ХАДА ТОҒЫНАРҒА ТИМДЕЛЕР
26.08.2016
Хабарлар
Пу неделяда Хакасияның хазых хайраллаҷаң паза сағыбаан саайларҷа министерстволарының, республиканың катастрофаларҷа имнег кирее кіні (РЦМК) чолда транспорт саайланғанының салтарларын чох идерінде пірге тоғыс апарарынҷа ӱгредіг иртіргеннер.Ӱгредігнің полтазы хоостыра, Ағбан - Саяногорск федеральной чолның 58-ҷі километрінде, Алтай аймааның Тустығ кӧл аалының хыринда, ікі автобус уруныс парған, 50 азыра кізі палығлат салған.
Иң пурун ДТП пол парған чирзер ӧрт ӱзірҷеңнер паза арачылағҷылар читкеннер. Оларның ӧӧн пӧгіні - палығлат салған кізілерні изелген транспорттаң сығарып, имҷілернің холына пирері паза ӧрт сығарына хорғысты чох идері. МЧС тоғынҷыларының соонҷа Хубачар паза Новороссийскай аалларның табырах имнег полызии машиналары килгеннер. Имҷілер, саайланған кізілерні кӧріп, пастағы имнег полызиин пиргеннер. Арачылағ тоғыстарының устағҷызы тың аар палығлат салған ікі кізіні вертолетнаң апарарға чарадығ алған. Анзына Сибирьдегі арачылағ авиация кінінің ӧнетін МИ-8 вертоледы хығыртылған. Аннаң килген Ӱстӱнзархы Сибирьнің тілег иртірчеткен арачылағ отрядының арачылағҷылары паза имҷілер аар палығлатхан кізілерні Хызылчардағы ожоговай кінзер апарыбысханнар. Пасхаларын Хубачардағы имнег туразынзар апарғаннар. Имҷілер паза арачылағҷылар тоғынчатхан туста, МВД тоғынҷылары пасха транспорттарның чӧрізін, кізілернің иптіг тудынарын сыныхтағда тутханнар.
Хайди таныхтаан РЦМК-ның устағҷызы Евгений Казаков, мындағ улуғ ДТП пістің регионда полбаан. Че саай пол парза, кізілернің чуртастарын хайраллап халар ӱчӱн, аймах ведомстволарға хада-пірге тоғысты тӱзімніг апарарға кирек. Пу ӱгредіг иртіріл парғанда, учурир сидіксіністер, сурығлар ілезіне сығарылған. Амды республиканың службалары сағыбаан саайның салтарларын чох идерге тимде поларлар.
Сығысхан сурығлар ам даа ӱзӱрілер. Ӱгредіг кӧзіткен: чолда «пол парған» килкім саайның салтарларын чох идерінде араласхан прай ведомстволар чахсы тоғынғаннар. Оларның хада-пірге тоғынары, палғалыс тудары пӧзік синде.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде