ПОҒОНЫ КИЗІП, ПАЗА СУУРБААН
07.09.2016
Хабарлар
КУЗБАССТА «РОССИЯНЫҢ КӦГЛЕРІ» ФЕСТИВАЛЬ-МАРАФОН ШАХТЕРЛАР КӰНІНЕ УДУР ПАСТАЛҒАН. КЕМЕРОВ ОБЛАЗЫНЫҢ ЧУРТАҒҶЫЛАРЫ АНЫ ІКІНҶІ ХАТИ УДУРЛАДЫЛАР.
ФЕСТИВАЛЬ-МАРАФОННАҢ РОССИЯНЫҢ ЧОН АРТИЗІ НАДЕЖДА БАБКИНА УСТАПЧА. ІКІ ЧЫЛ МЫНЫҢ АЛНЫНДА «РОССИЯНЫҢ КӦГЛЕРІ» ФЕСТИВАЛЬ ХАКАСИЯДА КУӰЛЕП-СУУЛАП ИРТКЕН. АМДЫ, ТІЗЕҢ, ОНЫНҶЫ ХАТИ ПАЙРАМНЫҒ МАРАФОН КУЗБАССТА ИРТТІ. ТИКСІ АЛЗА, ОЛ РОССИЯНЫҢ 69 РЕГИОНЫНДА ПОЛҒАН.
Концерттер 21 августтаң Новокузнецкте паза Прокопьевск аймаанда тикке кӧзіділгеннер. Аннаң андар фестиваль Прокопьевск, Таштагол, Осинники, Междуреченск, Ленинск-Кузнецк, Кемеров, Мариинск, Белово аал-городтарда узарадылған.
Чон алнынзар Москвадағы хазна фольклор музыказының «Русская песня» театры, Хакасиядаң «Айланыс» фольклор ӧмезі, Новосибирсктең «Рождество» ӧме паза Саха-Якутиядаң Альбина Дегтярева сыхханнар. Оларға хоза полған на аал-городтағы фольклор ӧмелері хозыл турғаннар.
Пылтыр «Россияның кӧглері» фестиваль Омск облазында ирткен. Пістің республикадан, Хакасияның чон артизі Нина Идимешева, Россияның паза Хакасияның саблығ артизі Евгений Улугбашев анда араласханнар. Кемеров чиріндегі сценаларның ӧӧн ойыннарын пӱӱл ідӧк Хакасияның артисттері, «Айланыс» фольклор ӧмезінің араласчылары, чазадылар.
«Айланыстың» артисттері Хакасия искусствозының саблығ деятельлері Александр Саможиков паза Олег Чебодаев, Хакасияның саблығ артизі Степанида Саможикова, Ирина Чугунекова, Евгения Костякова чон хынчатхан кӧглернең Кузбасстағы кӧрігҷілерні аптааннар. Фестиваль-марафонда араласханнаңар Александр Степанович паза Степанида Степановна Саможиковтар чоохтапчалар:
- «Россияның кӧглері» марафонда пістің ӧме пастағызын на араласты. Че анда аралазардаңар хығыртығ март айдох килген. Кӧп capын тимнирге кирек чох полған. Піс фестивальға Иренек ханнаңар произведениедең «Хайҷыларыбыс» ӱзікті, «Аарлығ аалҷыларыбыс», «Пай ирен» кӧглерні паза «Худағай» ойын-теелбекті апарғабыс. Полған на сценада пір кӧг толдыр пирҷеңміс. Программа хоостыра концерттің ортызында чон алнынзар сыхчаңмыс.
Кӧрігҷілер хакас кӧглерін хынып истірлер, «Айланыс» ӧменің артисттерінзер ноға асхынах ырладыңар, піске читпеен тіп сыбыра айлан турғаннар. Анзы уғаа чахсы, че фестиваль-марафон - табырах, пір тыныснаң иртчеткен ойын. Уламох Надежда Бабкинаның устаанынаң пір дее ниме сӧӧ тартылбинча тіпчелер артисттер. Орайлат салған артисттер сценаа сыхпин халчалар.
«Россияның кӧглері» фестиваль-марафонның сценазынзар артисттер соон сӱрістіре сыхчалар. Кӧрігҷіні орыс паза пасха чоннарның табырах кӧглерінең хайхатчалар. Хакасияның артисттері, тізең, сала амыр, пасхаҷыл кӧглернең кӧрігҷіні аптапчалар. Пістіңнернің соонаң пасха ӧмелерні кирексібинібісчеткен осхастар.
Фестиваль-марафонның тӧрт ӧӧн ӧмезінің санында «Айланыс» полған. Ноға Надежда Бабкина Хакасияның кӧгҷілеріне іди хынча полҷаң сурыға мындағ нандырығ полған: «Орыс чонның худы хайхастығ тилекей полза, хакас чонның худы-чаны уламох чазыттығ паза хайхастығ...» Піди чоохтаптыр Надежда Бабкина.
Хаҷан Степанида Саможикова Надежда Бабкинаа поғо сыйлап пиргенде, Россиянын, саблығ артизі тың ӧрін партыр. «Хакас чонның кибірі хоостыра поғо ипчі кізіні чабал харахтаң, хара нимелердең арачылапча», - піди чоохтанып, Степанида ағаа поғо кизірт пирген.
«О-о, мағаа уғаа кирек ниме», - саблығ артист алғызын читірген. Анаң, ойыннар чорыхтарынаң чӧріп, поғоны сыбыра кис чӧрген.
Пілдістіг, чорыхтарға удаа чӧрчеткен чайаачы улус мындағ фестивальларда хайди даа таныстарына тоғазадыр. «Айланыстың» артисттеріне телеут, шор таныстарынаң тоғазып, чоохтазып алар оңдай полған. Новосибирсктегі «Рождество» орыс фольклор ӧмезінең, чағын танызып, ынағласханнар. Уғаа чахсы кізілер анда тоғынчалар тіп чоохтааннар пістің артисттер. Мыннаң мындар ынархазарын узарадар кӧңнілерін чазырбааннар.
Фестиваль иртчеткен стадионнарда 10 муң азыра кӧрігҷее теере полған. Тиксі алза, Кемеров облазының 100 муңҷа кізізі «Россияның кӧглері» марафонны кӧріп алған полар.
«Фестиваль хазнабыстың аймах культуразын кӧзітче, - таныхтаан Надежда Бабкина. - Пістің амғы командада якуттар, хакастар паза даа пасхазы... Прайзына орын читче. Хайдағ даа чирзер килзем, туған-чағыннарымзар килген чіли пілдірче».
Пӧзік синде иртірілчеткен фестиваль-марафон, Россияның аймах-пасха регионнарының чуртағҷыларының кӧңнін кӧдіріп, пос чиріне хынысты тыытча.
Автор :
Елена САГАТАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде