ПУРУНҒЫ ТАҒНЫҢ ЧАЗЫТТАРЫН АСХАНЫ
06.09.2016
Хабарлар
Пу кӱннерде «Хакасия» газетаның редакциязында «Оғлах тағда пазылған чайғы этюдтары» хоостар кӧзідии пайрамни азылған. Хоостарның авторы Д.И.Каратановтың адынаң олған хоос школазының ӱгретчізі Софья Шалгинова-Асочакова полча.
Софья Анатольевна Алтай аймаандағы Хойбал аалда тӧреен. Кічігдең сығара ол хоостирға хынҷаң. «Пабамның саринаң прайзы даа чайаачы кӧңніліг кізілер полғаннар, - чоохтапча чиит ипчі. - Минің ағам ағастаң киртчең, кізілерге орғаннар, одырчыхтар итчең. Пабам Анатолий Петрович Шалгинов прай чуртазын ӱгретчі полып істенген, ол уғаа чахсы хоостаҷаң».
Пасталығ класстар соонаң Соняҷах Хакас национальнай школада ӱгрен сыххан. «Мында хоос школаның филиалы полған, - сағысха кирче чайаачы ус, - анаң ол республиканың национальнай олған искусстволар школазына айлан парған. Мин ӧӧрелерімнең Александр Викторович Доможаковтың холында хоостирға ӱгренгем.
Хоосчы профессиязын таллап алып, школа соонаң ус холлығ хыс В.И.Суриковтың адынаң Хызылчардағы хоос училищезінің театр-бутафор пӧлиинде ӱгренче. «Специальностьча ӱс чыл «Нымах» кӧклӧ театрында істенгем, - узаратча чооғын Софья Анатольевна. - Анаң, пілістерім тилідерге пӧгініп, Хызылчардағы хоос институдын тоосхам. Мағаа рекламанаң айғазарға, сувенирлер идерге киліскен, амды олғаннарны хоостирға ӱгретчем».
Таланттығ кізі тоғыс чох одырбинча. ГІос тус полза, ол хоостапча, ойнаҷахтар итче алай компьютернай графиканаң айғасча. Пӱӱлгі чайғыны Софья Анатольевна Оғлах паза Тепсей тағларда иртірген. Таныхтирға кирек, пу чирлер хакас чонның кип-чоохтарында удаа учурапчалар, аннаңар олар чайаачыларны постарынзар тартча поларлар. Пленэрде С.А.Шалгинова-Асочакова он артиинаң хоос чайап салған, оларны прайзын ол кӧзідіге таллап алған.
Кӧзідіг пайрамни азылчатханда, пастап хам Людмила Кобежикова, хамнап, Софья Шалгинова-Асочакованың чолы азых ползын тіп алғаан. Анаң «Чылтыс» ӧме чыылған чонға хакас кӧглерін толдыр пирген. Софья Анатольевна кӧрігҷілерні, хакас кибірі хоостыра, айраннаң паза пурунғы тустарның хайа хоостары чағын полтыр. Пістің ӧбекелерібістің искусствозына тӧстеніп, ол хайхастығ тоғыстар чайапча. Пірее хоостарда пір ле таңма кӧзіділ парған, че ол кӧрігҷілерні сағысха тӱзірче.
Ідӧк кізілер Софья Анатольевна иткен кӧклӧлерні кӧріп алғаннар. Хоосчы хамнарны чайирға хынчаттыр. Пір кӧклӧ омазы хам ипчі Людмила Кобежикова позына тӧӧй тіп таныхтапчатхан.
С.А.Шалгинова-Асочакованың хоостар кӧзідии 30 сентябрьға теере тоғынар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде