ТӦӦ ЧИРІНІҢ ООЛ-ХЫСТАРЫ КӰСТЕРІНЕҢ СЫНАСХАННАР
26.08.2016
Хабарлар
Асхыс аразынҷа тоғыс киреенҷе хайын чӧрчеткенімде, Ӱс чулдағы культура кінінің устағҷызы Людмила Самуиловна Боргоякова тоғас парған. Ол мағаа аалда ирткен пайрамнаңар чоохтап пирген.
- Пу ирткен неделяда, орғах айының 19-ҷы кӱнінде, Тӧӧ істіндегі аалларның чииттерін чыып, чииттер ӱлӱкӱніне чарыдылған пайрам иртіргебіс. Пу ӱлӱкӱнні сыбыра иртірчебіс. Пылтыр киліспин парған, ахчанаң чуға пол парған. Пӱӱл, тізең, піске хаҷан-да мында тоғынған ӱгретчілер паза КФХ-дағылар пірер муң салковай ахчанаң полыс пиргеннер.
Ӱлӱкӱнні кибірли пастаабыс. Чииттер сарыннар толдырғаннар. Анаң ойыннар пасталғаннар: пағ тартысханнар, азахха хап кизіп чарысханнар, теннис ойнааннар, столбаа сыхханнар паза кӱрескеннер.
Ӱлӱкӱнде уғаа чахсы айас кӱн тур пирген. Кӱресте улуғ кӧдірімніг ооллар аралас полбааннар. Чахсы кӱн турчатханда, олар от тоғызына чӧрібіскеннер.
Пағ тартысханда, пастағы орынны Индіркі тӧӧдегілер утханнар, ікінҷі орында - Ӱс чулдағылар, ӱзінҷі орында - Оот пилтіріндегілер. Азахха хап кизіп чарысханда, пастағы орынны Индіркі тӧӧдегілер алғаннар, ікінҷі орынны - Чоғархы тӧӧдегілер, ӱзінҷі орынны -Иллимордағылар.
Столбаа сығарында пастағы орынны алған Витя Тюкпиеков, ікінҷі орынны - Аймир Кичеев, ӱзінҷі орынны - Артём Кичеев. Столбаа сыхханнарға магазинде тоғынчатханнар, Надежда Николаевна Куюкованаң Мария Михайловна Топоева, сыйыхха 10 кг ун, 5 кг сахар, 2 литр чағбан хайах читіргеннер.
Теннис ойында Айвар Субраков пастағы орын алған, ікінҷізін - Карим Кольчиков, ӱзінҷі орынны - Дмитрий Тюмереков.
Хол пазызында пастағы орынны Айвар Субраков (Индіркі Тӧӧдең) алған, ікінҷі орынны - Михаил Иптышев (Оңхак аалдаң), ӱзінҷізін - Дима Бурнаков (Ӱс чулдаң). Хыстар аразында пастағы орынны Вика Сагалакова (Индіркі Тӧӧдең) алған, ікінҷі-узінҷі орыннарны Таня паза Айлана Бурнаковалар холға киргеннер.
Кӱресте 58 кг кӧдірімде пастағы орында Семён Пастаев полыбысхан, ікінҷі орында -Альберт Пастаев (ікізінең Ӱс чулдаңнар), ӱзінҷізі - Рустам Албычаков. 66 кг кӧдірімде пастағы орында - Денис Кичеев, ікінҷі орында - Мартин Томочаков, ӱзінҷі орынны алған Степан Судочаков. 74 кг кӧдірімде пастағы орынға сыххан Аймир Тюкпиеков, ікінҷізіне - Сидор Кузьмич Казагашев (ӱгретчі), ӱзінҷі орынға - Павел Пастаев. Абсолютканы утып алған Айвар Субраков.
Флешмобтаң марығ полған. Пастағы, ікінҷі орынға талазығ парған, анаң І-ғы орынны Оот пилтіріндегілерге паза Ӱс чулдағыларға пирібіскеннер, ікінҷі орынны пірдеезіне пирбееннер, ӱзінҷі орынны Иллимордағыларға пирібіскеннер.
Иирде, тізең, чонға концерт турғызылған.
Таныхтирға кирек, уғаа татхыннығ ӱгрені хайнатханнар Валентина паза Татьяна Бурнаковалар. Пасха чиистерні (помидор-ӱгӱрсӱлерні, вареньелерні) культура тоғынҷылары ағылғаннар.
Ахчанаң полысхан улусха, пасха чирлерзер тоғынарға парыбысхан ӱгретчілерібіске, Валентина Степановна Томочаковаа, Нина Самуиловна Мамышеваа, Мира Михайловна Бурнаковаа, Виталий Борисович Боргояковха, Дмитрий Владимирович Боргояковха паза культурада тоғынған Артём Боргояковха, алғызым читірчем. Ідӧк «Атлант» устағҷыларына, Сергей Юрьевич Таначаковха, Евгений Валерьевич Кольчиковха, алғызым читірчем.
Хада тоғынчатхан нанҷыларыма, ӱлӱкӱн иртірерге полысхан улусха, чир-суғҷыларыма прайзына ідӧк улуғ алғыс.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде