ВЛАДИМИР ШТЫГАШЕВ ТАШТЫПТАҒЫЛАРНЫ АЛҒЫСТААН
06.09.2016
Хабарлар
Пастағы сентябрьда Таштып аалның школазы 2118 ӱгренҷее ізиин асхан. Пастағы саң 251 кічіг ӱгренҷее сыңыраан. Таштыптағы 1 № ортымах школа-интернаттың ӱгренҷілерін паза ӱгретчілерін ӱлӱкӱннең Хакасияның Ӧӧркі Чӧпк незі Владимир Штыгашев алғыстаан.
- Аарлығ арғыстар, піліс чолынҷа сірерге чахсы парарға алғапчам. Пу чолда сірерге хыйға ӱгретчілер паза хынчатхан іҷе-пабалар хабассыннар. Ӱгретчілерге чахсы кӧңніліг поларға, профессиональнай чидіглерге чит турарға алғапчам. Сірер оларға пілістер ле пирбинчезер, ідӧк чахсы нимее, нымзах чӱректіг поларға паза Чир-суубысха хынарға ӱгретчезер. Анзы амғы чуртаста уғаа кирек. Наа ӱгредіг чылынаң сірерні! - теен республика парламентінің устағҷызы.
Хаҷан-да Таштыптағы школа-интернатта ӱгренген Владимир Штыгашев таныхтаан:
- Пістің школа хаҷан даа ӱгредігнің пӧзік синінең паза материально-техническай саринаң пасхалалҷаң. Хаҷан мин ӱгренгем, пістің школада андадох химияның, физиканың алынҷа кабинеттері, филологияның кабинеді пар полған. Паза ӱгретчілер аразында 4 наука кандидаты тоғынған. Аннаңар ӱгредіг сині дее пӧзік полған. Олох туста пістің хазна отыс чылларда пасталығ ӱгредігні - 4 классты -прайзына пирерін сағыста ла ал чӧрген. Японияда, тізең, ол тустох ортымах ӱгредігні - 11 классты - прайзына пиріп пастааннар.
Соонаң прайзы Японияның таңнастығ тилізінеңер чоохтас сыххан. Анзы, тізең, хазнадағы ӱгредігнің пӧзік синінең сығысхан нооза. Аннаңар чуртаста ол уғаа кирек ниме - чахсы ӱгредіг алары. Владимир Штыгашев ідӧк ӱгретчілерні школада реформалар иртірерінең маңзырабасха хығырған.
- Мының алнында чыылған нимее сибер хайыңар, ол опытнаң тӱзімніг тузаланыңар, - теен Хакасияның Ӧӧркі Чӧп кнезі.
Автор :
Хакасияның Ӧӧркі Чӧбінің хабарлар пӧлии
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде