пу чонға имнег полызиин пирерін чахсыландырарына улуғ хозым.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы