НАА ОЙЫННАР, ХЫНЫҒ ЧОРЫХТАР ПОЛАР
26.08.2016
Хабарлар
Хакасияның A.M. Топановтың адынаң национальнай драма театры пӱӱл пайрамнығ 85 чылын таныхтирға тимненче. Аннаңар театрның чайаачы ӧмезі наа ойыннар турғызарға, узах чорыхтарға сых турарға пӧгін тутча.
Санапчабыс, кӧрігҷілерге чапсых сыйых полар писатель-нымахчы Редьярд Кипплингтің «Джунглинің книгазы: Маугли харындастар» нымаа хоостыра турғызылған мюзикл.
Театрыбыстың пайрамын таныхтирға мындағ пӧгіннер аларға тідінмесчікпіс тее, сынап Россияның театр деятельлерінің пірігізі піске ахчалығ грант пирбеен полза. Ол грант, тізең, олғаннарға паза саарбахтарға ойыннар турғысчатхан театрларға хазна паза халыхтар полызиин пирчеткен программада кӧріл парған. Программа Россия президентінің сыныхтаанда.
Амды ойын турғызарына тимнегліг тоғыс парча. Табырах алысчатхан сіліг орыннарны киртістіг кӧзіт пирер ӱчӱн, чарытхының аймах оңдайларын толдыразынаң тузаланарға харасчалар. Ойынны пістің чирге чағыннадып алар ӱчӱн, «Хазыр суғ» чайаачы ӧме хакас кӧглерін пуӱнгі кӱнге килістіре толдырар.
Паза пip ӧріністіг кирек. 2015 чылда «Харах чохтар хазназы» ойынны турғызарға Россияның культура министерствозы ахчалығ грант пирген полған, Амды ол ойынны чоннар аразындағы национальнай театрларның III фестивальында кӧзідерге хығыртығ килген. Ол «Алтан Сэргэ» адалча. Фестиваль пӱӱл 12-18 сентябрьда Бурятияда иртер.
Автор :
Светлана СЕЛИГЕЕВА, Хакасияның А.М.Топановтың адынаң драма театрының литература пӧлиинің устағҷызы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде