ХАРАҒАЙ ПААРЫНЗАР ЧОЛЫБЫС СООБИНЧА
02.09.2016
Хабарлар
Хакасияда 2013 чылдаң сығара «Кічіг паза ыраххы аалларны хайраллиры паза тилідері» программа маңнаныстығ тоғынча. А.М. Топановтың адынаң хакас драма театрының ӧмезі ол программада ӧткін араласча. Иткен тоғыстаңар пістің хабарҷаа театрның директоры Владимир Владимирович ЧУСТЕЕВ чоохтап пирген:
- Театрның артисттері гастрольларнаң Хакасияҷа удаа чӧрчелер, аннаңар піс аалдағы чонның чуртазынаң чахсы таныспыс. 2013 чылда Хакасия пазы Виктор Михайлович Зиминнің кӱстенізінең республикада «Кічіг паза ыраххы аалларны хайраллиры паза тилідері» программа тоғын сыххан. Ол программа сылтаанда аалларда ӱс чыл аразына чуртас харах кӧреде алыс парған.
Мында чахсы кӧзідім Таштып аймаандағы Харағай паары аал полча. Пу программаа ол аал 2013 чылда кір парған. Ӧӧн тоғысты культура министерствозы апарча, Хакас драма театры ағаа хабасча. Таныхтирға кирек, Харағай паарынаң кӧп саблығ кізі сыххан, кӧзідімге, композитор Георгий Иванович Челбораков, журналист Евдокия Михайловна Кильчичакова, ырҷы Нина Серафимовна Идимешева.
Ӱс чыл аразына аалда кӧп ниме иділ парған. Аалда пip орама, аны асфальтнаң чабысханнар, тасхар чарытхы тартыбысханнар, олғаннарға ӧйнаҷаң ачых сыйлап пиргеннер. 2014 чылда Харағай паарында наа социо-культурнай кін азылған. Театрлар паза республика культура учреждениелерінің кӱстенізінең кінде компьютер, музыка аппаратуразы, улуғ телевизор, теннис ойнаҷаң стол паза спутниковай антенна пар. Амды социокультурнай кінде библиотека тоғынча, олғаннар сарнирға, теелбек саларға ӱгренчелер. Пос тус полза, аалдағылар кино кӧріп алчалар.
Амды культура министерствозы, аалда туризм тилідерге пӧгініп, «Харағай паарының тынызы» этно-культура кінін пӱдірче. Пір чурт паза мылча ирткен чылдох тимде полғаннар, пӱӱл тоғыс узарадылған. Харағай паарының чуртағҷыларынаң піс пик палғалыс тутчабыс, аалзар ікі айда nip хати хайди даа пар килчебіс. Пӱӱнгі кӱнде аалда 50 артиинаң кізі чуртапча, театр тоғынҷылары оларны прайзын чахсы таныпчалар.
Чыл сай піс «Читіген», «Нымах» паза Орыс драма театрынаң хада Харағай паарындағы кӧп палалығ сӧбірелерге олғаннарны школаа тимнирге полысчабыс. Ӱгренҷілерге кип-азах, ӧдіктер, тетрадьтар, ручкалар ал пирчебіс. Аалдағыларға сыбыра аймах концерттер, ойыннар иртірчебіс. Спектакльларны Пыдырах аалда кӧзітчетсебіс, Харағай паарындағы олғаннарны автобуснаң ӧнетін тарт килчебіс.
Таныхтирға кирек, кізілер постары кӱстенчетсе, оларға полызарға даа ниик. Кӧзідімге, аал чуртағҷызы Олег Юрьевич Боргояков кресен-фермер хониин тӧстеп аларға сағынған. Піс ағаа кирек пічіктер тимнирге полыс пиргебіс. Олег Боргояков Хакасияның аал хонии паза ас-тамах министерствозының грантын утып алған, ол ахчаа фермер трактор паза хойлар алып алған. Амды кӱлӱк кізі маңнаныстығ тоғын парча. Программа тоғынып пастабысханда, аалзар ағырин-кӧӧлҷе кізілер айлан сыхханнар. Піреезі, іҷе-пабаларының чуртын тыхтап, мында, тынаға сых парза, чуртирға сағынча.
Ағбандағы идінҷек Владимир Петрович Чебокчинов, тізең, аалда туризмнең айғазарға пӧгінче. Ол Харағай паарында хакас ибін пӱдір салған. Анзынаң республика программазы маңат, ол пос киреенең айғазарға сағынчатхан кізілерге хабасча. Піди кӧрзе, прай ниме -постаң, че олох туста кізілерге кӧмес хабас пирзең, олар матап кӱстен сыхчалар.
Пасха кічіг паза ыраххы аалларны Хакас драма театры ідӧк хайығ чох артыспинча. Пістің артисттерібіс андар гастрольларнаң сыбыра пар килчелер. Олғаннарға кӧп ойын турғысчабыс, оларны кічігдең сығара театрға кӧніктірерге кирек. Пӱӱл чиит артисттер палаларға «Анзы ӧӧні нимес», «Клочки по закоулочкам» паза «Машаҷахтың тӧреен кӱні» спектакльларны кӧзіткеннер. Улуғлар, тізең, «Сині сағыпчам», «Хан Мирген», «Смешанные чувства» паза «Примадонны» ойыннарны хынып кӧріп алғаннар. Кӧні чоохтаза, мындағ чорыхтар театрға парыс ағылбинчалар, че аал чуртағҷыларына ӧрініс сыйлирын хаҷан даа тохтатпаспыс.
Мының алнында, артисттер аалзар килзелер, клубта пос орын чох полҷаң. 1990 чылларда, хазнада чуртас сайбал сыхханда, чон театрдаңар ундут салған. Амға теере кӧрігҷілерібісті прайзын театрзар айландыр полбинчабыс. Ол тоғысты піс узарадарбыс. Пӱӱл кӱскӱзін, 85-ҷі сезон азылза, кӧрігҷілерні кӧп чапсых ниме сахтапча. Піс оларны, тізең, наа ойыннарнаң ӧріндірерге кӱстенербіс.
Автор :
Пазып алған Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде