ЖКХ ПОЛНОМОЧИЕЛЕРІ ААЛЛАРҒА ААР ЧӰК
26.08.2016
Хабарлар
Хакасияның Ӧӧркі Чӧп президиумы 24 августта теестегі чыылиин иртірген. Ӧӧркі чӧптегілер пу чыылығда 10 артиинаң сурығ кӧрібіскеннер. Чыылығны Ӧӧркі Чӧп кнезі Владимир Штыгашев апарған.
Ӧӧн сурығларның пірсі «Хакас Республикада кинектерге тоғыс орыннарынҷа квота паза резерв идердеңер» республика законынзар алызығлар кирердеңер полған. Пу сурығҷа Хакасияның чонға тоғыс тапчаң хазна комитедінің кнезі Ирина Ахметова чоох тутхан. Хайди ол таныхтаан, республика законынзар алызығлар аны федеральнай законодательстваа килістіре тӱптестірер паза право саринаң сығысчатхан читпестерні чох идер пӧгіннең кирілчелер. Право саринаң тузаланысты алза, хонҷых регионнарда санға алылған, че Хакасияда тоғынчатхан пірее предприятиелер постарында кинектерге квоталығ орыннар тударға кирек чоғыл тіп санапчаттырлар. Республика законы тӱптестірілзе, оларны, ікінҷілес чох, кинектерге тоғыс орыннарын тударға кӱстирлер.
Республикада чонға тоғыс тапчаң органнарзар чыл сай 600 артиинаң кинек айланчаттыр. 2016 чылға кинектерге 599 тоғыс пирчеткен пірігісте 1155 квоталығ орын кӧріл партыр. Че, кинектерге прай ла тоғыс килістіре ниместеңер, ол тоғыс орыннарының 476-зы пос халтыр.
Ідӧк депутаттар пу чыылығда ЖКХ сферазындағы полномочиелерні ааллардаң муниципальнай аймах синінзер пирібізердеңер закон проектін кӧрібіскеннер. Мындағ пастағнаң Асхыс аал чӧбінің Депутаттар чӧбі сыхтыр. Асхыс аал чӧбінің пазы Марина Анжиганова, пу сурығҷа чоох тудып, ЖКХ сферазындағы полномочиелер аалларға аар чӱк полчатханын таныхтаан. Аның искіриинең, ааллар пӱӱнгі кӱнде ахча саринаң уғаа сидіксіністіг оңдайда пол парғаннар. Ахча паза кадрлар чохтаңар, аалларда ЖКХ управлениезін тӧстирге оңдай чоғыл осхас. Олох туста аймах синінде андағ структура пар паза тӱзімніг тоғынча тіп таныхтаан Асхыс аал чӧбінің пазы.
Че Ӧӧркі чӧптегілернің мында кӧп сурығлар сығысхан, ол санда предприятиелер пир салған полызығлар ӱчӱн алымнар, котельнайлар паза чылығ пирҷең сетьтер хайдағ оңдайда полғаны.
- Пу сурығ таластар сығарча. Закон проектін Хакасияның пазына ызыбызарға кирек, республика ӱлгӱлері хоза ахча хорадығлары киректелер бе алай чох па кӧрібіссіннер. Ідӧк муниципальнай аймахтарның паза аалларның пастарына, оларның кӧрістерін піліп алар ӱчӱн. Анаң піс пазох, комиссия чыып, чарадығ аларбыс, - пу сурығҷа таластарны тохтадып, салтарлар иткен Ӧӧркі Чӧп кнезі Владимир Штыгашев.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде