«АЛЫП ІЗІНҶЕ» - 21 КӰН
31.08.2016
Хабарлар
Республикадағы чазы читкелектерге социальнай реабилитация кінінің тоғызының пірсі олғаннарға чайғызын хазыхтарын пиктирі полча. Чыл сай чайғы туста кіннің пӧлиинде хазых пиктеҷең лагерь тоғынча. Лагерь - ол ӱр нимеске чуртаҷаң орын на нимес, хайда олғаннар паза саарбахтар постарына тузалығ пілістер алчалар, наа киректернең танысчалар, пос тусты хынығ иртірчелер, че ол ідӧк оларның чуртастарында уғаа танығлығ тус полча, хайзы оларның чайаачы, спорт паза пасха оңдайларын азарға полысча.
Хазых пиктеҷең лагерьнің тоғызы тузында учреждениенің тоғынҷыларының ӧӧн пӧгіні - олғаннарның хазиин пиктиріне, тынанарына, реабилитациязына паза каникулларны тузалығ иртіреріне килістіре оңдайлар тӧстирі, хазых чуртас апарарына кӧніктірері.
«Алып ізінҷе» хазых пиктеҷең программа чайғызын чуртастың сидік оңдайларына кір парған олғаннарның хазыхтарын хайраллирына, чайаачы кӧңнілерін паза пілістерін тилідеріне кӧстелген. Программаның ӧӧн кӧстее олғаннарны постарын ибіркінең паза чон культуразынаң танызарға тартары полған. Тиктең нимес, программаның пӧгіннерін толдырар ӱчӱн, ол ойын пастыра чуртасха кирілген. Тиксі смена тооза, 21 кӱн, ойын парған. Аның полтазы хоостыра олғаннар отрядтарға піріктірілгеннер, анаң Хуртуйах чідірген хайхастығ монҷыхтарны тілирге чорыхха ызылғаннар. Полған на отрядха монҷыхтарны чыырға чіп пирілген, хайзыларын олар марығларда паза чарыстарда ут турған ӱчӱн алғаннар. Монҷыхтар аймах ӧңніг полғаннар. Полған на ӧң программаның кӧстеглерін таныхтаан. Иң кӧп монҷых чыып алған отряд чиңен.
Смена ирткен туссар чорыхтаңар ойын пасталған, хайзы Хуртуйах тастаңар кип-чоохха чарыдылған. Олғаннар «Алып ізінҷе» программа хоостыра Хойза пилтірі аалның музей-ибіҷеензер чӧргеннер, «Хаҷан чатхан сарнапча» экскурсия-чоохтазығда араласханнар. Ідӧк Литература кӱні иртірілген. Олғаннар Николай Доможаковтың чайаачызынаң танысханнар. Аннаң пасха олғаннар Хакасияның хоосчыларынаң, хакас чонның кӧг инструменттерінең, ойыннарынаң паза хумартхыларынаң танысханнар.
Автор :
Ольга ОРЕШКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде