ААЛҒА КӦГЛЕР ЧАЙЫЛҒАН
02.09.2016
Хабарлар
Календарь хоостыра чайғы кӱннер тоозыл пардылар. Чайғы кӱннерде Асхыс суғ хыринда хас пазында иртірілчеткен кӧзідіглер ідӧк ирт пардылар.
Ирткен неделяда халғанҷызын иирде хас пазында Асхыстағы культура туразының тоғынҷылары музыка аппаратуразын турғызып пастааннар. 8 час иирде пӱлес полыбысча, аннаңар олар ирте арах тоғынып пастааннар. Палалар мындох хайынысханнар, олар даа пілгеннер, пӱӱн чайғыдағы халғанҷы кӧзідіг. Чайғыда пятница сай Асхыс істіндегі аал чӧптерінің эстрада устары постарының хайхастығ ойыннарын кӧзіткеннер.
Асхыстағыларның аразында чоох чӧр сыххан, Саяногорсктаң ӱбӱрҷең оркестр килҷең одыр. Афишалар даа полған нооза. Чоохтаан чоох, сигіс час иирде Саяногорсктағы ӱбӱрҷең оркестр ойнап пастаан. Кинолар хоостыра оңнапчам, хан тузындох улуғ городтарда тынағ иирлерінде чааҷыларның ӱбӱрҷең оркестрлері ойнаҷаңнар. Амды, тізең, чалахай иирде Асхыс суғ ӱстӱнҷе аалға тіріг музыка чайылған. Оркестрнең устаан Дмитрий Белокопытов. Уғаа хандыра ойын соонда, аалларның иң артых эстрада ӧмелерін адирдаңар чарлабыстылар. Чон суулаза тӱскен. Чоохтирға кирек, кӧрігҷілер толдыра. Мына эстрада кӧзідіглерінде араласхан ӧмелерні адабыстылар. Пурнада марығда араласхан ӱчӱн сыйых пічіктерін читірділер. Кӧрігҷілер сизінчелер, ӱс ӧме иң артыхтары полып халды. Хайзына пастағы орын килізер ни? Ӱзінҷі орынны Паза аал чӧбінің эстрада ӧмезі алча. Пазадағылар ӧрінчелер. Асхыста Пазадаң киліп чуртапчатханнар толдыра нооза. Чоохтирға кирек, ноо даа аалдаң килзелер, чир-суғҷылары оларға «ағырарға» кил турҷаңнар.
Хайди тидірлер, хас пазында кииде ноо-да ниме тыыпчатхан, чарлағҷы ікінҷі орын алған ӧмені адабызарын сағыпчалар, сымзырых. Мына истегілер, ӧрінізіп, хысхырысчалар. Оларның ӧмезі ікінҷі орында. Минің чир-суғҷыларым ӧріністе, олар пастағы орын аларлар! Чоғархы Асхыс ӧмезі пастағы орын алча тіп чарлапча чарлағҷы. Аның ӱні чонның хысхырызында, сығырыста чіт парған.
Пайрам аннаң андар пар сыххан. Чииттер ле нимес, частан парған улус мындох полған. Махалығ, хандыра иир. Мындағ марығны иртірерге Асхыс аймааның культура устаа сағынып алтыр. Пятница сай иирде, ибде хайын чӧрчеткен арада, Асхыс ӱстӱнҷе уғаа хандыра кӧглер чайылҷаң. Хоза чоохтаза, теелбектеніп ала хайын чӧрҷеңмін. Кӧңнібіс кӧдірген прай улусха алғыс. Сағыс пар, тігі чылға Ағбан суғ озариндағы аалдағылар ойыннарынаң килзелер, хомай полбасчых.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде