КАННЫДА «АЛТЫН КӦӦК» ПРАЙЗЫН АПТАДЫ
02.09.2016
Хабарлар
Пу наада «Ӱлгер» паза «Кӱн сузы» чайаачы ӧмелернің артисттері Франциядаң айландылар. Олар Канныда Россиядағы искусстволарның фестивальында араласханнар.
Чорыхха хайди чӧргеннеңер чайаачы устар хабарҷыларға пресс-конференция тузында чоохтап пиргеннер. Че пастап сӧс алған Хакасияның культура министерствозының амғы искусство пӧлиинің устағҷызы Валентина Лебедева. Ол таныхтаан: «Россиядағы искусстволарның фестивальы Канныда 19-ҷы хати ирткен, Хакасия анда алтынҷы чылы ӧткін араласча. Че пӱӱл фестивальный программазын пiстiң артисттер пастағызын на асханнар. Ол пістің чайаачыларыбыстың устары тилекей синінде пӧзік паалалчатханы полча».
23 августта фестивальларның паза конгресстернің ӧргезінде Дебюсси театрның залында «Кӱн сузы» паза «Ӱлгер» ансамбльлар «Алтын кӧӧк» хай-балет кӧзіткеннер паза «Сыбыр чир ӱстӱ» программаның ӱзігін толдыр пиргеннер. Хакас кип-чоох пастыра турғызылған ойын кӧрігҷілерні аптаан. Таныхтирға кирек, Канныда аймах фестивальлар сыбыра иртірілчелер, аннаңар чайаачы кізілерге чуртағҷыларны хайхадарға сидік. Че пістің оол-хыстар французтарның сағыстарында ӱрге халғаннар. «Cannes nice-matin» газета 26 августта сыххан номерде «Алтын кӧӧкті» саблығ «Лебединое озеро» балетнең тиңнестірген. «Ӱлгер» ӧменің хайларын хабарҷылар ідӧк пӧзік паалааннар.
24 августта хакас артисттері «Орыс хараазы» гала-концертте араласханнар. Аннаңар Хакасияның чон артизі, «Ӱлгер» ансамбльның устағҷызы Вячеслав Кученов чоохтаан: «Ӱлгер» ӧме ол кӱн тынанған, аннаңар мағаа пістің оол-хыстарны сценада кӧріп аларға оңдай полған. Поғдархаам чиит артисттер ӱчӱн, олар пістің хазнаны, Хакасияны, хакас чонны фестивальда турыстыра кӧзіткеннер».
Гала-концертте чииттер ӱс теелбек толдырғаннар. Хоза оларға дефиле тимнирге киліскен. Хакасия культуразының саблығ тоғынҷызы, «Кӱн сузы» ӧменің хоос устағҷызы Наталья Апуневич таныхтаан: «Якут дизайнер Сардана Алексеева Каннызар фестивальға, ахча чохтаңар, пар полбаан, че піс аннаң чоохтас салғабыс, ол чайаан кип-азахтарны паза кӱмӱстең иділген чазанҷыхтарны пістің хыстар «Орыс хараазында» кӧзіт пирерлер тіп. Дефилені хыстарнаң хада Тимур Тюкпеев тимнеен. Ол «Кӱн сузы» ансамбльда 2007
чылдаң сығара істенче, аннаңар хореографтың тоғызын ӧтіре пілче. Пістің абахайларыбыс, Сардана тіккен кип-азахты кис салып, сценада уғаа ӧкерек кӧрінгеннер.
Пресс-конференцияда халғанҷызын сӧс «Ӱлгер» ансамбльның музыка устағҷызы Анна Бурнакова алған. Анна Николаевна Россияның культура министерствозына, Кино-фестивальларның паза чоннар аразындағы программаларның кініне паза Хакасияның правительствозына улуғ алғызын читірген. Ол таныхтаан: «Россияның ӱлгӱлері Хакасияа улуғ хайығ салчалар, пістің республиканың чайаачы устары хырығ озаринзар сыбыра чӧрчелер. Хакасияның правительствозы піске чахсы хабасча, аның кӱстенізінең «Ӱлгер» паза «Кӱн сузы» ансамбльларның прай артисттері Каннызар пар килгеннер. Ахча чохтаңар, пістіңнернің піреезі пар полбаан полза, французтарны аптаан «Алтын кӧӧк» хай-балетті турыстыра кӧзідерге сидік поларҷых».
Хабарҷыларнаң тоғазығның халғанҷызынзар артисттер наа сезонда кӧрігҷілерні хайхадарға тимненчелер тіп искіргеннер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде