ӰС ЧУЛДАҒЫ ӰБӰРҶЕҢ ОРКЕСТРНІҢ ТӦСТЕГҶІЗІ
02.09.2016
Хабарлар
Ирткен чылда 4 сентябрьда ах чарыхтаң парыбысхан чалахай, уғаа чахсы кізі паза музыкант Владимир Аверьянович Албычаков. Ол хысха, че толдыра, пай чуртазын тӧреен аалында иртір салған.
Владимир Аверьянович Албычаков 1952 чылда 27 январьда Асхыс аймааның Ӱс чул аалында тӧреен. Аалдағы ортымах паза музыка школаларын 1969 чылда тоозып, ол Ағбандағы музыка училищезінзер ӱгренерге кіріп алған. Мында Владимир Албычаков ӱбӱрҷең кӧг тиріглерінің пӧлиинде «валторна» классча ӱгренген. 1971 чылда ол армия службазына алылған. Соонаң ол, музыкант полып, чааҷылар оркестрінде службазын иртче.
1978 чылда Владимир Аверьяновичті Ӱс чулдағы олған музыка школазының директорына турғыс салғаннар, аннаң ол 2014 чылның октябрьына теере устаан.
Владимир Аверьянович Ӱс чулдағы аал чӧбін паза музыка школазын тилідеріне уғаа кӧп кӱс салған: ӱбӱрҷең оркестр тӧстеен, Индіркі Тӧӧ паза Полтах аалларда музыка школазының пӧліктерін асхан. В.А.Албычаковтың кӱстенізінең музыка школазы искусстволар школазы пол парған. Анда хоза хоос, теелбек паза ДПИ класстарын асхан. Аныңох кӱстенгенінең искусстволар школазына 2012 чылда Л.Н. Бурнаковтың ады пирілген.
Владимир Аверьянович ӱбӱрҷең оркестрінең нинҷе-нинҷе хатап республиканың аймах марығларында Асхыс аймаа ӱчӱн турысчаң, сыйыхтығ орыннар алҷаң. Совет Союзының, Россияның чуртазында полған улуғ алызығлар тузында даа Владимир Албычаков ӱбӱрҷең оркестрні хайраллап халған. Асхыс аймаанда мындағ чайаачы пір ле ӧме халған, тиксі Хакасияда, тізең, пос кӧңнінең тӧстелген ӱбӱрҷең ӱс ле оркестр халған.
1990 чылда Владимир Аверьяновичті СССР-ның культура министерствозы «Тӱзімніг тоғызы ӱчӱн» танығнаң таныхтаан. 1993 чылда ағаа «Хакас Республика культуразының саблығ тоғынҷызы» аарластығ ат пирілген. Пір ле кізінің кӱстенізінең тиксі оркестр тудылған.
Хаҷан Владимир Аверьянович ах чарыхтаң парыбысханда, ідӧк ӱбӱрҷең оркестр «парыбысхан», анзы ачырғастығ. Амды саблығ оркестр Ӱс чулда даа, Асхыс аймаанда даа чоғыл!
Музыка школазында ӱгретчі паза директор полып істеніп ала, Владимир Аверьянович пӧзік ӱгредіг алған: 1991 чылда ол Кемеровтағы культура хазна институдын «Пос кӧңнінең тӧстелген ӱбӱрҷең паза эстрада инструменттері оркестрінің устағҷызы» специальностьча тоосхан. 1996 чылда аал чуртағҷылары аны Ӱс чул аал чӧбінің пазына тапханнар. Анда Владимир Аверьянович 1999 чылға теере тоғынған. Ол тирең пілістіг паза тоғызына тӱгеде пирін салған кізі полған. Аны хада тоғынған кізілер прайзы улуғлаҷаң.
ЬІраххы 1974 чылда Владимир Аверьянович Степанида Исаевнанаң хоных хонған. Ынағ сӧбіре матлама палалар (Оксана, Ольга, Леонид) паза пархалар ӧскірген. Владимир Аверьянович сӧбірезіне чылығ паза улуғ паарсаснаң хайҷаң.
Владимир Аверьянович Албычаков палаларының, пархаларының, хада тоғынғаннарының паза ӱгренҷілерінің сағызында саңайға халар.
Автор :
Келемана БАРАШКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде