ИНВЕСТИЦИЯЛАРНЫ ПАРЫСТЫҒ САЛАРҒА
06.09.2016
Хабарлар
Чурт-коммунальнай хонии сурығлары -Хакасияда ла нимес, че ідӧк тиксі Россияда иң сағыссыратчатхан сурығларның пірсі. Че пістің прай ла ниме хомай полбиндыр. Хакасияда чурт паза коммунальнай хоныхты тилідеріне ниме иділчеткеннеңер паза ноға пу кӧстеге инвестицияларны саларға парыстығ полчатханнаңар чоохтапча Хакасияның Ӧӧркі Чӧп кнезінің орынҷызы - бюджетче паза налог политиказынҷа комитет кнезі Сергей Владимирович КОМАРОВ.
ЧАРЫТХЫ ПААЛАРЫНАҢАР
Хакасияда чарытхаа иң ниик паалар. Аннаң ниик Иркутск облазында ла. Кӧзідімге, пістің ааллар паза электроплиталығ кӧп квартиралығ туралар чуртағҷылары 2016 чылның 1 июльынаң сығара киловатт ӱчӱн 1,34 салковай тӧлепчелер. Хызылчар крайында - 2,8 салковай, Новосибирск облазында - 3,2 салковай.
Хакасия 2017 чылның 1 июльына теере «халғанҷы миля» оңдай тоғынчатхан регионнар санына кірче, хайзы чуртағҷыларға чарытхы паазын Россияда иң нииктернің санында тударға полысча. Че піс «халғанҷы миляның» тоғызын Хакасияа 2029 чылға теере узарадарға кирек тіп санапчабыс. Алай аның тоғызы тузы чох поларға кирек. Сойан-Сус ГЭС хорғыс ағылчатхан чирде чуртапчатханда, пістің андағ правобыс пар.
«Халғанҷы миляның» тоғызын узарадар ӱчӱн, Ӧӧркі Чӧп 2013 паза 2014 чылларда «Электроэнергетикадаңар» федеральнай законзар алызығлар кирер сағыснаң Россияның Хазна Думазынзар ікі хати айланған. Сағам улуғ арғыстарыбыс чӧптерібіснең чарасхалахтар. Че піс мында тохтирға сағынминчабыс. Москвада Ӧӧркі Чӧптің закон сығарҷаң сағызын толдырарға піске полысча Хазна Думазының депутаты Надежда Сергеевна Максимова.
Піс ідӧк чарытхы ӱчӱн тӧлирінде социальнай син кирерінең тоғыр полғабыс. Пістің ол киліскен! Ол кирілген полза, чуртағҷыларға чарытхы ӱчӱн ниик паанаң кӧрілген син ӱчӱн не тӧлирге килізерҷік, аннаң артых тузаланылған чарытхы ӱчӱн толдыра паанаң тӧлирҷікпіс, хайзы 4,5 салковайға тиңнелче. Хакасияның ӱлгӱлері социальнай синні соона салдыртып алғаннар.
АРТЫХ ТӦЛЕБЕСПІС
Чурттарнаң устапчатхан компанияларның тоғызын чахсыландырар ӱчӱн, 2011 чылда Россия Правительствозының 354 № чарадии алылған, хайзында «тиксі тураның кирексіністері» - ОДН - пілдіріг кирілген. Аны хоостыра чуртағҷылар тураларның паза квартираларның коммунальнай полызығларының пасхалалчатхан чардығы ӱчӱн тӧлеп пастааннар. Ол тӧлег пір син полбаҷаң, че хаҷан даа полҷаң. Артых хорадығларны чуртағҷылар тӧлепчеткенде, чурттарнаң устапчатхан компаниялар аның синін хызырардаңар сағыссырабаҷаңнар. Анзы чуртағҷыларның кӧңніңе кірбеҷең.
Пу сананыс Хакасияның Ӧӧркі Чӧбінің кӧңніне кірбеен. Аннаңар республика депутаттары чурт паза коммунальнай хоныхта, ол санда тиксі тура кирексіністеріне хорадығларынҷа, тӧлеглернің саналчатханын иптирінеңер сурыныснаң Россия Правительствозының кнезі Дмитрий Медедевсер айланғаннар. Айланыста піс ОДН-ға чідірілген, оғырлалған, хоза пазылған паза артых тузаланылған танығлар кірчеткенін таныхтаабыс.
2015 чылның апрельінде 354 № чарадыға алызығлар кирілген, хайзының пӱдізіне Дмитрий Медведевсер ызылған айланызыбыстағы сӧстер алыстырылбин даа алылған. Салтарында чуртағҷылар пос хорадығлары ӱчӱн счетчиктерінҷе тӧлирлер, ОДН ӱчӱн - кӧрілген синҷе, хайзын санап турар Хакасияның правительствозы, халған чардығы, тізең, чурттарнаң устапчатхан компанияның ӱреглеріне саналар.
Пуох пілдірігнең палғалыстығ сидіксіністерге урунғаннар 30-таң асхынах квартира саналчатхан паза устапчатхан компаниялары чох тураларның чуртағҷылары. Олар суғ ӱчӱн аны сығарчатхан компанияа тӧлеҷеңнер, пірееде тиксі тура кирексіністері ӱчӱн пір ле квартира ээзіне 5000 салковай санап пирҷеңнер. Пӱӱл 1 августтаң пасти пу тураларның чуртағҷыларына ідӧк тиксі тура кирексіністерінің сині турғызылған.
НАА КӦРІС
Пу наада муниципальнай пӱдістернің форумында Ӧӧркі Чӧп кнезі Владимир Николаевич Штыгашев орындағы депутаттар чӧптерін закон сығарар сағыстарынаң ӧткін тузаланарға хығырған.
Ол правонаң тузаланған Асхыс аал чӧбі. Аның пазы Марина Анжиганова республиканың муниципальнай аймахтарда аймахтарның паза аал чӧптерінің полномочиелерін чарчатхан законынзар алызығ кирер сағыснаң Ӧӧркі Чӧпсер сыххан. Пӱӱнгі кӱнде чурт паза коммунальнай хоных сурығлары аал чӧптерінің полномочиезіне кірче. Марина Алексеевна оларны аймахха пирібізерге кирек тіп санапча. Андағ оңдайнаң, бюджетте ахчанаң сидіксіністер полза, аймахха ааллар аразында хара тас чыындызын ӱлестірерге, саайларны чох идерге, тиксі сидіксіністерні пӧгерге ниик полар.
Аннаң пасха чурт паза коммунальнай хоных пааларын толдыра синіне читірерге киректелче. Хомзынысха, пӱӱн толдыра паалар Саяногорскта ла (ол санда ЬІмай паза Нымырттығ посёлоктарда) турғызылған. Пасхазы читіре кӧрілбеен ахчаны республика бюджедінең компенсация чіли алча. Сидік сурығны хазна паза алынҷа кізілер хада-пірге тоғынчатханы, инвестициялар паза кӧп чылларға кӧрілген концессия чӧптезіглері пӧгерге полызар.
Наа алызығлар санына ідӧк чарытхы ӱзӱрлеҷең паза аны чахсы тузаландырҷаң технологиялар турғызылчатханы кірче. Олар ідӧк тиксі тыхтағ тоғыстарында тузаланылчалар. Амды кӧп квартиралығ тураларның подвалларында чылығ пирҷең системада пос алынҷа тоғынчатхан элеватор узеллері турғызылча. Ол тура тастындағы паза істіндегі датчиктер хоостыра чылығны хозарын алай хызырарын позы кӧрче. Система ӱс хати артых тоғынчатханы 2015 - 2016 чылларның хысхы тузында кӧрін парған.
ИНВЕСТИЦИЯЛАРНЫ ПАРЫСТЫҒ САЛАРҒА
Республика ӱлгӱлерінің Хакасияның чурт паза коммунальнай комплексінің реформалар иртіреріне паза тилізіне кӧрізі чахсы салтарлар ағылчатханын киречілепчеткен кӧзідіглернің пірсі - алынҷа инвестицияларны тартарына регионнар тимненізінің федеральнай рейтингі. Пу рейтингте, хайзын Россияның пӱдіріг паза ЖКХ министерствозы тимнеен, 2016 чылның пастағы чарым чылының салтарларынҷа Хакасия ӱзінҷі орында турча. Пістің алныбыста Нижегородскай паза Вологодскай областьтар ла турчалар.
Ол Хакасияда чурт паза коммунальнай хоных кӧместең тиліпчеткеннеңер чоохтапча. Пілдістіг, сидік сурығлар ам даа кӧп. Че піс оларны хайди даа пӧгербіс. Анзы Хакасияның Ӧӧркі Чӧбінің депутаттарына табығҷыларның сурынызы. Піс оларны толдырарбыс.
Сергей КОМАРОВ, Хакасияның Ӧӧркі Чӧп кнезінің орынҷызы бюджетче паза налог политиказынҷа комитет кнезі
Автор :
Пазып алған Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде