ХАЗНА ХАЗЫХХА ПАЗА СПОРТХА УЛУҒ ХАЙЫҒ САЛЧА
31.08.2016
Хабарлар
Тиксi Россияда «Россияныц хазых ӱгретчізі-2016» VII марығның республика ӱгретчілері аразында чиңісчіні табары иртірілген. Пу марығда 14 ӱгретчі араласхан, олардаң 6 кізі чиңіс ӱчӱн марығласхан.
Ӱгредіг паза наука министрінің орынҷызы Юрий Сагалаков, марығны азып, чоох тутхан: «Пістің хазна спортха паза чон хазиина улуғ хайығ салча. Пістің республикада стадионнар, спорт площадкалары, спортзаллар, чӱгӱрҷең чоллар пӱдiрiлчелер. "Хазых ӱретчiзi» Россия мариинда читінҷі хати араласчабыс. Хакасияның ӱгретчілері сыйыхтығ орыннарға турысханнар. Піс пу тоғысты узаратчабыс. Пӱӱлгі марығда Россия синінде утарбыс тіп ізенчем. Талаан ползын прайзына!»
«Россияның хазых ӱгретчізі-2015» марығда ирткен чылда араласхан Елена Ковко Саратов городта регион синінде ирткен марығда чиңісчі полыбысхан. Пiстiң республикада спорт тилізі чахсы апарылча, Москвадаң алай пасха регионнардаң халбинча тіп таныхтаан Елена Александровна.
Марығ комиссиязының кнезі педагогика наукаларының кандидады, Н.Ф.Катановтың адынаң спорт паза физкультура теориязының паза методиказының кафедра устағҷызы Александр Фоминых полған.
Марығ ікі номинацияа чарылған. Пастағызын «Мин - хазых ӱгретчізібін» марығ полған. Ӱгретчілер постарынаңар искіргеннер паза
пілістерінең ӱлескеннер. «Минің чуртазым - кӱрезіг паза чиңіс» хыйғынаң чон алнынзар Евгения Боргоякова сыххан. Ол Пии аймаандағы Куйбышевтегі школа-интернаттың ӱгретчізі полча. Евгения Иннокентьевна ағырсымнығ сурығлардаңар чоохтаан: ӱгредігні аймах частығ палаларнаң апарарға килісче, спортзал чоғыл, техническай база читкіҷе нимес...
Уроктар тузында олғаннарнаң кӧгліг кӧніктіріглер пӧкчеттірлер. Хазых хайраллапчатхан технологияларнаң тузаланып, харахтарға, тынысха гимнастика иртірчелер, пір ӧменең тудынарға ӱгренчелер.
Олег Торбостаев олаңай кӱресче РСФСР-ның спорт узы полча. Ол Хубачардағы «Аймахтағы олғаннар паза чииттер спорт школазында» тренер-ӱгретчі полып тоғынча. Олег Константинович «Хазых ит-ханда - хазых хут» чарлағнаң сыххан. Аймах марығларда сыбыра араласчатхан ӱгретчі ӧме аразында хазых чуртас апарарын таратча. О.К.Торбостаев тоғысты кибірліг паза кибірліг нимес оңдайларнаң апарча осхас.
Н.Ф.Катановтың адынаң хакас национальнай гимназияның чиит ӱгретчі-организаторы Леонид Карачаков хакас «TIMIRmatыг» хазыхты хайраллаҷаң технологиялардаңар чоохтаан.
Харатастаң Евгений Концеренко 5 № ортымах ӱгредігліг школада физкультура ӱгретчізі полча. Чиит ирен «олғаннарны тилідіп, посха тилирге кирек» тіп санапча. Евгений Анатольевич пасха марығҷылар аразында чалғыс физкультура ӱгретчізі полған. Олғаннарын сценаа сығарып, гирялар хапханнар, волейбол, футбол ойынын кӧзіткеннер.
Татьяна Колпакова НФ. Катановтың адынаң хакас национальнай гимназияда организатор ӱгретчі паза орыс тілінің ӱгретчізі полча. Татьяна Альбертовна марыға чахсы тимнентір.
Ікінҷі марығ «Хазых культуразы» полған. Ӱгретчілер чайаачыларын кӧзіткеннер. Мында Олег Торбостаев кӱрес кӧзіткен, Татьяна Колпакова орыс тілінің урогын апарған, кем-де сарнап пирген.
Салтарында жюри I орынны Евгений Концеренкаа пирген. II паза III орыннарда Татьяна Колпакова паза Леонид Карачаков полыбысханнар. Пасхазына, араласхан ӱчӱн, дипломнар пирілген.
Марығда аралазарға прайзының кӧңніне кірген тиирге кирек. Олег Торбостаев пастағызын мындағ марығда аралазарға килісті теен. Теория саринаң пічіктер мариинда утып алғанда, практика саринаң чон алнынзар сығарға кирек.
Хайди пілчебіс, олғаннарны ӧӧнінде школада спортха кӧніктірчелер. Ӱгретчілер, тізең, палалар спортнаң ынағлассыннар тіп, прай кӱстерін салчалар.
Автор :
Елена САГАТАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде