АҒБАНДА ПІР МУҢ ОРЫННЫҒ НАА ШКОЛА ПӰДІРЕРДЕҢЕР
07.09.2016
Хабарлар
Хакасияның пазы Виктор Зимин Ағбан город пазы Николай Булакиннең тоғасхан. Город мэрі регион устағҷызынзар Ағбанның 2017 чылда 1000 орыннығ наа школа пӱдірерінҷе федеральнай программаа кирер сурығҷа хабас пирерге сурыныснаң айланған.
Хакасия тиксі ӱгредіг учреждениелерінде наа орыннар тӧстирінҷе федеральнай программада араласча паза амғы туста региондағы объекттерні пазағы чылның планынзар кирер чӧптіг пічіктерні тимнепче. Ағбан городтың администрациязы пӱдірілер школаның проектін тимнеп салған. Николай Булакиннің чооғынаң, ол школа республикада прайзынаң пасхалалар.
Ағбанда палалар саны уғаа табырах ӧсче. Хайди таныхтаан республиканың ӧӧн городының мэрі, амғы ӱгредіг чылының салтарларынҷа городтағы школаларны 800-ке чағын ӱгренҷі тоозар, олох туста 1-ғы классха пӱӱл 2600 пала парды. Ӱс артиинаң хати кӧп. Аны хоостыра Хакасияның ӧӧн городында наа школалар пӱдірерінҷе сурығ хатығ турыбысхан.
- Піс республикада чағынғы чылларда ӱгренҷілернің саны сигіс муң чарымнаң он сигіс муңа теере ӧс парар тіп сағаабыс, - чарасхан Хакасияның пазы.
Николай Булакин, школалар пӱдірҷең федеральнай программа тоғынып пастабысханда, город администрациязы 1000 орыннығ, пір сменалығ школаның проектін тимнеп салғанын таныхтаан. Проект хазна экспертизазын иртібіскен, ідӧк тиксі Россиядағы школаларның проекттері санына кирілген. Объект паазы - 850 миллион салковай, пӱдіріг-монтаж тоғыстарынаң паза наа оборудование турғызарынаң хада. Угредіг заведениезін Ағбанның ӱстӱнзархы чардығында, алтынҷы микрорайонда, пӱдірерге пӧгінчелер. Анда туралар кӧп, чуртағҷылар саны ӧзер тіп сахталча, чағынғы школалар, тізең, амох ікі сменалығ тоғынчалар.
- Виктор Михайлович, пістің прай пічіктер тимде, амды ӧӧні - федеральнай программаа кіріп алары. Сірер чарадығ пирзеңер паза программаа кір парзабыс, піс объектi ікі чылға пӱдірібізербіс! - таныхтаан Ағбанның пазы.
- Піс сірерге пу ла проектче хабаспаспыс, - теен Виктор Зимин.
- Піс аннаң андар парарбыс, пір ле школанаң, ползын ол пір муң орыннығ даа, сидіксіністі пӧк полбассың нооза. Ағбанда чуртағҷылар саны уғаа табырах ӧсче, пір чарым - ікі чыл пазынаң ӧӧн городыбыс наа школа орыннарын иң не кирексіпчеткен город пол парар. Хайди даа тимненерге кирек. Мин правительстваа чахығ пир салам, ӧӧн городыбысха 5 чылға кӧрілген килістіре программа тимнеп салзыннар.
Хакасия пазының чооғынаң, хаҷан-да олған садтарында орыннар чидіспинчеткенінең палғалыстығ сидіксініс пӧгілбес тіп пілдірген. Че пӱӱн ол сурығ пӧгіл парған. Андағох оңдайнаң тиксі ӱгредіг учреждениелерінде наа орыннар тӧстир сурығны пӧгерге кирек: план хоостыра паза чардыхти.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде